Zabur 98
98
Nókén sawté bejanét
Zaburé.
1Pa Hodáwandá nókén sawté bejanét,
ke ajabén kári kortag,
áiay rástén dast o pákén báská
sób o pérózi katthetag.
2Hodáwandá hamá neját pésh dáshtag ke cha áiay némagá ent,
wati adli kawmáni chammán paddar kortag.
3Áiá pa Esráilay óbádagán wati mehr o wapa yátá áwortag,
zeminay sajjahén goddhi hadd o simsarán, may Hodáay dátagén neját distag.
4Oo sajjahén zemin! Pa Hodáwandá shádmániay kukkárá borz kan.
Kukkár kanét, pa shádehi sawt bejanét, benázénét.
5Pa Hodáwandá chang o sáz bejanét,
gón sázá sawt bejanét.
6Gón sorná o gwarándhay kánthá#98:6 Gwarándhay kánth Esráiliáni kerrá sázé.
bádsháhén Hodáwanday bárgáhá,
shádehiay kukkárá chest kanét.
7Daryá o daryáay tahay sajjahén chizz grandátant,
jahán o áiay sajjahén jahmenend.
8Kawr cháp bejanátant o
kóh pa shádmáni sawt,
9Hodáwanday bárgáhá sawt bejanátant,
ke á pa zeminay dadrasiá kayt.
Á jaháná pa adl dádrasia kant o
kawmán pa ensáp.
Currently Selected:
Zabur 98: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
