Zabur 92
92
Tai wapádáriay járá janán
Pa Shabbatay róchá sawté. Zaburé.
1Hodáay satá kanag wassh ent o
tai námay názénag, oo borzén arshay Hodá!
2Bámgwáhán tai mehr o
shapán tai wapádáriay járay janag,
3gón dahtárén tamburag o
changay zémelá wassh ent.
4Chiá ke taw, oo Hodáwand,
maná gón wati dastay kárán shádmán kortag,
tai tawsipá shádmániay sawta janán.
5Oo Hodáwand! Tai kár chón mazan ant o
pegr chenkadar johlánk.
6Ahmaka nazánt o
nádán sarpada nabit.
7Harchont ke badkár chó káhá berodant o
radkár besabzant,
bale tán abad tabáha bant.
8Bale taw, oo Hodáwand,
tán abad borzén arshay Hodá ay.
9Tai dozhmen, oo Hodáwand,
allam gár o gomsára bant o
sajjahén badkár, sheng o sháng.
10Bale taw mani kánth, wahshién gókay kánthay paymá borz dáshtag o
maná sapáén rógen per moshtag#92:10 Rógen per moshag, bezán pa bádsháhiá gechén kanag..
11Mani chammán dozhmenáni shekast distag o
góshán badkáráni sarshakuniay habar eshkotag.
12Pahrézkár macchay paymá sabzant o
Lobnánay gazzáni paymá rodant.
13Á Hodáwanday lógá keshag butagant o
may Hodáay bárgáhá sabzant.
14-15Piriá ham bar o samara dayant o
pa é járay janagá tarr o tázag o sabza mánant
ke Hodáwand rást o ádel ent,
hamá mani talár ent o
áiá hech náensápi o badi mán nést.
Currently Selected:
Zabur 92: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
