Zabur 88
88
Róch o shap gón taw zári o peryáta kanán
Pa sázger o washáwázáni sálárá. Kórahay chokkáni Zabur. “Mahallat Léhanutay”#88:0 “Mahallat Léhanutay” máná “paréshániay dard” ent. Báwar esh ent ke edá muzikay yak gálé. tarzay sará. Hémán Ezráhiay shayri gwashtánk. Sawté.
1Oo Hodáwand! Oo mani rakkénókén Hodá!
Shap o róch tai bárgáhá dwá o peryáta kanán.
2Mani dwá tai dargáhá berasát,
wati delgóshá gón mani peryátá kan.
3Man janjálán kaptagán o
mani zend pa marká sar butag.
4Hamá mardománi paymá hesáb áraga bán ke johlén kandhá kaptagant,
anchén mardoméay paymá ke nezór o nátwán ent.
5Mordagáni nyámá yalah dayag butagán,
chó mordagéá ke kabrá waptag,
ke taw áyáni yátá naay o
cha tai dastá jetá butagant.
6Taw maná johlterén kandhá dawr dátag,
tahárén johlánkiá.
7Tai hezhm mani chakká kaptag,
chawlán maná mán patátag. Ósht...
8Taw mani hamdelén sangat cha man dur bortag o
cha man bézár kortagant.
Bandig án o dar átka nakanán.
9Mani chamm cha andóhá tahár butagant.
Oo Hodáwand! Har róch tará tawára kanán o
dastán pa taw shahárán.
10Wati ajabén kárán mordagán pésha dáray?
Mordagáni arwáh páda káyant o tará satá kanant? Ósht...
11Mordag, kabrá tai mehray járá janant?
Mordagáni jaháná tai wapádáriay kessahána kárant?
12Taháriá, tai ajabén kár zánaga bant o
tai adl, shamóshkáriay molká?
13Bale man gón taw madatay peryátá kanán, oo Hodáwand!
Hamok sabáhá mani dwá tai bárgáhá rasant.
14Oo Hodáwand! Chiá maná yalaha kanay o
wati démá cha man chéra dayay?
15Cha warnáiá sakkiáni ámách o markig butagán,
tai torsá maná bazzag kortag o béwas án.
16Tai hezhmá maná patátag o
tai bimmá maná próshtag.
17Sajjahén róchá ápay paymá maná chapp o chágerdá geptag o
cha har némagá angerresh kortag.
18Taw mani dóst o sangat cha man dur kortagant,
tahná tahári ent ke mani hamráh ent.
Currently Selected:
Zabur 88: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
