Zabur 49
49
Málay sará tawkal nádánié
Pa sázger o washáwázáni sálárá, Kórahay chokkáni Zabur.
1Oo sajjahén kawmán! Beshkonét.
Oo jahánay drostigén jahmenendán! Delgósh kanét.
2Borz o jahlén mardom doén,
azgár o nézgár, shomá sajjahén.
3Mani dap, hekmat bayána kant,
delay johlánkén pegr, pahm o zánta bakshit.
4Góshá dém pa nemunah o batalé tarrénán,
wati delay cháchay granchá gón changay sázá pacha kanán.
5Baláh o sakkiáni róchán chiá betorsán,
á wahdá ke rad dayókáni badi maná angerra kant?
6Áyáni tawkal pa wati zarr o málá ent o
wati mazanén hastiay sará pahra kanant.
7Saddak án ke hechkas wati brátay zendá móketa#49:7 Mókag, bezán pa kaséay jánay rakkénagá gránén kimmaté dayag, Pársiá “bázkharid”. nakant o
áiay hónbaháyá Hodáyá dáta nakant.
8Chiá ke zenday mókag sakk grán ent o
hech kimmaté áiá porr korta nakant
9tánke ensán namirán bemánit o
hechbar kabrá magendit.
10Chiá ke gendagá én, dáná ham merant o
nádán o bésodd ham haláka bant o
wati mál o hastiá pa degarána kellant.
11Kabr áyáni abadmánén lóga bit,
nasláni nasl, áyáni menendjáh,
harchont ke kallagáná wati námesh per kort.
12Ádami wati arzesh o hastómandiá namánit,
chárpádáni paymá ent ke bérána bant.
13Esh ent jáheláni ásar,
hamáyáni ákebat ke wati habaráni mannók ant. Ósht...
14Pasáni paymá dém pa mordagáni jaháná ráh dayaga bant,
hamódá ke mark áyáni shopánka bit.
Bámgwáhán, nékdel áyáni sará hokmránia kanant o
áyáni jesm o ján kabrá pussit,
dur cha borzén márhián.
15Bale Hodáwand mani arwáhá cha mordagáni jaháná mókit o
maná wati dastá zurit. Ósht...
16Wahdé shomá gendét kasé hastómanda bit o
lógay shawkati gésha bit, matorsét.
17Chiá ke markay wahdá chizzé gón wata nabárt o
shawkati gón áiá kabrá narawt.
18Tán hastómand ent mardom áiá satá dayant.
Harchont ke zendá watá bahtáwar zántagi,
19bale wati pet o pirénáni hamráha bit,
ke zenday rozhná hechbara nagendant.
20Ádami wati arzesh o hastómandiay tahá nádán ent,
chárpádáni paymá ent ke bérána bant.
Currently Selected:
Zabur 49: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
