Zabur 42
42
Zaburay domi ketáb
Zabur 42—72
Oo mani arwáh! Chiá paréshán ay?
Pa sázger o washáwázáni sálárá. Kórahay chokkáni shayri gwashtánk.
1Áskay paymá ke pa kawray ápán zahirwár ent,
hamé paymá, oo mani Hodá, mani arwáh tai zahirán ent.
2Mani arwáh pa Hodáyá tonnig ent,
pa zend bakshókén Hodáyá,
ke bárén kadi Hodáay bárgáhá rawán o áiay démá záhera bán?
3Shap o róch warákon ars ent,
Wahdé mardom modám maná gwashant:
“Tai Hodá kojá ent?”
4Wahdé wati delay dardán darshána kanán,
hayálá kapán ke che paymá mazanén mocchiay hamráh atán,
jashnay mazanén mocchiay o
gón shádehiay kukkár o shogrgozáriay sawtán
dém pa Hodáay lógá áyáni rahshón atán.
5Oo mani arwáh! Chiá gimmortagay?
Chiá mani del o daruná paréshán ay?
Óst o omét Hodáay sará bekan,
chiá ke nóksará hamáiá názénán,
wati rakkénók o
6wati Hodáyá.
Mani daruná arwáh gimmortag
paméshká tará cha Ordonay sardhagár#42:6 Ordonay sardhagáray máná maróchigén Ordonay molk naent, Ordonay kawr o darag ent. o Hermónay kóhá yáta kanán,
cha Misáray kóhá.
7Tai mazanén ápsháráni grandá,
johlánki, johlánkiá gwánka jant,
tai sajjahén chawl o mawj,
mani sará proshtagant.
8Róchá, Hodáwand wati mehrá déma dant o
shapá sawt o zémeli gón man ent,
dwáé dém pa wati zend bakshókén Hodáyá.
9Gón Hodáyá ke mani talár ent gwashán:
“Chiá maná shamoshtaget?
Chiá cha dozhmenay ázárá
mótk byárán?”
10Dozhmenáni shegánán, mani haddh hurt kortagant,
chiá ke sajjahén róchá maná gwashant:
“Tai Hodá kojá ent?”
11Oo mani arwáh! Chiá gimmortagay?
Chiá mani del o daruná paréshán ay?
Óst o omét Hodáay sará bekan,
chiá ke nóksará hamáiá názénán,
wati rakkénók o wati Hodáyá.
Currently Selected:
Zabur 42: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
