Zabur 34
34
Hodáwanday nékiá bechashét
Dáuday Zabur. Hamá wahdá ke áiá Abimelekay kerrá watá ganókáni paymá kort, cha ódá dar kanag but o wati ráhá shot.
1Dáemá Hodáwandá názénán
áiay satá o saná modám mani dapá ent.
2Mani arwáh Hodáwanday sará pahra kant,
békebrén mardom beshkonant o shádehi bekanant.
3Gón man hórigá Hodáwandá mazani bedayét,
byáét ke hawáriá áiay námá názénén.
4Hodáwandon shóház kort o maná passawi dát,
cha mani sajjahén torsán maná ázáti kort.
5Á ke chammesh gón áiá ent drapshán ant,
áyáni dém hechbar sharmsára nabit.
6É meskiná tawár per jat,
Hodáwandá áiay tawár eshkot o
cha sajjahén sakkián rakkénti.
7Hodáwanday préshtag Hodátorsáni chapp o chágerdá pallé bandit o
áyán nejáta dant.
8Bechashét o bechárét ke Hodáwand nék ent,
bahtáwar hamá ent ke áiay mayár o báhótha bit.
9Oo Hodáwanday palgártagénán! Cha Hodáwandá betorsét,
chiá ke Hodátorsán hech kammié nést.
10Warnáén shér mohtáj o shodiga bant,
bale Hodáwanday shóház kanókán cha nékiá hech kammié nést.
11Oo chokkán! Byáét o cha man beshkonét,
man shomárá sabaka dayán ke Hodáwandá chón bemannét.
12Cha shomá kay pa zendá hodónák ent o
wasshén rócháni gendagay lóthók?
13Wati zobáná cha badiá dur bedár o
lonthán cha drógá.
14Cha badiá per tarr o néki kan,
sohl o émeniay shóházá bebay o hameshiay randá bekap.
15Hodáwanday chamm gón pahrézkárán ent o
góshi ham pa áyáni peryátán pach.
16Hodáwanday dém badkáráni helápá ent,
tán áyáni yátá cha jaháná beborrit o gomsár bekant.
17Wahdé pahrézkár peryáta kanant, Hodáwanda eshkont o
áyán cha sajjahén sakkiána rakkénit.
18Hodáwand gón proshtadelán nazzik ent o
droshtaruhán rakkénit.
19Pahrézkárá bázén sakki o sória rasit,
bale Hodáwand áiá cha sajjahén sakkiána rakkénit.
20Áiay sajjahén haddhán mohra dárit,
cha áyán yakké ham próshaga nabit.
21Badi badkárá koshit o
hamá ke cha pahrézkárá naprata kant, mayárbára bit.
22Hodáwand wati hezmatkáráni zendá rakkénit,
harkas ke áiay báhótha bit, mayárbára nabit.
Currently Selected:
Zabur 34: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
