Zabur 139
139
Oo Hodáwand! Taw maná zánay
Pa sázger o washalhánáni sálárá. Dáuday Zabur.
1Oo Hodáwand! Taw maná chakkásetag o zánay.
2Taw zánay ke man kadi nendán o kadi páda káyán,
cha durá mani pegr o hayálána zánay.
3Taw maná tarr o gard kanagá ham genday o
tachk bayag o árám kanagá ham,
mani har kárá zánay.
4Habaré ke cha mani zobáná dara kayt,
taw cha pésará zánayi, oo Hodáwand!
5Taw cha poshtá o démá maná chapp o chágerd kortag o
wati dast mani sará ér moshtag.
6Choshén zánt pa man sakk báz ajab ent
cha mani sarpadiá békesás báláter.
7Cha tai arwáhá démá tarrént o kojá shota kanán?
Cha tai bárgáhá tatk o kojá shota kanán?
8Agan ásmánán berawán, taw hamódá ay o
agan mordagáni jaháná wati nepádá pach bekanán, taw hamódá ay.
9Agan bámgwáháni bánzolán bál bekanán,
agan daryáay durterén kerréá benendán,
10ódá ham tai dast mani rahshóniá kant o
tai rástén dast maná mohra dárit.
11Agan begwashán: “Béshakk tahári maná chéra dant o
rozhnái mani chapp o chágerdá shapé jórha bit,”
12tahári ham pa taw tahára nabit,
shap, chó róchá drapshit,
ke tahári ham pa taw chó rozhnáiá ent.
13Béshakk mani del o darun taw addh kortag
taw maná mátay lápá gwaptag.
14Tai shográ gerán ke man chó wassh o zébá jórh butagán,
tai kár hayrán kanók ant,
man eshiá sharra zánán.
15Mani haddh cha taw chér naatant
wahdé chér o andémén jágahá addh bayagá atán,
wahdé zeminay johlánkián man gwapag o yakjáh kanag bayagá atán.
16Tai chammán mani násarjamén ján dist,
mani zenday sajjahén róch tai ketábá nebeshtah kanag butant,
cha hamá wahdá pésar ke cha é róchán yakké ham nayátkagat.
17Oo Hodá! Tai hayál pa man chón bébahá ant,
eshán hesáb nést.
18Agan hesáb kanagesh belóthán,
cha rékáni dánagán géshter ant.
Wahdé ágaha bán,
angat gón taw án.
19Taw badkár bekoshténant, oo Hodá!
Cha man dur bét, oo hónwárán!
20É pa badén maksadé tai námá gerant,
tai helápá kopra kanant.
21Oo Hodáwand! Man cha áyán sakk bézár án ke cha taw naprata kanant o
cha áyán watá dura dárán ke tai helápá jáha janant.
22Ji haw! Man gón áyán sakk naprata kanán,
á mani dozhmen jórh butagant.
23Oo Hodá! Maná bechakkás o mani delá bezán,
maná bechakkás o mani paréshánián delgósh kan.
24Agan cha mani káréá delranj ay maná péshi dár o
karnigén ráhá#139:24 Karnigén ráh, bezán hamá ráh ke Hodáyá che karnán o pésar gisshéntag. maná rahshón bay.
Currently Selected:
Zabur 139: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
