Zabur 135
135
Hodáwanday námá benázénét
1 Hodáwandá benázénét, Halléluyá.
Hodáwanday námá benázénét,
oo Hodáwanday hezmatkárán, Hodáwandá benázénét,
2shomá sajjahén ke Hodáwanday lógá hezmata kanét,
may Hodáay lógay péshgáhá.
3Hodáwandá benázénét chéá ke Hodáwand nék ent,
pa sawt áiay námá benázénét ke delkassh ent.
4Chéá ke Hodáwandá Ákub pa wat gechén kortag,
Esráil, ke pa áiá ganjé bebit.
5Mana zánán ke Hodáwand mazan ent,
ke may Hodáwand cha sajjahén hodáyán master ent.
6Harché ke Hodáwand ásmánán o zeminá,
daryáyán o daryáyáni sajjahén johlánkián kanag belóthit, kant.
7Cha zeminay goddhi hadd o simsarán jambarán chesta kant,
gerókán gón hawrán rawána dant o
cha wati ambárán gwátá dhanná kárit.
8Hamáiá Mesray awali chokk jatant,
mardománi ham o dalwatáni ham.
9Oo Mesr! Tai nyámá wati nesháni o mójezahi rawán dátant,
Perawn o áiay sajjahén hezmatkáráni helápá.
10Bázén kawmé jati o
áyáni porwákén bádsháhi koshtant,
11Amuriáni bádsháh Sihón,
Báshánay bádsháh Óg o
Kanhánay sajjahén bádsháh o
12áyáni sardhagári mirásé kortant
mirasé pa wati mahluká, pa Esráilá.
13Oo Hodáwand! Tai nám tán abada mánit o
taw nasláni nasl yát kanaga bay, oo Hodáwand!
14Chéá ke Hodáwand wati mahlukay dadrasiá kant o
pa wati hezmatkárán rahma kant.
15Kawmáni “hodá” teláh o nograh ant,
ensánay dastay jórh kortagén bot.
16Dapesh per bale habar korta nakanant,
chammesh per bale dista nakanant,
17góshesh per bale eshkota nakanant
o dapá sáhesh mán nést.
18Harkas ke eshán jórha kant, hamesháni paymá bit o
harkas ke esháni sará tawkala kant ham anchosha bit.
19Oo Esráilián! Hodáwandá benázénét.
Oo Hárunay lóg! Hodáwandá benázénét.
20Oo Léwiay lóg! Hodáwandá benázénét.
Oo Hodátorsán! Hodáwandá benázénét.
21Cha Sahyuná Hodáwandá benázénét,
hamá ke Urshalimá jahmenend ent.
Hodáwandá benázénét, Halléluyá.
Currently Selected:
Zabur 135: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
