Mattá 24

Mazanén parasteshgáhay wayráni

(Markás 13:1–2; Luká 21:5–6)

1Wahdé Issá cha mazanén parasteshgáhá dar áyag o rawagá at, morid átkant ke áiay delgóshá parasteshgáhay némagá betarrénant. 2Issáyá gón áyán gwasht: “É sajjahén chizzán gendagá ét? Shomárá rásténa gwashán, yakk sengé ham domi sengay sará namánit, sajjahén próshag o karójaga#24:2 Karójag, bezán harójag, addh kortagén chizzéay próshag. bant.”

Áheri zamánagáni nesháni

(Markás 13:3–13; Luká 21:7–19)

3Hamá wahdá ke Issá Zaytunay Kóhay sará neshtagat, áiay morid ehwatá átkant o jostesh kort: “Márá begwash, é prosht o prósh kadéna bit o tai áyag o donyáay halásiay nesháni ché ent?” 4Issáyá passaw dátant: “Bechárét ke hechkas shomárá gomráh makant. 5Chéá ke bázéné mani námá kayt o gwashit: ‘Man hamá Masih án’ o bázénéá gomráha kant. 6Shomá jangáni tawárá eshkonét o jangáni hál somárá sara bit, bale delá tors mayárét. É chizz allamá bant, bale angat halásiay wahd nayátkag. 7Yakk kawmé dega kawméay helápá o yakk molké dega molkéay helápá páda kayt. Báz jágah kahta kapit o zeminchandha#24:7 Zeminchandh, bezán zeminjomb, zelzelah. bit. 8Bale é sajjahén tahná chellagiay dardáni bendát ent.

9Á wahdá shomárá gerant o ázára dayant o koshant. Donyáay sajjahén kawm mani námay sawabá cha shomá naprata kanant. 10Gorhá bázéné poshtá kenzit o cha ráhá thagalit. Bázéné yakdegará dróhit o cha yakdomiá naprata kant. 11Bázén drógén paygambaré jáha jant o bázénéá gomráha kant. 12Cha bérahbandiay gésh bayagá bázéné sardmehra bit. 13Bale hamá ke tán áherá bardáshta kant, á rakkit. 14Sajjahén donyáyá Hodáay bádsháhiay mestágay jár janaga bit ke pa sajjahén kawmán sháhedié bebit. Eshiá rand donyá halása bit.

Torsnákén wahd o jáwar

(Markás 13:14–23; Luká 21:20–24)

15Wahdé shomá á ‘palit o bérán kanókén bazzhenáká’#24:15 “Palit o bérán kanókén bazzhenák” yakk chizzé ke báyad ent mazanén parasteshgáhá mayayt. gendét ke pákén jágahá óshtátag, hamá ke Dányál nabiá áiay bárawá habar kortag,” – wánók sarpad bebit – 16“gorhá hamá ke Yahudiahá ant dém pa kóhán betachant. 17Harkas ke lógay sará ent, pa chizzéay zuragá lógá ér mayayt. 18Hamá ke dhagáray sará ent, pa wati kabáhay zuragá per matarrit. 19Á róchán, lápporrén janén o hamá ke chokka méchénant sakk bazzaga bant. 20Dwá bekanét ke shomay tachag zemestáná yá Shabbatay róchá mabit. 21Chéá ke á róchán anchén mosibaté kayt ke cha jahánay jórh bayagá tán é wahdá nayátkag o hechbara nayayt. 22Agan á sakkiáni róch kamter kanag mabuténant, hechkas narakketagat, bale gechén kortagénáni háterá á róch kamter kanaga bant.

23Á wahdá, agan kasé shomárá begwashit: ‘Bechár, Masih edá ent’ yá ‘Bechár, ódá ent,’ báwar makanét. 24Chéá ke drógén masih o drógén nabi jáha janant o mazanén nesháni o ajekkái kár pésha dárant. Wati sajjahén zórá janant ke gechén kortagénán ham gomráh bekanant, agan áyáni dastá but. 25Bechár, man cha pésará shomárá hál dayagá án. 26Gorhá agan mardom shomárá begwashant: ‘Bechár, gyábáná ent,’ ódá marawét, yá ke begwashant: ‘Lógay tah o tóki kóthián ent,’ báwar makanét. 27Chéá ke Ensánay Chokk anchén gerókéay paymá kayt ke cha ródarátká beger tán rónendá shahma kant o gendaga bit. 28Har jáh ke jóné bit, ódá dhundhwárén morg moccha bant.

Issáay per tarrag

(Markás 13:24–31; Luká 21:25–33)

29Á rócháni mosibatán o rand, anágat róch tahára bit, máha nadrapshit, estár cha ásmáná kapant o ásmáni zór o wák larzénaga bant. 30Hamé wahdá Ensánay Chokkay nesháni ásmáná záhera bit o donyáay sajjahén kawma gendant ke Ensánay Chokk gón mazanén wák o twán o shán o shawkaté jambaráni sará ent o kayt. Nun gréwant o mótka kárant. 31Gón karnáay#24:31 Karná sornáay dhawlén sázé. borzén tawárá wati préshtagán ráha dant ke áiay gechén kortagén mardomán cha donyá chárén némagán, bezán cha zeminay har kondhá tán ásmánay goddhi marz o simsarán, mocch o yakjáh bekanant.

32Nun cha enjiray drachká dars o sabakk begerét. Anchosh ke áiay thál narma bant o táka trokkant, shomá zánét ke garmág nazzikk ent. 33Hamé dhawlá, wahdé shomá é sajjahén chizzána gendét, zánét ke mani áyagay wahd nazzikk ent, darwázagay dapá ent. 34Shomárá rásténa gwashán, tánke é sajjahén chizz mabant, é nasl o padréch halása nabit. 35Ásmán o zemin gára bant, bale mani habar hechbar gára nabant.

Hozzhár o ágah bebét

(Markás 13:32–37; Luká 12:42–46; 17:26–30, 34–36)

36Hechkasa nazánt ke á róch o á sáhat kadéna kayt, na ásmánay préshtaga zánant o na Chokka zánt, tahná Peta zánt. 37Hamá dhawlá ke Nuhay zamánagá butag, Ensánay Chokkay áyagay róch ham anchosha bit. 38Chéá ke tuppáná pésar, mardomána wárt o nóshet o sáng o sura kort o é kárán tán hamá róchá dazgatth atant ke Nuh bójigá swár but. 39Tánke tuppán nayatk o mardomi nabortant, kassá nazánt ke ché bit. Ensánay Chokkay áyagay wahdá ham hamé dhawlá bit. 40Á wahdá, do mardén dhagáray sará bit, yakké baraga bit o yakké pasht géjaga#24:40 Pasht géjag, bezán nazurag, yalah dayag, gechén nakanag. bit. 41Do janén jenteray sará dánay droshagá bit, yakké baraga bit o yakké pasht géjaga bit. 42Paméshká hozzhár bét, chéá ke shomá nazánét ke shomay Hodáwand kojám róchá kayt. 43Shomá sharra zánét, agan lógay hodábondá bezántén ke dozz shapay kojám wahd o pásá kayt, gorhá ágah butagat o dozzi wati lógay janagá naeshtagat. 44Paméshká shomá tayár bebét, chéá ke Ensánay Chokk anchén wahdéá kayt ke shomá áiay entezár o wadárá#24:44 Wadár, bezán entezár, rahchári. nabét.

45Kay ent hamá amánatdár o dánáén hezmatkár ke wájah áiá wati é dega sajjahén hezmatkáráni master bekant tánke áyán pa wahd ward o warák bedant. 46Bahtáwar ent hamá hezmatkár ke wahdé wájaha kayt, áiá hamá káráni sará begendit. 47Shomárá rásténa gwashán, wájah hamá hezmatkárá wati sajjahén mál o hastiay kármastera kant. 48Bale agan hezmatkár harábéné bebit o wati delá begwashit ke mani wájah áyagá déra kant o 49wati hamkáráni latth o kotth kanagá bendát bekant o gón sharábián ward o nóshá bebit, 50áiay wájah anchén róch o sáhatéá kayt o rasit ke á nazánt o wadárá nabit. 51Gorhá wájah áiá sharriay sará latth o kottha kant o doru o dopóstén mardománi kerrá dawra dant. Ódá gréwag o peryát o zária bit.

Currently Selected:

Mattá 24: HPKB

Highlight

Compare

Copy