Mattá 10

Issáay dwázdahén kásed

(Markás 3:16–19; 6:8–11; Luká 6:14–16; 9:3–5; 10:4–12)

1Issáyá dwázdahén morid lótháéntant o jennáni kasshag o har dhawlén nájórhi o nádráhiáni dráh kanagay wák o ehtiári dátant. 2É dwázdahén kásedáni nám esh ant:

awali Shamun at ke Petros ham gwashaga bit,

padá Shamunay brát Andriás,

Zebdiay chokk Ákub,

Ákubay brát Yuhanná,

3Pilipos,

Bartulumá,

Tumá,

máliátgirén Mattá,

Halpiay chokk Ákub,

Taddá,

4sarmachárén Shamun#10:4 Bázéné gomána kant ke sarmacháray máná esh ent: Shamun Yahudiáni yakk dini syási párthiéay básk butag ke Rumiáni démá óshtátag. o

Yahudá Eskaryuti ke randá Issái dróhet#10:4 Dróhag, bezán hamráhdári nakanag, helápá rawag. o dozhmenáni dastá dát.

5Issáyá é dwázdahén kásed gón é hokmá rawán dátant: “Darkawmáni gwará marawét o á shahrán ke Sámeri jahmenend ant, ódá ham marawét. 6Bani Esráiliáni kerrá berawét ke gárén mésháni dhawlá ant. 7Har jáh ke rawét, é mestágay járá bejanét ke ásmáni bádsháhi átkag o sar butag. 8Nádráhán dráh bekanét, mordagán zendag bekanét, garray nádráhán dráh o palgár bekanét o jennán bekassét. Shomárá moptá rasetag, moptá bedayét. 9Wati lánkbandáni tahá sohr o nograh o ród mán makanét. 10Pa wati sapará lót#10:10 Lót sapari péleké ke chizzi mána kanant o kópagáia kanant. o turag#10:10 Turag, bezán pélek, lót, pélag. mazurét gón, gwaray jámag o páday chawatthán abéd, dega hecch mazurét gón, asá ham, chéá ke kár kanók wati rózigay hakdár ent. 11Wahdé shahr o métagéá rawét, láhekén mardomé shóház bekanét o tán roksata nabét, hamáiay kerrá bedárét. 12Lógéá ke rawét, lógay mardomán salám bedayét o pa á lógá émeni belóthét. 13Agan á lógay mardoma karzant, shomay nékdwáiay barkatá áyán émenia rasit o agan na, é émeni shomay jendá rasit. 14Agan kasé shomárá wasshátka nakant yá shomay habarán gósha nadárit, cha á lógá yá shahrá dar áét o dar áyagay wahdá wati pádáni danz o hákán hamódá bechandhét. 15Shomárá rásténa gwashán, jost o porsay róchá, á shahray sezá cha Sodum o Gomurahay sezáyá gantera bit.

Á ke sakkiána saggit, rakkit

(Markás 13:11–13; Luká 21:12–17)

16Bechár, man shomárá rawána dayán, bale shomá anchosha bét ke gorkáni nyámá pasa bant. Paméshká máray paymá hozzhár o kapódaray paymá béázár bebét. 17Cha mardomán hozzhár bét ke shomárá geráénant o hakdiwánána barant o wati kanisaháni tahá shomárá shallák o hayzarána janant. 18Mani sawabá shomá hákem o bádsháháni démá pésh kanaga bét ke áyáni o darkawmáni démá sháhedi bedayét. 19Wahdé shomá ódá baraga bét, paréshán mabét ke ‘Ché begwashén?’ yá ‘Chón passaw bedayén?’ chéá ódá shomárá harché ke gwashagi ent, hamá wahdá shomay delá dayaga bit. 20Parchá ke habar kanók shomá nabét, shomay ásmáni Petay Ruh cha shomay zobáná habara kant.

21Brát wati brátá dróhit o kóshárénit o pet wati chokká. Chokk wati pet o mátáni helápá páda káyant o áyána kóshárénant. 22Sajjahén mardom mani námay sawabá cha shomá naprata kanant. Bale hamá ke tán áherá sakkiána saggit,#10:22 Saggag, bezán bardásht kanag. á rakkit#10:22 Rakkag, bezán neját rasag, bacchag.. 23Wahdé shomárá yakk shahréá ázára dayant, betachét o dega shahréá berawét. Shomárá rásténa gwashán, cha ed o pésar ke shomá Esráilay sajjahén shahrán sar bebét, Ensánay Chokka kayt o rasit.

24Na shágerd cha wati ostádá mastera bit o na golám cha wati wájahá. 25Pa shágerdá haminchok bass ent ke wati ostáday paymá bebit o pa golámá haminchok bass ent ke wati wájahay paymá bebit. Lógay hodábondesh#10:25 Hodábond, bezán wájah, wáhond, málek, sáheb. ke Belzabul#10:25 Belzabul, bezán jennáni bádsháh Shaytán. gwashtag, gorhá lógay é dega mardomán allamá ganterén nám pera bandant.

Rásti chér dayaga nabit

(Luká 12:2–9)

26Cha é mardomán matorsét, chéá ke hecch choshén chérén chizzé nést ke záher mabit o hecch choshén rázé nést ke zánag mabit. 27Hamá habarán ke man gón shomá shapay taháriá gwashán, shomá á habarán róchay rozhnáiá begwashét, hamá habar ke shomay góshán halwat kanaga bant, lógáni sará sar kapét o á habaráni járá bejanét. 28Á ke badaná koshta kanant bale arwáhá koshta nakanant, cha áyán matorsét. Cha hamáiá betorsét ke arwáhá ham o badaná ham dózahá dawr dát o tabáh korta kant. 29Do jengol pa yakk paysahéá#10:29 Asligén Yunáni nebeshtánk gwashit: do “asariun.” Asariun, á zamánagay kasterén zarr at. bahá bit, bale angat cha áyán yakké ham bé shomay ásmáni Petay razáyá zeminá nakapit. 30Hodáyá shomay saray mudáni hesáb ham gón ent. 31Paméshká matorsét, shomay arzesh cha sajjahén jengolán#10:31 Asligén Yunáni nebeshtánk gwashit: “bázén jengolán”. géshter ent. 32Harkas ke mardománi démá mani gwáhiá dant, man ham wati ásmáni Petay démá áiay gwáhiá dayán o 33harkas ke mardománi démá mani gwáhiá nadant, man ham wati ásmáni Petay démá áiay gwáhiá nadayán.

Sohlay badalá jang

(Luká 12:51–53; 14:26–27; 17:33)

34Gomán makanét ke man átkagán ke donyáyá sohl o émeni byárán. Sohl o émeniay áragá nayátkagán, jangay áragá átkagán. 35Chéá ke man átkagán ke chokk petay helápá bóshtit, jenekk mátay helápá o neshár wassigay helápá, 36bezán harkasay dozhmen áiay lógay mardoma bant. 37Kasé ke wati petá yá mátá cha man géshter dósta dárit, á mani láhek o kasé ke wati bachakká yá jenekká cha man géshter dósta dárit, á ham mani láhek naent. 38Kasé ke wati salibá baddhá nakant o mani randá nayayt, á ham mani láhek naent. 39Harkas ke wati sáhay rakkénagay johdá kant, gária dant o harkas ke mani háterá wati sáhá nadra kant, rakkéniti.

40Harkas ke shomárá wasshátka kant o sharapa dant, maná sharapa dant o hamá ke maná sharapa dant, áiá ham sharapa dant ke maná ráhi dátag. 41Harkas ke paygambaréá paméshká wasshátka kant o sharapa dant ke Hodáay ráh dátagéné, áiá paygambaréay mozza rasit. Hamé dhawlá, harkas ke pahrézkárén mardoméá pa áiay pahrézkáriá sharapa dant, áiá ham pahrézkárén mardoméay mozza rasit. 42Harkas ke cha é kasánén moridán yakkéá paméshká tásé sardén áp ham bedant ke mani morid ent, man shomárá rásténa gwashán ke áiá wati mozza rasit.”

Currently Selected:

Mattá 10: HPKB

Highlight

Copy