Yuhanná 15
15
Anguray asligén drachk
1Man anguray asligén drachk án o mani Pet bágpán ent. 2Mani har thálé#15:2 Thál, bezán sháharh, sháhal. ke bara nayárit, Pet áiá goddhit#15:2 Goddhag, bezán sendag, borrag, dur kanag. o har thálé ke bara kárit, áiá tráshit o palgárit#15:2 Palgárit, bezán sáp o sallaha kant, bepólenga kant. ke géshter bar o samar byárit. 3Mani habaráni barkatá shomá cha pésará pák ét, hamá habar ke man gón shomá kortagant. 4Shomá mani del o daruná bemánét o man shomay del o daruná mánán. Agan thálé gón drachká hór mabit, bar áworta nakant. Hamé paymá shomá ham agan gón man hór mabét, bar áworta nakanét. 5Man anguray drachk án o shomá thál ét. Harkas ke mani del o daruná mánit o man áiaygá, á bázén bar o samaré kárit, chéá ke shomá cha man jetá hecch káré korta nakanét. 6Agan kasé mani del o daruná mamánit, sestagén tháléay dhawlá dawr dayaga bit o hoshka tarrit. Mardom hoshkén thálán moccha kanant o ásá dawra dayant o sóchant. 7Agan shomá mani del o daruná bemánét o mani habar shomay delá bemánant, harché ke lóthét belóthét, shomárá rasit. 8Mani Petay shán o shawkat gón hamé chizzá záhera bit ke shomá bázén bar o samaré kárét o mani morida bét.
9Hamá paymá ke Petá maná dóst dáshtag, man ham shomárá hamá paymá dóst dáshtag. Mani mehráni sáhegá bemánét. 10Agan mani hokmáni sará kár bekanét, mani mehráni sáhegá mánét, anchosh ke man wati Petay hokmáni sará kár kortag o áiay mehráni sáhegá neshtagán. 11Man é habar gón shomá paméshká kortant ke mani shádmáni shomay del o daruná benendit o shomay shádmáni kámel o sarjam bebit. 12Mani hokm esh ent ke shomá yakdegará dóst bedárét, hamá dhawlá ke man shomárá dóst dáshtag. 13Masterén mehr hamesh ent ke mardom wati sáhá pa dóstán nadr bekant. 14Agan shomá mani hokmáni sará kár bekanét, mani dóst ét. 15Cha ed o rand shomárá golám o bandaha nagwashán, chéá ke goláma nazánt wájah ché kant. Man shomárá wati dóst gwashtag chéá ke harché ke man cha Petá eshkotag, shomárá gwashtagon. 16Shomá maná gechén nakortag, man shomárá gechén kortag o dém dátag ke shomá berawét o bar o samar byárét, abadmánén bar o samar. Gorhá harché ke mani námay sará cha Petá belóthét, shomárá dant. 17Mani hokm pa shomá hamesh ent: Yakdegará dóst bedárét.
Donyáay naprat
18Agan donyá cha shomá naprata kant, bezánét ke pésará cha man naprati kortag. 19Agan shomá é donyái mardom buténét, donyáyá shomárá watigáni dhawlá dóst dáshtagat. Bale shomá donyái mardom naét o man shomárá cha é donyáyá dar chetag, paméshká donyá cha shomá naprata kant. 20Cha é habará béhayál mabét ke man gón shomá gwashtag: ‘Golám cha wájahá mastera nabit.’ Agan áyán maná ázár dátag, shomárá ham ázára dayant. Agan mani habaresh zortag, shomay habará ham zurant. 21Pa mani námaygi gón shomá é dhawlá kanant, chéá ke mani dém dayóká nazánant. 22Agan man mayátkénán o gón áyán habaron makortén, á bémayár atant. Bale nun áyán pa wati gonáhán hecch ozr o nimmóné nést. 23Harkas ke cha man naprata kant, cha mani Petá ham naprata kant. 24Agan áyáni démá man á kár makorténant ke dega kassá nakortagant, bémayár atant. Bale nun wa áyán é kár distagant o angat cha man ham naprata kanant o cha mani Petá ham. 25Áyáni Sharyatá nebeshtah ent ke ‘Moptá cha man napratesh kort.’#15:25 Zabur 35:19; 69:4. É dhawlá é habar rást o sarjam but. 26Bale wahdé shomay posht o panáha kayt, bezán rástiay Pákén Ruh ke áiay sarchammag Pet ent o man áiá cha Petay némagá déma dayán, á mani bárawá sháhedia dant. 27Shomá ham mani sháheda bét, chéá ke cha bendátá gón man gón butagét.
Currently Selected:
Yuhanná 15: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.