Pédáesh 49
49
Ákub wati chokkán barkata dant
1Ákubá wati chokk gwánk jat o gwashtant: “Yakjáh bét, man shomárá gwashán ke áyókén róchán ché bit.
2Yakjáh bét o gósh dárét,
oo Ákubay chokkán!
Wati pet Esráilay habarán gósh dárét.
3Oo Ruben! Taw mani awali chokk ay,
mani wák o twán ay,
mani mardánagiay awali neshán ay,
marháh o zóray shán ay.
4Chó ápá bélagám ay,
master nun taw namánay,
ke wati petay nepádán, mani gandalán sar kaptay o
palitet kortant.
5Shamun o Láwi brát ant,
zahmesh sheddati seláh ant.
6Hechbar esháni majlesá manendátán,
gón eshán hamdiwán mabátán,
ke cha wati hezhmá mardomesh koshtagant o
pa wati delwasshiá sándhesh#49:6 Sándh, bezán zórmandén narén gók yá gámésh. lang kortagant.
7Nálat bát esháni trondén hezhmá,
esháni berahmén kahrá.
Ákubay molká yakk yakkesha kanán,
Esráilay molká sheng o sháng.
8Oo Yahudá! Tai brát tará názénant,
tai dast dozhmenáni gotthá sakka bit,
tai petay chokk tai démá kóndhana kapant.
9Yahudá shéri gollorhé.
Oo mani chokk! Taw cha shekárán átkagay.
Yahudá chó sherá srápa kant,
chó mádagén shérá kamina kant.
Kai majál ent ke pádi bekant?
10Bádsháhi asá cha Yahudáay dastá narawt o
hákemiay dazlatth cha áiay pádáni démá dura nabit
tán hamá wahdá ke asligén wáhonda kayt o
kawm áiay parmánbardára bant.
11Á wati hará anguri drachkéá bandit o
korragá gechéni sháharhéá,
wati póshákán gón sharábá shódit,
wati pocchán gón anguray hóná.
12Áiay chamm cha sharábá sohrtera bant o
dantán cha shirá espétter.
13Zebulun tayábdapá jahmenenda bit,
pa bójigán bandené#49:13 Banden, bezán tayábay hamá jágah ke bójiga óshtant. bit o
simsari tán Sayduná sara bit.
14Issákár zórmandén haré
ke doén tangáni#49:14 Tang, bezán har yá oshteray báray yakk némagé. nyámá tachk ent.
15Gendit ke árámjáh sharr ent o zemin wassh,
wati baddhá pa bárá éra dant o
pa bigáriá tayára bit.
16Dán#49:16 Dán Ákubay chokkéay nám ent. Esráilay kabilahé bit o
pa wati mardomán ensápa kárit.
17Dán rahsará maré bit,
keshkay kashá syahmáré,
aspáni srombán#49:17 Sromb, bezán dalwatay páday panjag, som. dhanga jant
ke swár poshtoká bekapit.
18Oo Hodáwand! Wadárig án
ke taw berakkénay.
19Orosh kanók Jádá angerra kanant,
bale Jád áyáni pádáni punzáni sará birha#49:19 Birh, bezán trondén orosh, hamlah. bárt.
20Ásheray nagan charpa bit,
mahluká sháhi waráka dant.
21Naptáli ázát butagén áské#49:21 Ásk, bezán áhu, áhug. o
dhawldárén áskaloka kárit.
22Issop porsamarén anguré,
chammagay lambá baráwarén anguré.
Sháharhi, diwálán sara kapant.
23Tirkamán janókán pa zahrnáki áiay sará orosh kort o
pa badwáhi tiresh jat.
24Bale Issopay kamán barjáh mant o
báski mohr o mohkam atant,
Ákubay zórmandén Hodáay dastay barkatá,
Esráilay shepánkay barkatá,
Esráilay taláray barkatá,
25tai petay Hodáay barkatá, ke tará madata kant,
porwákén Hodáay barkatá, ke tará barkata dant.
Gón ásmánay barkatán, cha borzá,
gón johlánkiay barkatán, cha jahlá o
gón chokdán o gwaráni barkatán tará barkata dant.
26Tai petay barkat
cha abadi kóháni barkatán báláter ant,
cha kwahnén jompáni nyámatán géshter ant.
É sarjamá Issopay sará begwárátant,
Issopay péshánigay sará
ke wati brátáni shahzádag ent.
27Benyámin derrók o warókén gorké,
sohbán shekár éra bárt o
bégáhán áwár bahra kant.”
28É Esráilay dwázdahén kabilah atant o é hamá habar atant ke áyáni petá barkat dayagay wahdá gón áyán kortant. Har yakkéárá hamáiay hesábá barkati dát.
Ákubay mark
29Nun Ákubá wati chokk chó sój dátant: “Man gón wati mortagén mardomán hawár bayagi án. Maná mani pet o pirokáni kerrá, hamá gárá kabr kanét ke Eprun Hittiay dhagárá ent, 30hamá gárá ke Makpélahay dhagárá, Mamrehay nazzikká, Kanhánay molká ent o Ebráhémá cha Eprun Hittiá gón dhagárá hór bahá zort ke kabrestáné bekanti. 31Ódá Ebráhém o áiay jan Sárah kabr kanag butagant, Esák o áiay jan Rebekká kabr kanag butagant o man Lyáh ham hamódá kabr kortag. 32Dhagár o áiay tahay gár cha Hittián bahá zurag butagant.”
33Wahdé Ákubá wati chokkáni sój dayag halás kort, nepáday sará wati pádi tachk kortant, goddhi dami kasshet o gón wati mortagén mardomán hawár but.
Currently Selected:
Pédáesh 49: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
