Piiligu 47

1Lala jemani, Yisifu wa ti yeli naaba maa, “M ba ni m mabiisi, ni ba peeri ni naagi, a ni ba bunso zaa, yi Keenan paaligu ba Goosin tiŋgbaŋŋu niŋi pimparaŋa.” 2O nyisi o mabiisi banu zaali naaba maa yiya. 3Naaba maa boosi ba, “Bo tuma n na ya tumina?” Ba yeli u, “E gurunsi niŋini pekpagiriba, a maa ti ba dima.” 4Ka ba lee n yeli u, “Ti ya n ti zinni paa jemani yinni, a kpali kom maa ba kpeeŋu ga yi Keenan, ka e gurunsi peeri ka bindira. A zu, jaande ti e gurunsi ba zi Goosin tiŋgbaŋŋu niŋi.”

5Naaba maa yeli Yisifu, “E ba ni e mabiisi ta e saani, 6Yijipiti tiŋgbaŋŋu zaa bani e nuusi niŋi, ti e ba ni e mabiisi maa ba zi tiŋgbaŋŋu maa zimaŋŋa ziya. Ti ba zi Goosin tiŋgbaŋŋu niŋi. Ka e baŋŋi ba seesi n baŋŋi buŋkobiri yela nene, e ti ba nyaasira m gba buŋkobiri ŋa.”

7Niŋi n na, Yisifu mari o ba Yakubu ti wusi naaba maa. Ka Yakubu dibi n ti naaba maa. 8Naaba maa boosi u, “E yuma a la?”

9Yakubu yeli naaba maa, “Yumseesi ni ma n chaŋŋi n poli n jili ba koowa ni pisita. M yuma bi zoo, ka a ba toom. M ki tee n naag a bugisi m ba dima yuma yi ba cheni puwa.” 10Niŋi n na, Yakubu lee n maali n dibi n ti naaba maa, ka yi o saani.

11A zu, Yisifu ziili o ba ni o mabiisi yi Yijipiti, a ti ba bindaalim yi tiŋgbaŋŋu maa zimaŋŋa ziya, Ramasi paaligu, seema naaba maa n wusi. 12Yisifu lee n ti o ba ni o mabiisi maa ni o ba laanta dima zaa bindira, a maa seema so zaa biisi n sagi.

Yisifu ni kom maa yela

13Kom maa n daa ba niŋi ti niŋi aligaaya zu, bindirigu daa n lee ka seela zaa, Yijipiti ni Keenan niriba zaa daa n lee ka kpeeŋu, a kpali kom maa zu. 14Yisifu n koosira bindira maa, o dee Yijipiti ni Keenan dima ligiri zaa, a naag a wa ti ti naaba maa. 15Jemanso Yijipiti ni Keenan dima ligiri n baasi, Yijipiti dima zaa ta Yisifu saani ti yeli u, “Ti ti bindira, a daga ti n kpi e nufu a niŋi? Ti ligiri zaa baasiya.”

16Yisifu yeli ba, “Ya ligiri n baasi a, ya mari ya buŋkobiri ti tagira.” 17A zu, ba mari ba buŋkobiri chena Yisifu saani, o naa bindira maa tagira ba binduurigusi, peeri ni buusi, naagi ni buŋsi. Lala yumini maa, ba naa ba buŋkobiri zaa tagi bindira. 18Lala yumini maa n ti gaari, yumiso n lee n pa, ba ta o saani ti yeli u, “Ti ki tee n naa yamonsi sogi ti yidaana niŋi, ti ligiri zaa baasiya, ka ti buŋkobiri zaa loobi e toori, ti bi lee n mari, ti ti tiyidaana, ama ti maŋsi, a ni ti tiŋgbana. 19Wula zu n na ti ya n kpi e nufu niŋi, ti ni ti tiŋgbana zaa, Ti ni naa ti maŋsi ni ti tiŋgbana tagi bindira, ka ti ni ti tiŋgbana zaa, a loobi naaba maa toori. Ti ti bindira, ka ti da kpi, ka che tiŋgbaŋŋu yoo digili.” 20A la zu, Yisifu da Yijipiti tiŋgbaŋŋu maa zaa ti naaba maa. Yijipiti dima zaa nyem daa n koosi ba tiŋgbana, a ti Yisifu, a kpali, kom maa daa n ba kpeeŋu ga ti ba. Tiŋgbaŋŋu maa zaa loobi naaba maa toori. 21Yisifu naa niriba maa zaa loobi daaba, a za Yijipiti kigbunfu ŋa, a wa ti tuusi. 22Ama, o daa n bi da tiŋgbana maaniba la tiŋgbana, a kpali naaba maa daa n yi yoora ba ni ligiri, a puu n na ba daa n nyaara ba bindira. Bunso n ti ba bi koosi ba tiŋgbaŋŋu n na la. 23Yisifu yeli niriba maa, “Pimparaŋa ni da ya ni ya tiŋgbana ti naaba maa ŋa. Bumbura n na la, ya naa n wa ti buri. 24Ama, ka a ti niŋi, ya che, ya digili a bunu zu, naaba maa n su buluŋko zu. Bunaasi seesi n che la, ya naag a zaali ya ni ya pogiba ni biisi bindira ni bumbura.”

25Ba yeli u, “Ti yidaana, e moligi ti nyevuya. Ka a peri i, ti ni loobi naaba maa daaba.” 26A zu, Yisifu piili u maa zaaligu, a wara Yijipiti tiŋgbaŋŋu pelli, a ti paa zinni, o na tuminini, a maa bindira bunu daana niŋini naaba maa toori. Tiŋgbana maaniba la ko tiŋgbaŋŋu n daa bi niŋi naaba maa toori.

Bunso Yakubu n suusi

27A jemani, Izireel dima daa n zinni Yijipiti paaligu, Goosin tiŋgbaŋŋu niŋi. Ba nye kapete bini niŋi, ka dogi bidamta. 28Yakubu n daa n zi Yijipiti, o yuma pii ni ayapoin, o yuma zaa daa n ba ni koowa ni pisinaasi ni ayapoin. 29Yakubu kum jemani n daa n ti paagira, o booli o bii Yisifu ti yeli u, “Ka e ni sagi n ti ma, e naag e nuu tabi m kpiiligu tiŋini, ka digili noori maa e ni wusi ma kpabirisim ni yamonsitiri. Da pa ti pi ma yi Yijipiti. 30Ama ka m pa ti kpi, ya zi ma yi, a wa ti pi ma yi m ba dima noba see.” O yeli u, “M ni niŋi i seema e n yeli maa.” 31Yakubu yeli u, “Pe n ti ma.” Niŋi n na, Yisifu pe n ti u, ka Yakubu zulisi o zu o bindoori niŋi.

Currently Selected:

Piiligu 47: hag

Highlight

Copy

Compare