پولُسئے کاگد په رومیان 14

نزۆرێن باورمند

1نِزۆرێن باورمندا وشّاتک بکنێت و بزورێت و نگیشّتگێن هبرانی سرا گۆن آییا جێڑه مکنێت. 2یکّێئے ایمان آییا هر چیزّئے ورگا کِلّیت، بله دومی که ایمانی نِزۆر اِنت، تهنا سبزیَ وارت. 3آ که هر چیزَّ وارت، هما مردما کمتر سرپد مبیت که هر چیزَّ نئوارت و آ که وراکئے سرا پهرێزَ کنت، هماییئے کَزاوتا مکنت که هر وَراکَ وارت، چێا که هُدایا آ کبول کرتگ. 4تئو کئے ائے که دگرێئے#14‏:4 ادا ”دگرێئے“ مانا هُدا اِنت. هِزمتکارئے کزاوَتا کنئے و آییا اێرَ جنئے؟ آ، یا وتی جندئے واجهئے کِرّا وَشنامَ بیت یا بَنّام. بله بزان که وَشنامَ بیت، چێا که هُداوندا اے واک و توان هست که آییا وَشنام بکنت.

5کَسے یکّ رۆچێا چه دگه رۆچێا پاکترَ زانت و دگرێئے دلا سجّهێن رۆچ یکّ اَنت. هرکَس وتی دلئے هئیالانی سرا دلجم ببیت. 6آ کَس که یکّ رۆچێا هاسێن رۆچے سرپدَ بیت، په هُداوندئیگی چُشَ کنت. و آ کَس که وارت، په هُداوندئیگیَ وارت، پرچا که هُدائے شُگرا گیپت. و آ کَس که چه ورگا پهرێزَ کنت، په هُداوندئیگی چُشَ کنت و هُدائے شُگرا گیپت. 7چه ما هِ چکَس په وتیگی زِندگ نه‌اِنت و کَسّ په وتیگیَ نمریت. 8اگن زِندگ اێن په هُداوندا زِندگ اێن و اگن مرێن په هُداوندا مرێن. گڑا زِندگ اێن یا مرێن، هُداوندئیگ اێن. 9مَسیه پمێشکا مُرت و پدا زِندگ بوت که مُردگانی هم هُداوند ببیت و زِندگێنانی هم.

10نون تئو چێا وتی براتئے کَزاوتا کنئے؟ پرچا آییا چه وت کمتر سرپدَ بئے؟ چێا که جُست و پُرسئے رۆچا ما سجّهێن هُدائے بارگاها اۆشتێن. 11اَنچُش که نِبیسگ بوتگ:

”هُداوندَ گوَشیت: ’منا وتی زندئے سئوگند اِنت،

هر مردم منی دێما کۆنڈانَ کپیت،

هر یکّے دپِ وتَ منِ هُدایا مَنّیت.‘“ # 14‏:11 اِشئیا نَبیئے کتاب 45‏:23.

12گڑا چه ما هر یکّێا هُدائے دێما وتی هساب دئیگی اِنت.

13بیاێت چه اِد و رند یکدومیا اێرَ نجنێن. اِشیئے بدلا، شما مُهکمێن اراده بکنێت که آ دگه براتانی راها مان گیشّێنۆکێن سِنگ اێرَ نکنێن و راها بندَ نکنێن. 14من که هُداوندێن ایسّائے رندگیرے آن، منَ زانان و منا یکین اِنت که هچّ وراکئے جند هرام و ناپاک نه‌اِنت، بله اگن کَسے چیزّێا په وت ناپاک بزانت، په آییا ناپاک اِنت. 15اگن تئو وراکے بوَرئے و چه اِشیا تئیی برات دِلرنجَ ببیت، گڑا بزان چه اِد و رَند تئو مِهرئے راها رئوَگا نه‌ائے. گۆن وتی ورگا آ مردما تباه مکن که مَسیه په آییا مُرتگ. 16گڑا مردمان مۆکه مدئےاێت که هما چیزّانی بارئوا بدێن هبر بکننت که شمئے دلا شَرّ اَنت. 17چێا که هُدائے بادشاهی په ورگ و نۆشگ نه‌اِنت، په راستاوَری و اێمنی و شادِه اِنت که چه پاکێن روها رسیت. 18هرکَس که همے پئیما مَسیهئے هِزمتا کنت، هُدایا وَشّ و رَزا کنت و مردم هم چه آییا رزا بنت.

19گڑا بیاێت مُدام هما کارانی کنگئے رندا ببێن که دێم په سُهل و آرامی و یکدومیئے رُست و رُدۆما برنت. 20په وراکێا هُدائے کارا هراب مکن. بِلّ ترے سجّهێن وراک هِلار و پاک اَنت، بله هما وراکئے ورگ هراب اِنت که دگرێئے ٹَگل ورگئے سئوَبسازَ بیت. 21شَرتر اِنت که تو چه گۆشت، شراب#14‏:21 پاکێن کتابئے تها هر جاگه که شرابئے لبز آتکگ، اِشیئے مانا چه انگورا جۆڑ بوتگێن شراب اِنت که اِنگرێزیا ”wine“ گوشگَ بیت. یا دگه هر چیزّا پهرێز بکنئے که تئیی براتئے ٹَگل ورگئے سئوَبسازَ بیت. 22اے چیزّانی سرا وتی باورا وتیگ و هُدائے نیاما بدار، تئو بزانئے و هُدا بزانت. بهتاور اِنت هما که وتا آ چیزّانی سرا مئیاربارَ نکنت که آییئے دلا شَرّ اَنت. 23بله آ که وراکێئے سرا شَکّ اِنت، اگن بوارت مئیاربار اِنت، چێا که گۆن ایمانا نئوارتگی. هرچے که چه ایمانا مبیت، گناه اِنت.

Currently Selected:

پولُسئے کاگد په رومیان 14: HPKB

Highlight

Copy

Compare