زَبور 69
69
او هُدا! منا برَکّێن
په سازگر و وشآوازانی سالارا. ”سوسنانی“ تَرزئے سرا. داوودئے زَبور.
1او هُدا! منا برَکّێن
که آپ تان منی گَردنا اِنت.
2جُهلانکێن پوجگلان مێن بوتگان،
جاگهے که پادَ نهاۆشتیت.
جُهلانکێن آپانی تها کپتگان و
هار و لَهڑان منا اَنگِرّ کرتگ.
3چه بازێن پریاتان دمُن برتگ،
منی نُکّ هُشک اِنت و
چمّ وتی هُدائے ودارا تهار بوتگاَنت.
4آ که بێسئوَب چه من نپرتَ کننت
چه منی سرئے مودان گێشتر اَنت.
بازێنے منی گار کنگئے رندا اِنت
دژمن منی سرا درۆگێن بُهتامَ جننت.
چه من لۆٹنت هما چیزّان پِر بترّێنان
که من ندُزّتگاَنت.
5او هُدا! تئو زانئے که من اهمکی کرتگ،
منی گناه چه تئو چێر نهاَنت.
6او هُداوند، او لشکرانی هُداوند!
هما که تئیی وداریگ اَنت منی سئوَبا شرمندگ مباتنت.
او اِسراییلئے هُدا!
هما که تئیی شۆهازا اَنت منی سئوَبا رسوا مباتنت.
7چیا که په تئییگی منا سُبکَّ کننت و
منی دێم چه شرما پۆشێنگ بوتگ.
8براتانی چمّا بیگانگ بوتگان و
وتی ماتئے چُکّانی دێما دَرامدے.
9آ گئیرت که منا په هُدائے لۆگا هستاِنت،
منا جانسۆچَ کنت و باهێنیت و
تئیی رَد و بد کنۆکانی رَد و بد،
منی سرا کپتگاَنت.
10آ وهدا که اَرسُن رێتکگ و رۆچگُن داشتگ
سُبکّ کنگ بوتگان.
11آ وهدا که سوگی گُد و پۆشاکُن گوَرا کرتگاَنت،
اِشانی کِرّا بَتَلے بوتگان.
12شهرئے مسترانی گوَرا نام و دپ آن و
شرابیانی سئوت.
13بله من، او هُداوند، تئیی رَهمئے وهدا،
تئیی درگاها دْوا کنان.
او هُدا! چه وتی بازێن مِهر و وپاداریا،
گۆن دلجمێن رَکّێنگے پَسّئو بدئے.
14منا چه پوجگلان در کن،
تانکه اێر مبُڈّان.
چه نپرت کنۆکانی پنجگا منا برَکّێن و
چه جُهلانکێن آپان در کن.
15مئیل که هار منا اَنگِرّ کننت،
یانکه جُهلانکی منا اێر برنت،
یا منی سرا کَلّ وتی دپا ببندیت.
16او هُداوند! منی پسّئوا بدئے که تئیی رهمت باز اَنت،
وتی رهمتانی کِساس و هسابا، وتی دێما گۆن من بترّێن.
17دێما چه وتی هزمتکارا مپۆشێن،
په منی مَدَتا اشتاپ کن
که سکّ تَنگ آتکگان.
18نزّیک بیا و منا برَکّێن،
دژمنانی سئوَبا منا بمۆک.
19تئو آ سُبکّیان وتَ زانئے که منی سرا اَنت و
منی شرمساری و رسواییان،
منی سجّهێن دژمن تئیی دێما اَنت.
20سُبکّی و بےاِزّتیان منی دل پرۆشتگ و در منتگان،
رهمئے ودارا اتان و دستا نکپت،
گَموارێئے شۆهازا اتان و نرَسِت.
21وراکئے بدلا، منا جئورِش دات و
وهدے تنیگ بوتان ترُپشێن شرابِش نۆشێنت.
22پَرزۆنگِش دامے بات و
سُهل و اێمنیاِش تَلکے.
23چمِّش تهار بات و مگنداتنت و
سرێنِش درهگ و لرزگا بات.
24وتی هِژما آیانی سرا بگوارێن،
گَزبئے آچشا په آیان برسێن.
25لۆگ و جاگهاِش هراب و وئیران بات،
آیانی گِدانان هچکَس جهمنند مبات.
26چیا که هماییا آزارَ رسێننت که تئو جتگ و
هماییئے رنجانی هبرا کننت که تئو ٹَپّیگ کرتگ.
27مئیار په مئیارِش بِلَڈّ،
چه تئیی اَدلا بێبهر باتنت.
28چه زندگێنانی دپترا گار باتنت،
گۆن پهرێزکاران یکجاه نبیسگ مباتنت.
29بله نون من، سِتَم دیستگ و پدَرد آن.
او هُدا! تئیی نجات منا اێمن بدارات.
30هُدائے ناما گۆن سئوتَ نازێنان و
گۆن بازێن شُگرگزاریا شان و شئوکتیَ دئیان.
31اے چیزّ هُدایا چه گوسکێا گێشتر پسندَ بیت،
چه مزنکانٹ و مزنسرُمبێن گۆکێا.
32بێکِبر و دَربێش اے چیزّا که بگندنت گَل و شادانَ بنت.
او هُدائے شۆهاز کنۆکان! زندهدل باتێت.
33هُداوند نیازمندانی دْوایان گۆشَ داریت و
وتی بندیگێن مردمان بزّگ و وارَ نکنت.
34آسمان و زمین آییا بنازێننت،
دریا و آییئے تهئے سجّهێن سَهدار.
35چیا که هُدا سَهیونا نجاتَ دنت و
یَهودائے شهران نۆکسرا اڈَّ کنت.
کئوم اۆدا جهمنندَ بیت و
مُلکئے هَکّێن وارسَ بیت.
36مُلک آییئے هزمتکارانی پُشتپَدئے میراسَ بیت و
آییئے نامئے دۆست دارۆک اۆدا جهمنندَ بنت.
Currently Selected:
زَبور 69: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.
