زَبور 5
5
منا راستێن راها بر
په سازگر و وشآوازانی سالارا. گۆن نلی سازان. داوودئے زَبور.
1او هُداوند! منی گپّان گۆش بدار،
منی نالگان دلگۆش کن.
2او منی بادشاهێن هُدا! منی پریاتا بِشکن،
چیا که تئیی گوَرا دْوا کنان.
3او هُداوند! بامگواهان تئو منی تئوارا اِشکنئے،
بامگواهان، گۆن دَزبندی وتی واهگان پێشَ کنان و وداریگَ بان.
4تئو چُشێن هُداے نهائے که چه بدیا دِلوشّ ببئے،
بدی گۆن تئو جَلِّتَ نکنت.
5پُرکِبر و گُروناک تئیی دێما اۆشتاتَ نکنت و
چه سجّهێن بدکاران نپرتَ کنئے.
6درۆگبندان بێگواهَ کنئے،
هُداوند چه هۆنیگ و پرێبکاران نپرتَ کنت.
7بله من چه تئیی مِهرا تئیی لۆگا کایان و
چه تئیی تُرسا تئیی پرستشگاها کۆنڈانَ کپان.
8او هُداوند! په منی دژمنانی سئوَبا،
گۆن وتی اَدل و اِنساپا منا رهشۆنی بدئے و
وتی راها په من ساپ و تچک بکن.
9چیا که راستی آیانی زبانا نێست و
دل و دَرونِش تباهی اِنت و بسّ.
گُٹّ و گلواِش پْراهێن کَبرے و
وتی زبانا په چاپلوسی کارَ بندنت.
10او هُدا! اِشان مئیاربار هساب کن،
بِلّ که وتی شئورانی تها ببُڈّنت.
آیانی بازێن ناپرمانیانی سئوَبا، چه وت دورِش کن،
چیا که تئیی هلاپا شۆرشِش کرتگ.
11بله آ سجّهێن که تئیی باهۆٹ و مئیارَ بنت، شادمانی بکننت،
دایما ساز و زێمل بجننت.
آیان وتی ساهگئے چێرا نگهپانی بکن،
تان هرکَس که تئیی نامئے دۆستدار اِنت گۆن تئیی ناما شادان ببیت.
12اَلّما، تئو، او هُداوند، پهرێزکاران برکتَ دئیئے و
آیان گۆن وتی مِهر و رهمتا اِسپرئے پئیما نگهپانَ بئے!
Currently Selected:
زَبور 5: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.
