زَبور 44
44
او هُدا! مئے مَدَتا بیا
په سازگر و وشآوازانی سالارا. کۆرهئے چُکّانی شئیری گوَشتانک.
1او هُدا! ما وتی گۆشان اِشکتگ،
مئے پت و پیرێنان گوَشتگ
که آیانی زمانگا چۆنێن کارِت کرتگ،
گوَستگێن دئور و باریگان.
2تئو گۆن وتی دستا کئوم در کرتنت،
بله مئے پت و پیرێن سبز کرتنت.
کئومِت درُشتنت و
مئے پت و پیرێن شاهگانی بَکشاتنت.
3نه آیانی زهمانی زۆر اَت که مُلکِش گپت
نه که باسک و بازووان سۆبێن کرتنت.
اے تئیی راستێن دست اَت، تئیی باسک و
چِهرگئے رُژن،
چیا که آیانی سرا مهربان اتئے.
4او هُدا! تئو منی بادشاه ائے.
په آکوبا پێرۆزیئے هُکما بُرّ.
5چه تئیی نێمگا اِنت که دژمنان پدَ کنزێنێن،
چه تئیی ناما اِنت که اُرُش برۆکان لگتمالَ کنێن.
6من وتی کَمانئے سرا تئوکلَ نکنان و
زَهم منا سۆبێنَ نکنت.
7اے تئو ائے که مارا چه دژمنان رَکّێنتگ و
بدواه سرجهل کرتگاَنت.
8او هُدا! ما مُدام تئیی سرا پَهر کرتگ و
تان اَبد تئیی نامئے شُگرا گرێن. اۆشت...
9بله نون تئو مارا دئور داتگ و بےاِزّت کرتگ،
مئے لشکرئے همراهَ نبئے.
10مارا دژمنانی دێما پدَ کنزێنئے و
بدواه مارا آوارَ#44:10 آوار، بزان جنگئے تها لُٹّ و پُل کرتگێن مال و مردم. جننت.
11مارا کُربانیگێن پسانی پئیما په کُشگا اِشتگِت و
کئومانی نیاما شِنگ و شانگ کرتگ.
12تئو وتی کئوم اَرزانا بها کرتگ و
چه آیانی بهایا سوتّے نبُرتگ.
13مارا همساهگانی ریشکندی کرتگ و
کِرّ و گوَرئے مردمانی کلاگی.
14تئو مارا کئومانی نیاما ٹِکّ و نشان کرتگ،
درکئوم سرا چَنڈێننت و مسکرا کننت.
15سجّهێن رۆچا گۆن سرجَهلیا دێم په دێم آن و
شرما منی دێم پۆشتگ،
16چه بَد و رَد گوَشۆکانی شگانا،
چه دژمن و بێرگیرئے دستا.
17اے سجّهێن مئے سرا آتکگاَنت،
بله اَنگت ما ترا نشمُشتگ و
گۆن تئیی اَهدا ناراست نبوتگێن.
18مئے دل چه تئو پِر نترّتگ و
پاد و گام چه تئیی راها در نبوتگ.
19بله تئو مارا پرۆش داتگ و گۆن وهشیێن هئیوانان یکجاه کرتگ،
گۆن تهارترێن تهارۆکیا پۆشێنتگ.
20اگن ما وتی هُدائے نام بشمشتێن،
یا دست په بیگانگێن هُداێا بُرز کرتێن،
21هُدایا نزانتگاَت؟
چیا که آ چه دلئے راز و اسراران سرپد اِنت.
22بله ما تئیی سئوَبا سجّهێن رۆچا گۆن مرکا دێم په دێم اێن و
کُربانیگێن پسانی پئیما هساب آرگَ بێن.
23او هُداوند! آگاه بئے. په چے واب ائے؟
جاه جن و مارا تان اَبد یله مکن.
24چیا وتی دێما چێرَ دئیئے و
په چے مئے بزّگی و لگتمالیا شمۆشئے؟
25چیا که ما هاکا دێم په چێر اێن و
لاپ زمینا لچّتگ،
26پاد آ و مئے مَدَتا بیا،
وتی مِهرئے سئوَبا مارا بمۆک#44:26 مۆکگ، بزان په کَسێئے جانئے رَکّێنگا گرانێن کیمّتے دئیگ، پارسیا ”بازخرید“. و برَکّێن.
Currently Selected:
زَبور 44: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.
