زَبور 25
25
راها منا پێش بدار
داوودئے زَبور.
1او هُداوند! من په دل و جان دێم په تئو کایان.
2او منی هُدا! تئیی سرا تئوکلَ کنان،
مئیل که پَشَل و شرمندگ ببان و
دژمن منی سرا بالادست ببنت.
3جی هئو! آ که تئیی سرا اۆست و امێتَ کنت،
هچبر سرجَهل ببنت.
آ که بے سئوَبا بێوپاییَ کننت
سرجَهل و شرمندگَ بنت.
4او هُداوند! راها منا پێش دار و
وتی کِشکا منا تالیم دئے.
5دێم په وتی راستیا منا رهشۆن بئے و سَبک بدئے،
چیا که تئو منی رَکّێنۆکێن هُدا ائے و
سجّهێن رۆچا تئیی اِنتزار و ودارا آن.
6او هُداوند! وتی رهمت و مِهرا یات کن،
چیا که آ چه اَزلا هستاَنت.
7منی ورناییئے ناپرمانی و گناهان یات مکن،
وتی مِهرئے کساسا منا یات کن
که تئو نێک ائے، او هُداوند!
8هُداوند نێک و راست اِنت،
پمێشکا گُنهکاران راها سۆجَ دنت.
9بێکِبر و دربێشێن مردمان راستیئے راها رهشۆنیَ دنت،
و وتی کشکا آیان پێشَ داریت.
10هما که هُداوندئے اَهد و پئیمانئے سرا اۆشتنت،
آییئے سجّهێن راه په آیان چه مِهر و وپایا سررێچ اَنت.
11او هُداوند! په وتی نامئیگی منی گناه و مئیاران ببَکش،
چیا که مزن اَنت.
12کئے اِنت هما که په دل هُداتُرس ببیت؟
هُداوند آییا هما راستێن راها سۆجَ دنت که باید اِنت گچێنی بکننت.
13آ وتی رۆچان په سێری و هزگاریَ گوازێنیت و
آییئے چُکّ و اۆبادگ زمینئے میراس برۆکَ بنت.
14هُداوند وتی دلئے راز و رمزان گۆن هداتُرسان درشانَ کنت،
وتی اَهد و پئیمانا په آیان پَجّارێنیت.
15منی چمّ مُدام دێم په هُداوندا اَنت،
چیا که هما اِنت که منی پادان چه داما آزاتَ کنت.
16وتی دێما گۆن من بکن و منا رهمت ببَکش،
چیا که من بێکَس و سِتَم دیستگێنے آن.
17منی دلئے سَکّی و سۆری باز اَنت،
منا چه پرێشانیا برَکّێن.
18منی رنج و سکّیان بچار و
سجّهێن گناهانُن ببَکش.
19منی دژمنان بچار که چینچُک باز اَنت و
چه من چۆن په کَهر نپرتَ کننت.
20منی زِندا بپهرێز و برَکّێن،
مئیل که شرمندگ ببان،
چیا که تئیی باهۆٹ و مئیار آن.
21تچکی و راستی منی نگهپان بات،
چیا که منی اُمێت تئو ائے.
22او هُدا! اِسراییلا چه سجّهێن سکّی و سۆریان برَکّێن.
Currently Selected:
زَبور 25: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.
