زَبور 10
10
چیا وتا چێرَ دئیئے؟
1او هُداوند! په چے دور اۆشتاتگئے؟
چیا وتا سکّێن ساهتان چێرَ دئیئے؟
2بدکار گۆن کِبر نِزۆرێنان شکارَ کنت،
بِلّ که وتی پندلانی داما گرپتار ببیت.
3چیا که بدکارا وتی دلئے واهگانی سرا پَهر اِنت،
لالچ کنۆکان برکتَ دنت و هُداوندا بد و ردَ گوَشیت.
4بدکار مان وتی کِبر و گُروناکیا گوَشیت: ”هُدا در گێتکَ نکنت“،
آییئے سجّهێن پگر و هئیال اِش اِنت که ”هُداے نێست“.
5وتی راها مُدام کامیاب و سۆبێن#10:5 سۆبێن، بزان پێرۆز، کامیاب. اِنت،
تئیی شئور و دادرسی چه آییئے چمّا دور اَنت،
وتی سجّهێن دژمنان ریشکندَ کنت.
6وتی دلا گوَشیت: ”هچبر چه وتی جاها سُرێنگ و جُمبێنگَ نبان
نَسلانی نَسل چه کزا و بلاهان دورَ بان.“
7دپ و زبانی چه نالت و پرێب و سِتما پُرّ اِنت،
آییئے زبانئے چێرا پِتنه و شِرکاریا کُدام بستگ.
8مێتگ و آبادیانی کمینا#10:8 کمین، بزان سراپ. نندیت،
چێر و پناهێن جاهان بێگُناهانَ کُشیت،
چێرکایی بێوسانی شکار کنگئے شۆهازا اِنت.
9شێرئے پئیما وتی کمینا ودارَ کنت،
ودارَ کنت و نِزۆر و ناتوانان وتی پنجگا کاریت،
پنجگا کاریت و داما دئورَ دنت.
10آییئے شکار، لگتمال و زار و وارَ بنت،
آییئے دستا گار و گُمسارَ بنت.
11وتی دلا گوَشیت: ”هُدایا شَمُشتگ
دێمی پۆشێنتگ و هچبرَ نگندیت.“
12او هُداوند! پاد آ. او هُدا! وتی دستا شهار.
بزّگێنان مشمۆش.
13بدکار په چے هُدایا بد و ردَ گوَشیت؟
چیا وتی دلا گوَشیت:
”هُدا در گێتکَ نکنت“؟
14بله اَلبت تئو گندئے. سَکّی و سۆریانَ گندئے،
تان کار و اِهتیارا وتی دستا بدارئے.
بزّگ و بێچارگ وتا تئیی سپردگَ کننت،
چۆرئوانی مَدَت کنۆک تئو ائے.
15شِرّ و بدکارانی باسکا بپرۆش،
آیانی شرارتئے هسابا بگر،
هما کارانی هسابا هم که آییا گوَشتگ: ”هُدا در گێتکَ نکنت“.
16هُداوند اَبد تان اَبد بادشاه اِنت،
کئوم چه آییئے سرڈگارا گار و گُمسارَ بنت.
17او هُداوند! تئو بزّگانی واهگان گۆشَ دارئے،
آیان دلبڈیَ دئیئے و هبرانِش اِشکنئے.
18چۆرئو و سِتم دیستگێنانی دادرسیا کنئے
تانکه اے هاکیێن انسان دگه برے تُرس و دِهشَت مپرّێننت.
Currently Selected:
زَبور 10: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.
