مَرکاس 5

جِنّیێئے دْرهبکشی

(مَتّا 8‏:28‏–34؛ لوکا 8‏:26‏–39)

1ایسّا گۆن وتی مُریدان جَلیلئے مَزَن‌گوَرمئے آ دستا، گِراسیانی#5‏:1 لهتێن دَزنبشتا آتکگ: ”گَداریانی“. مُلکا رَست. 2وهدے ایسّا چه بۆجیگا اێر آتک، هما دمانا مردے چه کبرستانا در آتک و گۆن ایسّایا دُچار کپت.#5‏:2 دُچار کپگ، بزان ڈیکّ ورگ، یکدگرا گِندگ. مردا جِنّے پِر اَت. 3اے مرد کبرستانا جَهمنند اَت و همینچُک زۆری مان اَت که نون هچکَسا آییئے دست و پاد گۆن زمزیلان هم بَستَ نکرتنت. 4مردمان باز رَندا بستگ‌اَت، بله آییا زمزیل پرۆشتگ‌اَتنت و هچکَسا آییئے گِر و دارئے زۆر و توان نێست‌اَت. 5شپ و رۆچ کبرستان و کۆهان اَت، کوکّار و چیهالیَ جت و وتا گۆن ڈۆک و سِنگان ٹَپّیگیَ کرت. 6اَنچۆ که آییا ایسّا چه دورا دیست، تچانا آتک و ایسّائے پادان کپت، 7کوکّار کرت و گوَشتی: ”ایسّا، او بُرزێن ارشئے هُدائے چُکّ! ترا گۆن من چِه کار اِنت؟ ترا هُدائے سئوگند اِنت، منا اَزاب مدئے.“ 8اے هبری پمێشکا کرت که ایسّایا گوَشتگ‌اَت: ”او پلیتێن روه! اے مردا یله دئے.“ 9ایسّایا چه آییا جُست کرت: ”تئیی نام کئے اِنت؟“ آییا پَسّئو دات: ”منی نام ’لشکر‘ اِنت، که ما باز اێن.“ 10ایسّائے کِرّا باز پریاتی کرت: ”مارا چه اے مُلکا در مکن.“

11همۆدا، کُهدێما هوکّانی مزنێن رمگے چَرگا اَت. 12جِنّان پریات کرت: ”مارا اے هوکّانی جسما راه دئے.“ 13ایسّایا اجازت داتنت. گڑا، جِنّ چه مردا در آتک و هوکّانی جسما پُترتنت. رمگا کساس دو هزار هوکّ اَتنت که چه کُهدێما جَهلگا تَچان بوتنت و گوَرما کپت و مُرتنت 14هوکّانی چارێنۆک تچانا شُتنت و شهر و مێتَگِش هال داتنت. وهدے مردمان اِشکت، آتکنت که چَمِّ وت بگندنت که چے بوتگ. 15وهدے ایسّائے گوَرا آتکنت، دیستِش که هما مرد که پێسرا جِنّانی لشکرا گنۆک کرتگ‌اَت، پُچّ و پۆشاکی گوَرا و هۆش و سار اِنت و نِشتگ. نون تُرسِش دلا کپت. 16چَمدیستێن شاهدان کِسّه کرت که جِنّی گنۆک چۆن سار بوتگ و هوکّانی کسّه‌اِش هم آورت. 17گڑا مردمان گۆن ایسّایا دَزبندی کرت که مئے مُلکا یله دئے.

18وهدے ایسّا بۆجیگا سوار بئیگا اَت، هما مرد که پێسرا جِنّان گپتگ‌اَت، آتک و دَزبندی‌ای کرت که منا بر گۆن. 19بله ایسّایا اجازت ندات و گوَشتی: ”لۆگا برئو و وتی مردمان هال دئے که هُداوندا په تئو چۆنێن کارے کرتگ و تئیی سرا چۆن رهمی کرتگ.“ 20گڑا، آ مرد شت و دِکاپولیسئے#5‏:20 دِکاپولیس، بزان ده شهر. گِراسا چه اے شهران یکّے اَت. مُلکئے مردمی هال داتنت که ایسّایا په من چۆنێن کارے کرتگ. سجّهێن مهلوک هئیران بوت.

ایسّا جنێنێا دْراه و جنکّێا زندگَ کنت

(مَتّا 9‏:18‏–26؛ لوکا 8‏:40‏–56)

21ایسّا که پدا بۆجیگا سوار بوت و گوَرمئے آ دستا شت. گوَرمئے لَمبا مردمانی مزنێن رُمبے آییئے چپّ و چاگردا مُچّ بوت. 22یائِروس نامێن مردے که کَنیسَهئے مستر اَت، همۆدا آتک و گۆن ایسّائے گندگا، آییئے پادان کپت. 23آییا گۆن ایسّایا باز رندا دَزبندی کرت: ”منی جنکّ مَرکیگ اِنت. بیا و وتی دستا آییئے سرا پِر مُش که دْراه ببیت و زندگ بمانیت.“ 24ایسّا آییئے همراه بوت و شت. مردمانی مزنێن رُمبے ایسّائے چپّ و چاگردا مُچّ بوت و شت گۆن.

25اے رُمبا جنێنے گۆن اَت. دوازده سال اَت که آییئے هۆن پَچ اَت. 26بازێن داکترێا شُتگ‌اَت، بله اِلاجئے بدلا دردی گێش بوتگ‌اَتنت و سجّهێن زَرّ و مالی هم باهێنتگ‌اَتنت.#5‏:26 باهێنگ، بزان گار دئیگ، چه دست دئیگ. دْراه بئیگئے بدلا گَنتر بئیان اَت. 27ایسّائے بارئوا اِشکتگ‌اَتی و نون مردمانی مُچّیئے تها چه پُشتی نێمگا آتک و ایسّائے کَباهی#5‏:27 کَباه، بزان جُبّه که پَشکئے سربرا گوَرا کننتی. دست جت. 28دلجم اَت که اگن ایسّائے پُچّان هم دست پِر بکنان، دْراهَ بان. 29انچۆ که ایسّائے کباهی دست جت، آییئے هۆن بند بوت و چه وتی جسمئے هالتا زانتی که من دْراه بوتان. 30ایسّایا هما دَمانا زانت که چه من زۆرے در آتک. پشتا، مُچّیئے نێمگا چَکّی تَرّێنت و جُستی کرت: ”کئیا منی پُچّ دست جتنت؟“ 31مُریدان گوَشت: ”تئو گِندگا ائے، مردمان ترا چۆن اَنگِرّ#5‏:31 اَنگِرّ کنگ، بزان چپّ و چاگردا گِرگ، اربی و پارسیا ”محاصره“ کرتگ. اَنگت جُستا ائے که کئیا منی پُچّ دست جتگ‌اَنت؟“ 32ایسّا اَنگت چارێن نێمگان چارگا اَت که اے کار کئیا کرت. 33جنێنا زانت که گۆن من چے بوت، په تُرس و لَرز آتک و ایسّائے پادان کپت و سجّهێن هبری په راستی کرتنت. 34ایسّایا گوَشت: ”منی جنکّ! تئیی ایمانا ترا دْراه کرت. برئو په سلامتی. چه وتی ناجۆڑیا دْراه بئے.“

35ایسّا اَنگت هبرا اَت که چه یائِروسئے لۆگا مردمے آتک و هالی دات: ”تئیی جنکّ مُرتگ. نون اُستادا چێا دلسیاهَ کنئے؟“ 36ایسّایا آییئے هبر اِشکت، گۆن کَنیسَهئے مسترا گوَشتی: ”متُرس، بسّ باوَر کن.“ 37ایسّایا، پِتْرُس، آکوب و آکوبئے برات یوهَنّایا اَبێد دگه کسّ وتی همراه بئیَگا نه‌اِشت. 38وهدے کَنیسَهئے مسترئے لۆگا آتکنت، ایسّایا دیست که کوکّار و واهی اِنت، مردم گرێوَگ و مۆتک#5‏:38 مۆتک: په مُردگا پِریات و زاری، گرێوگ و زار جَنَگ. آرگا اَنت. 39تها که آتک، گوَشتی: ”چێا گرێوَگ و کوکّارا اێت؟ چُکّ نمُرتگ، واب اِنت.“ 40آیان ایسّائے سرا کَندِت، بله ایسّایا سجّهێن مردم در کرتنت و جنکّئے پت و مات و وتی همراهێن مُریدی زرتنت و هما بانا#5‏:40 بان، بزان کۆٹی، کَمرَه، اۆتاک. شت که جنکّ اۆدا اێر اَت. 41ایسّایا جنکّئے دست گپت و گوَشتی: ”تَلیتا! کُم.“ بزان: جنکُّک! پاد آ. 42جنکّ که اُمری دوازده سال اَت، هما دمانا پاد آتک و تَرّگا لگِّت. آ مردم که گۆن اَتنت، سکّ هئیران و هبکّه بوتنت. 43ایسّایا کڈّن کرتنت که کسّا هال مدئیێت و پدا گوَشتی که جنکّا وراک بدئیێت.

Currently Selected:

مَرکاس 5: HPKB

Highlight

Compare

Copy