مَتّا 14

پاکشۆدی دئیۆکێن یَهیائے کُشگ

(مَرکاس 6‏:14‏–29؛ لوکا 9‏:7‏–9)

1همے رۆچان جَلیلئے هاکم هیرودیسا ایسّائے نام و تئوار اِشکُت. 2گڑا گۆن وتی هِزمتکاران گوَشتی که اے هما پاکشۆدی دئیۆکێن یَهیا اِنت که چه مُردگان زندگ بوتگ، پمێشکا چُشێن اَجکّایی کار#14‏:2 اَجِکّایی کار، بزان مۆجزه، هئیران کنۆکێن کار. و مۆجزهَ کنت. 3گپّ اِش اِنت که هیرودیسا، وتی جَن هیرودیَهئے سئوَبا که پێسرا آییئے برات پیلیپُسئے جَن اَت، یَهیا گپتگ و زندانا بند کرتگ‌اَت. 4چێا که یَهیایا گۆن هیرودیسا باز برا گوَشتگ‌اَت که هیرودیَهئے گرگ په تئو رئوا نه‌اِنت. 5هیرودیسا لۆٹت که یَهیایا بکشیت بله چه مردمانَ تُرستی، چێا که مردمانی باور اِش اَت که یَهیا پئیگمبرے.

6وهدے هیرودیسئے سالگِره بوت، هیرودیَهئے جِنکّا مهمانانی دێما ناچ و سُهبت کرت. هیرودیسا اے ناچ و سُهبت سکّ وَشّ بوت، 7سئوگندی وارت و گۆن جنکّا لَبزی کرت: ”هرچے لۆٹئے بلۆٹ، ترا دئیان.“ 8جنکّا گۆن ماتا شئور و سَلاه کرت و گوَشت: ”پاکشۆدی دئیۆکێن یَهیائے سرا تَبَکّێئے تها بکن و همِدا بیار و منا بدئے.“ 9هیرودیس سَکّ پرێشان بوت بله وتی سئوگند و مهمانانی سئوَبا هُکمی دات که جنکّئے اے واهگ پورَه کنگ ببیت. 10اے ڈئولا، زندانا یَهیائے سری بُرّاێنت. 11آییئے سرِش تَبَکّێئے تها کرت و جنکّارا داتِش و آییا وتی ماتئے کِرّا برت. 12یَهیائے مُرید آتکنت و آییئے جۆنِش برت و کَبر و کَپن کرت. رندا شتنت و ایسّااِش هال دات.

پنچ هزار مردما وراک دئیگ

(مَرکاس 6‏:32‏–44؛ لوکا 9‏:10‏–17؛ یوهَنّا 6‏:1‏–13)

13اے هبرئے اِشکنگا رند، ایسّا گۆن مُریدان بۆجیگێا سوار بوت و دور و گِستاێن#14‏:13 گِستا، بزان دور، یکّ کِرّ، جتا. جاهێا شت که تهنا ببنت. وهدے مردم سهیگ بوتنت، چه شهران پئیادکا آییئے رَندا راه گپتنت. 14ایسّا که چه بۆجیگا اێر کپت و مردمانی مزنێن مُچّی‌ای دیست، آیانی سرا بَزّگی بوت و آیانی نادْراهێن مردمی دْراه کرتنت. 15نون بێوَهد اَت. مُرید آییئے کِرّا آتکنت و گوَشتِش: ”اے دور و گِستاێن جاگهے و نون بێوَهد اِنت. مردمان راه دئے که مێتگ و بازارانَ رئونت و په وت وَرد و وراکے بها گرنت.“ 16بله ایسّایا گوَشت: ”زلورت نه‌اِنت که برئونت. شما وت آیان وراک بدئیێت.“ 17گوَشتِش: ”اِدا مئے کِرّا پنچ نگن و دو ماهیگا ابێد دگه هِچّ نێست.“ 18گوَشتی: ”منی کِرّا بیارێتِش.“ 19مردمی هُکم داتنت که کاهانی سرا بنندێت. نون پنچێن نگن و دوێن ماهیگی زرتنت، آسمانئے نێمگا چارتی و هُدائے شُگری گپت، نگنی چُنڈ چُنڈ کرت و مُریدانی دستا داتنت. مُریدان نگن مردمانی سرا بهر کرتنت. 20سجّهێنان سێرا وارت. چه سر آتکگێن چُنڈان دوازده سَپْتِش#14‏:20 سَپْت: سَبَد، مزنێن چَلّی، ساچی. پُرّ کرت. 21اَبێد چه جنێن و چُکّان، کِساس پنچ هزار مردێنا نان وارت.

ایسّا آپئے سرا تَرّیت

(مَرکاس 6‏:45‏–52؛ یوهَنّا 6‏:15‏–21)

22ایسّایا هما دمانا مُرید پرمان دات و گوَشتنت: ”من اے مردمان رُکستَ کنان. تان آ وهدا شما بۆجیگا سوار بێت و چه من پێسر گوَرمئے آ دستا برئوێت.“ 23مردمانی رُکست کنگا رند، تهنا بوت و په دْوا کنگا کۆها سر کپت. نون بێوَهد اَت و آ تهنا اَت. 24اے وهدی، بۆجیگ چه هُشکیا دور شتگ‌اَت و تْرند و تێزێن گوات و مستێن مئوج و چئولان گپتگ‌اَت. 25شپئے چارمی پاسا، ایسّا آپئے سرا گام جنان بوت و دێم په مُریدان آتک. 26وهدے مُریدان دیست که ایسّا آپئے سرا گام جنان اِنت، دلتّرَک بوتنت. چه تُرسا کوکّارِش کرت و گوَشتِش: ”جِنّے!“ 27بله ایسّایا دمانا گوَشت: ”دِلا ڈَڈّ کنێت. متُرسێت، اے من آن.“

28پِتْرُسا گوَشت: ”او هُداوند! اگن اے تئو ائے، گڑا منا هُکم بدئے که من هم آپئے سرا تئیی کِرّا بیایان.“ 29ایسّایا گوَشت: ”بیا!“ گڑا پِتْرُس چه بۆجیگا اێر آتک و آپئے سرا ایسّائے نێمگا رئوگا لگّت. 30بله چه گواتئے تْرندیا تُرستی و بُکَّگا لگّت. کوکّاری کرت: ”او هُداوند! منا برَکّێن.“ 31هما دمانا ایسّایا دست شهار دات، آ گپت و گوَشتی: ”او کَمباور! تئو چێا شکّ کرت؟“ 32وهدے بۆجیگا سر کپتنت، گوات کپت و آرام بوت. 33هما که بۆجیگا اَتنت، ایسّااِش ستا و سنا کنانا گوَشت: ”بێشکّ تئو هُدائے چُکّ ائے.“

نادْراهانی دْرهبکشی

(مَرکاس 6‏:53‏–56)

34گوَرمِش گوازێنت و گِنیسارِتئے مێتگا شتنت. 35اۆدئے مردمان ایسّا پَجّاه آورت، کَش و گوَرئے سجّهێن هَند و دَمگئے مردمِش هال داتنت و سجّهێن نادْراهِش آییئے کِرّا آورتنت. 36دَزبندی‌اِش کرت: ”مارا بِلّ که بسّ تئیی کباهئے لَمبا دستَ جنێن.“ همینچُک مردما که دست جت، وشّ و دْراه بوتنت.

Currently Selected:

مَتّا 14: HPKB

Highlight

Copy