دَرگوَز 34

نۆکێن وانِک

1هُداوندا گۆن موسّایا گوَشت: ”پێسریگێن وانِکانی پئیمێن دو وانِک بتراش و من آیانی سرا هما لبزانَ نبیسان که پێسریگێنانی سرا نبشته اَتنت، هما وانِک که تئو پرۆشتنت. 2سباها وتا گیشّێن. سُهبا سینائے کۆها سَر کَپ و وتا اۆدا کۆهئے ٹُلّا منی بارگاها بیار و سَر کن. 3کَسّ گۆن تئو کۆها سر مکپیت و کۆهئے سرا هچّ جاگه یکّ مردمے هم گِندگ مبیت. رمگ و گۆرُم هم کۆهئے دێما مچَرنت.“

4موسّایا پێسری وانِکانی پئیمێن دو وانِک تراشت و هما پئیما که هُداوندا هُکم داتگ‌اَت، سباها ماهلّه سینائے کۆها سر کپت. دوێن وانِک آییئے دستا اَتنت. 5هُداوند جمبرئے تها بوت و اێر آتک و موسّائے کِرّا اۆشتات و وتی نامئے جاری جت که من یَهوِه#34‏:5 یَهوِه، اِبرانی زُبانا هُداوندئے نام اِنت. اے لَبز چه ”بئیگئے“ لَبزا جۆڑ بوتگ. پاکێن کتابئے گێشتر تَرجُمَهان اے لبز ”هُداوند“ کرتگ. آن. 6هُداوند جار جنانا موسّائے دێما گوَست: ”هُداوند آن، هُداوند، رهمان و مِهربانێن هُدا من آن. گزبئے آرَگا دێرَ کنان و چه مِهر و وپایا پُرّ آن. 7گۆن هزاران نَسلا وتی مِهرا برجاهَ داران و رَدکاری و سَرکشّی و گناهانَ بَکشان بله رَدکاریا بے سِزایا گوَزگَ نئیلان. پت و ماتانی رَدکاریانی سِزایا چُکّ و نُماسگانَ دئیان، تان سئیمی و چارمی نَسلا.“

8موسّایا هما دمانا سَر جَهل کرت و پرستش کنگا لگّت. 9گوَشتی: ”او هُداوند! اگن تئیی چمّان منا کَدر و اِزّتے هست، گڑا تئوِ هُداوند مئے همراه بئے. بِلّ تُرے اے ناپَرمان وَتسَرێن کئومے، بله تئو مئے رَدکاری و گناهان ببَکش و مارا وتی میراس کن.“

10هُداوندا گوَشت: ”بچار، نون من اَهد و پئیمانے کنان. من تئیی سجّهێن مردمانی دێما اَنچێن اَجَبَّتێن کارَ کنان که اَنگت سجّهێن دنیایا هچّ کئوما ندیستگ و تئیی سجّهێن مردمَ گِندنت که منِ هُداوندئے کار چۆن باکَمال اِنت، همے کار که من په تئو کنانی. 11ترا مرۆچی هر هُکمے که دئیان، هما پئیما بکن. من اَموری و کَنهانی و هیتّی و پِریزّی و هێوی و یَبوسیان چه تئیی دێما دورَ کنان. 12هبردار! اے مُلکا که رئوگا ائے، گۆن اے مُلکئے مردمان هچّ پئیمێن اَهد و پئیمان مبند، چۆ مبیت که دامێا بکپئے. 13آیانی کُربانجاهان کَرۆج، په بُت‌پرستیا مِکّ کرتگێن سِنگانِش پْرۆش و آیانی بانُکێن هُدا اَشیرَهئے بُتان گُڈّ و گار کن. 14دگه هچّ هُدائے پرستشا مکن، چێا که منِ هُداوند که منی نام هَسود اِنت، هَسَدّیگێن هُداے آن. 15هبردار! گۆن آ مُلکئے مردمان هچّ پئیمێن اَهد و پئیمان مبند. وهدے آ وتی بُتێن هُدایان سُجدهَ کننت و په آیان کُربانیگَ کننت، شمارا هم داوَتَ دئینت و شما آیانی کُربانیگانَ ورێت و 16وهدے شما په وتی مَردێن‌چُکّان آیانی جنێن‌چُکّان گچێنَ کنێت، آ جنێن‌چُکّ وتی بُتێن هُدایان سُجدهَ کننت و شمئے مردێن‌چُکّان هم وتی هُدایانی سُجدها پرماینت. 17هچّ بُتێن هُدا اَڈّ مکن.

18بێهُمیرێن نگنئے ائییدا برجاه بدار. هما پئیما که من ترا هُکم داتگ، تان هپت رۆچا بێهُمیرێن نگن بوَر. اے کارا اَبیبئے ماها، هما گیشّێنتگێن وهدا بکن، چێا که همے ماها تئو چه مِسرا در آتکئے.

19هر لاپئے ائولی چُکّ منیگ اِنت، تئیی سجّهێن مال و دَلوَتانی ائولی نَرێن چُکّ هم، گۆک ببنت یا پَس. 20هرئے ائولی کُرّگئے بدلا گوَرانڈے بکُش و کُرّگا بمۆک، بله اگن نَمۆکئےای، گڑا کُرّگئے گردنا بپرۆش. وتی سجّهێن ائولی مَردێن‌چُکّان اَلّم بمۆک. کَسّ منی دێما گۆن هۆرکێن دستان مئیئیت.

21شَش رۆچا کار بکن، بله هپتمی رۆچا آرام کن. ننگار کنگئے و رۆن و مۆشئے مۆسما هم همے پئیما بکن.

22هپتگانی ائییدا،#34‏:22 هپتگانی ائیید نۆکێن اَهدنامَگا پِنتیکاستئے ائیید اِنت، بچار کاسِدانی کار، بَهر 2. بزان گندمئے ائولی بَر و سَمرئے رُنَگئے ائییدا برجاه بدار. سالئے گُڈسَرا#34‏:22 اِدا ”سالئے گُڈسَر“ کِشت و کِشاری سالئے گُڈسَر اِنت. رۆن و مۆشئے ائییدا هم برجاه بدار. 23تئیی سجّهێن مردێن، سالے سئے رندا منِ هُداوندێن هُدا، اِسراییلئے هُدائے دێما پێش ببنت. 24من کئومان چه تئیی دێما دورَ کنان و تئیی هَدّ و سیمسران پْراه و شاهِگانَ کنان. تئو که سالے سئے رندا وتی هُداوندێن هُدائے چارگا کائے، آ وهدا کَسَّ نئیئیت و تئیی مُلکا نگیپت.

25کُربانیگئے هۆنا هُمیری چیزّێئے همراهیا پێش مکن. سَرگوَزئے ائییدئے کُربانیگا تان سباها اێر مکن.

26وتی زمینئے ائولی بَر و سَمرا وتی هُداوندێن هُدائے لۆگا بیار.

شِنِکّئے گۆشتا ماتئے شیرئے تها لَهڑ مدئے.“

27نون هُداوندا گۆن موسّایا گوَشت: ”اے هبران نبشته کن، چێا که من همے لبز کار بستگ‌اَنت و گۆن تئو و گۆن اِسراییلا اَهد و پئیمانے کرتگ.“

28موسّا تان چِلّ شپ و چِلّ رۆچا همۆدا هُداوندئے کرّا اَت، نه نانیَ وارت و نه آپ. وانِکانی سرا اَهد و پئیمانئے لبزی نبشته کرتنت، دَهێن پَرمانی نبشته کرتنت.

موسّائے دێمئے درَپشناکی

29وهدے موسّایا شاهدیئے دوێن وانِک دستا اَتنت و چه سینائے کۆها اێر کپت، سهیگ نه‌اَت که گۆن هُداوندا هبر کنگئے سئوَبا منی دێم درَپشَگا اِنت. 30وهدے هارون و سجّهێن اِسراییلیان موسّا دیست، چه آییئے دێمئے درَپشناکیا آییئے نزّیکّا رئوَگِش تُرسِت. 31بله موسّایا آ گْوانک جتنت. هارون و کئومئے سجّهێن سرۆک موسّائے کرّا پِر تَرِّتنت و موسّایا گۆن آیان هبر کرت. 32نون سجّهێن اِسراییلی موسّائے نزّیکّا آتکنت و آییا هما سجّهێن پرمان اِسراییلیانا سَر کرتنت که هُداوندا سینائے کۆها آییارا داتگ‌اَتنت.

33هر وهدا که موسّایا گۆن آیان هبر کنگ هَلاسَ کرت، دێمی گۆن نِکابێا پۆشِت. 34هر وَهدا که موسّا هُداوندئے بارگاها شت که گۆن آییا هبر بکنت، نِکابی دورَ کرت و تان در آیگئے وهدا وتی دێمی گۆن نِکابا نپۆشِت. وهدے درَ آتک و هُداوندئے پرمانی گۆن مردمانَ گوَشتنت، 35اِسراییلیانَ دیست که موسّائے دێم درَپشَگا اِنت. گڑا موسّایا پدا گۆن نِکابا وتی دێمَ پۆشِت، تان هما وهدا که پدا تها شت که گۆن هُداوندا هبر بکنت.

Currently Selected:

دَرگوَز 34: HPKB

Highlight

Copy

Compare