دانیال 11
11
1مادێن داریوشئے دئورئے ائولی سالا من په میکاییلئے زۆرمند کنگ و نِگهپانیا آییئے کرّا اۆشتاتان.
جنوبی و شمالی بادشاهانی جنْگ
2نون من ترا راستێن هبرا گوَشان. بچار، پارسا دگه سئے بادشاه پادَ کئیت، پدا چارمی بادشاهے کئیت که چه اے دگه سجّهێنان گێشتر مالدار و هستۆمندَ بیت. اَنچۆ که آ وتی مال و هستیئے سئوَبا زۆرمندَ بیت، آ، سجّهێن مردمان په یونانئے بادشاهیئے دُژمنیا پادَ کنت.
3رندا زۆرمندێن بادشاهے چستَ بیت. آ، گۆن مزنێن زۆر و واکے هُکمرانیَ کنت و هرچے که دلیَ لۆٹیت، کنت. 4بله پاد آیگا رَند، آییئے بادشاهی پرۆشگ و دێم په آسمانئے چارێن گواتان بهر کنگَ بیت، بله نه آییئے نَسل و پَدرێچا رسیت و نه آ پێسری زۆری مانَ بیت که آییئے وتی جندا بوتگ. آییئے بادشاهی چه بُنا گْوجَگ و دگران دئیگَ بیت.
5پدا جنوبئے بادشاه#11:5 جنوبئے بادشاه مِسرئے بادشاه اِنت. زۆرمندَ بیت، بله آییئے یکّ سالارے چه آییئے جندا هم زۆرمندتِرَ بیت و گۆن مزنێن واکێا شمالا مُلکے اَڈَّ کنت و وتی مُلکا هُکمرانیَ کنت. 6لهتێن سالا پد اَهد و کَرارے بندنت. جنوبئے بادشاهئے جنِک شمالئے بادشاهئے#11:6 شمالئے بادشاه، سوریَهئے بادشاه اِنت. کِرّا په اَهد و کَرار بندگا رئوت. بله جنِکئے زۆر و کدرت پشتَ نکپیت و شمالئے بادشاهئے زۆر هم نمانیت. آ رۆچان، بادشاهئے جنِک گۆن وتی همراهان، وتی پتا و کُمَک‌کارا هئوار درۆهگ و دژمنانی دَستا دئیگَ بیت.
7چه جنِکئے هاندانا کَسے پادَ کئیت و جنوبئے بادشاهئے جاگها گیپت. آ، شمالئے بادشاهئے پئوجئے سرا اُرُشَ کنت و آییئے کلاتا پُتریت. آیانی هلاپا جنگَ کنت و سۆبێنَ بیت. 8آ، اِشانی بُتێن هُدا، چه آسا در آورتگێن بُت و تلاه و نُگرهئے گرانبهاێن دَرپان آوارَ جنت و گۆن وت مِسرا بارت. دێمترا په لهتێن سالا آ، شمالئے بادشاهئے کارا کارَ نداریت. 9نون شمالئے بادشاه جنوبئے بادشاهئے مُلکئے سرا اُرُشَ کنت بله پدا وتی مُلکا واترَّ بیت. 10آییئے بچکّێن چُکّ جنْگئے چِن و لانچا کننت و بلاهێن پئوجے یکجاهَ کننت، اے پئوج دێما کنزانَ کنت که چۆ توپّانێن هارێا سرَ رچیت و جنْگا تان دژمنئے کلاتا دێما بارت.
11جنوبئے بادشاه هِژمَ گیپت، شمالئے بادشاهئے دێما درَ کئیت و گۆن آییا جنْگَ کنت. نون شمالئے بادشاه بلاهێن پئوجے یکجاهَ کنت، بله اے پئوج، جنوبئے بادشاهئے دستا پرۆشَ وارت. 12چه اے پئوجئے پرۆش دئیگا رَند، جنوبئے بادشاه گُروناکَ بیت و هزاران مردمَ کُشیت بله اَنگت بالادستَ نبیت، 13چێا که شمالئے بادشاه نون چه پێسرا مسترێن پئوجے یکجاهَ کنت و لهتێن سالا پد، گۆن وتی مسترێن پئوج و بازێن جنْگی سامانان واترَّ کنت.
14آ زمانگا بازێنے جنوبئے بادشاهئے دژمنیا پادَ کئیت. تئیی جندئے کئومئے شِدّتیێن مردم اے شُبێنئے پوره و سَرجم کنگا پادَ کاینت بله پرۆشَ ورنت. 15پدا شمالئے بادشاهَ کئیت، کَلات‌بندێن شهرێئے چپّ و چاگردا سنگَرَ بندیت و شهرا گیپت. جنوبی پئوج بێوسَ بیت. تنتنا آیانی شَرترێن پئوج هم اِشانی دێما اۆشتاتَ نکننت. 16شمالئے بادشاه اُرُشَ کنت و هما پئیما کنت که وتی دلیَ لۆٹیت. کسّ آییئے دێما اۆشتاتَ نکنت. آ زێباێن مُلکا اۆشتیت و چه آییئے دستا تباهیَ بیت. 17نون آ اِرادهَ کنت که گۆن وتی سجّهێن بادشاهیئے زۆرا بیئیت و گۆن جنوبئے بادشاها اَهد و کَرار ببندیت. وتی جنِکے هم گۆن آییا آرۆسَ دنت که جنوبئے بادشاهیا بپرۆشیت بله آییئے اے هئیال سۆبێنَ نبیت و اے کار دێما نرئوت. 18نون شمالئے بادشاه وتی دلگۆشا گۆن تئیاب‌دَپانَ#11:18 تئیاب‌دپ، بزان دریائے نزّیکّ و گوَرێن جاگه، زِرکِرّ، ساهِل. کنت و بازێن زمینے گیپت. بله سالارے آییئے گروناکی و بےپَرواهیا هلاسَ کنت و آییئے گروناکیا، په آییئے جندا پِرَ تَرّێنیت. 19گڑا آ، دێما گۆن وتی جندئے مُلکئے کلاتانَ کنت بله لَکُشیت و کپیت و پدا هچّ جاگه گِندگَ نبیت. 20پدا آییئے جاگها دگه یکّے کئیت و سُنگ و مالیاتگیرے رئوانَ دنت تانکه وتی مُلکئے شان و شئوکتا برجم بداریت، بله لهتێن رۆچا رند اے بادشاه، بے جنْگ و شِدّتێا، وَت بربادَ بیت.
بَژّناکێن بادشاه
21اِشیئے جاگها اَنچێن بَژّناکێن مردمے کئیت که آییا هچّ پئیمێن بادشاهی شرپ دئیگ نبوتگ‌اَت. اے په آرامیَ کئیت و په رِپک و پندلے بادشاهیا گیپت. 22اِشیئے دێما بلاهێن پئوجے رۆپگ و پرۆش دئیگَ بیت و گۆن اے پئوجا یکجاه اَهد و کَرارئے شهزادگے هم تباهَ بیت. 23چه هما وهدا که گۆن اِشیا اَهد و کَرارے بندگَ بیت، اے چێرُکایی وتی پئیما کارَ کنت. مردمی بازَ نبنت، بله بالادستَ بیت. 24په آرامی مُلکئے سێرترێن بهرانَ پُتریت و اَنچێن کارَ کنت که اِشیئے هَپت پُشتا نکرتگ. اے وتی همراهانی نیاما پُلِتگێن مال و آوار و دئولت بهرَ کنت. تان کَسانێن وهدێا په کلاتانی گِرگا پندلَ سازیت. 25مزنێن و سکّێن پُرزۆرێن پئوجے زوریت و په جنوبئے بادشاهئے پرۆش دئیگا وتی زۆر و تئوکلا شۆرێنیت. جنوبئے بادشاه هم بلاهێن و پُرزۆرێن پئوجے زوریت و جنْگَ کنت بله اۆشتاتَ نکنت که آییئے هلاپا پندل سازگَ بنت. 26هما که چه بادشاها لاپَ گرنت و ورنت، هما آییئے برباد کنگئے جُهدا کننت. آییئے پئوج پرۆشَ وارت و جنْگا بازێنے کُشگَ بیت. 27دوێن بادشاه، په بدنیّتی یکّێن پَرزۆنَگا#11:27 پَرزۆنَگ، بزان سُپره. نندنت و گۆن یکدومیا درۆگَ بندنت بله کامیابَ نبنت چێا که هلاسی، گیشّتگێن وهدا کئیت. 28شمالئے بادشاه گۆن مزنێن مال و دئولتێا وتی مُلکا پرَ ترّیت بله دلی پاکێن اَهد و کَرارئے هلاپا بیت. اے وتی کارا کنت و مُلکا واترَّ بیت.
29گیشّتگێن وهدا، پدا دێم په جنوبا درَ کپیت، بله اے گُڈّی رندا پێشیگێن وڑا نبیت، 30چێا که کیتّیمئے#11:30 کیتّیم، جاگهێئے نام اِنت که کِبرِسئے جَزیرها شهرے اَت. اِدا په رومیان اِشارهے. لانچ آییئے دژمنیا کاینت. پمێشکا آ دلپرۆشَ بیت و واترَّ کنت و پاکێن اَهد و کَرارئے دژمنیا هژمَ گیپت. پِرَ تَرّیت و په همایان مهربانَ بیت که پاکێن اَهد و کَرارا نمَنّنت. 31آییئے پئوج جاهَ جنت، مزنێن پرستشگاها، هما مُهرێن کلاتا پلیتَ کنت، هر رۆچیگێن کُربانیگان بندَ کنت و ’پلیت و بێران کنۆکێن بَژّناکا‘#11:31 ”پلیت و بێران کنۆکێن بَژّناک“ یکّ چیزّے که نباید اِنت مزنێن پرستشگاها بیئیت. دانیال نبیئے پێشگۆیی هما وهدا سَرجم بوت که 167 پێش‌میلادا سوریَهئے هاکما مزنێن پرستشگاهئے تها بُت جاگه دات و هوکّی کُربانیگ کرت. همۆدا اێرَ کنت. 32په چاپلوسی هما مردمان سِلّ و پلیتَ کنت که اَهد و کَرارئے هلاپا کارِش کرتگ، بله هما مردم که وتی هُدایا شرّیا پَجّاهَ کارنت، آییئے دێما مُهرَ اۆشتنت. 33هما که دانا اَنت، بازێنێا سر و سۆجَ دئینت، بِلّ تُرے په کَسانێن مُدّتێا اے مردم گۆن زَهما کُشَگَ بنت، په آس سۆچگَ بنت، بندیگ و لُٹّ و پُل کنگَ بنت. 34وهدے کَپنت، کمّێن کُمَکِشَ رسیت و بازێنے په بَدنیّتی آیانی همراهَ بیت. 35چه دانایان هم لهتێنَ لکُشیت تانکه اے ڈئولا اے مردم تان هلاسیئے وهدا پاک و پَلگار و بےائیب کنگ ببنت چێا که اے وهد، وتی گیشّتگێن زمانگا کئیت.
گروناکێن بادشاه
36پدا بادشاه وتی دلئے تبا کارَ کنت و وتا چه سجّهێن هُدایان بُرزتر و پُرمڑاهترَ گِندیت و هُدایانی هُدائے هِلاپا اَنچێن هبرَ کنت که مردم هئیرانَ بنت. تان هما وهدا کامیابَ مانیت که گَزبئے وهد سَرجم نبوتگ. هما چیزّ که بئیگی اَنت، اَلّمَ بنت. 37آ، په وتی پتانی هُدایان هچّ پرواهَ نداریت و جنێنانی واهگئے پَرواها هم نکنت. په اے دگه هُدایان هم پَرواهَ نداریت، چێا که آ، وتا چه اے سجّهێنان بُرزترَ کنت. 38اِشانی بدلا کلاتانی هُدایا اِزّتَ دنت، اَنچێن هُداے که آییئے پت و پیرُکان هچبر نزانتگ. آ، اِشیا گۆن تِلاه، نُگره و گرانبهاێن سِنگ و کیمّتیێن چیزّان شرپَ دنت. 39دَرامدێن هُداێئے کُمکّا مُهر و مُهکمێن کلاتانی سرا اُرُشَ کنت. هما که آییا منّنت، آیان مزنێن شرپَ دنت و بازێن مردمێئے سرا هُکمرانِش جۆڑَ کنت و زمینا آیانی نیاما په ٹێکی بهرَ کنت.
40پدا هلاسیئے وهدا، جنوبئے بادشاه آییئے سرا اُرُشَ کنت و شمالئے بادشاه جنوبئے بادشاهئے سرا توپّانێئے ڈئولا گۆن اَرّابه،#11:40 اَرّابه، بزان مزنێن مَنسبدارانی هما گاڑی که اَسپیَ کَشّنت. اَسپ‌تاچ و بازێن لانچێا مانَ رچیت. بازێن مُلکێئے سرا اُرُشَ کنت و چه اۆدا چۆ توپّانێا گوَزیت. 41آ، زێباێن مُلکئے سرا هم اُرُشَ کنت و بازێن مُلکے پرۆشَ وارت بله اِدوم، بوآب و اَمّونئے مسترێن مردم چه آییئے دستا رَکّنت. 42پدا آ وتی دستا په اے دگه مُلکانی گرگا دْراجَ کنت و مِسر هم نرکّیت. 43مِسرئے سُهر و نُگرهئے هزانگ و سجّهێن گرانبهاێن چیزّان وتی دستئے چێرا کاریت. لیبیایی و کوشی#11:43 کوش: آ زمانگئے کوش مرۆچیگێن سودان اِنت. آییئے پادانی چێرا بنت. 44بله چه رۆدراتک و شمالا آیۆکێن هال، آییا تُرسێننت، سکّ هژمَ گیپت و په بازێنێئے برباد و گار کنگا درَ کئیت. 45آ وتی بادشاهی تَمبوان#11:45 تَمبو، بزان گدان، هئیمه. دریایانی درنیاما، زێباێن پاکێن کۆهئے لَمبا جنت و اے پئیما وتی گُڈّی آسرا سرَ بیت و کسّ په آییئے کُمکّا نئیئیت.
Currently Selected:
دانیال 11: HPKB
Highlight
Share
Copy
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.