Baebelo 10
10
Bisansa Biakasanaga baLewi Tabiasuaga.
1Kubuno mulembe uli kisusania kia bitondo bisoga bikaba, tondo ta kisusania kikinyene kia bibio, ku bisansa bibio bibakasanaga muaka na muaka tabinavuama kusililizia babo bekubilusia. 2Songo bubo bisansa tabinalekedue kukasanua, kubuno songo babo bekukumbamina bese basila kuengibua kalazi, tabenimenyine buno beli na misako za buagi. 3Tondo mu bisansa bibio muli kakengelesio ka misako za buagi muaka na muaka. 4Kubuno tabuakulungana mikila za balume ba ngombe nu za mpene kutikia misako za buagi. 5Kububuno, gavule mu kisi, atendile bune,
Ntuatundile kisansa nu lukaso,
Tondo wankitide mubili;
6Ntuatananizizibue na bisansa bikugisibua nu bisansa bia misako za buagi:
7Ububo natendile bune,
Kalaga, Unguilila, navua (mu kigondi kia mukanda bunasanzidue),
Kukita anga buwasombuede. #Luimbo 40:6-9.
8Anga bukutenda gambakamia buno, ntuatundile bisansa, nu nkaso, nu bisansa bikugisibua, nu bisansa bia misako za buagi, aba ntuatananizizibue nabio (bibio biakasanagua anga buakakizizibue ku mulembe), 9u gago atendile bune, Unguilila, navua kukita anga buwasombuede. Atikizie itangi, buno abike lia mabili. 10Mu kusombola kukuno tuasuagizibue ku kuikasana mubili kuikasene Yesu Klisto limbizi limozi tugu. 11Nu sankoga na sankoga nawemanaga busi na busi kukita mulimo wage, nu akasanaga bisansa bibino mambizi meingi, nubio tabinavuama nunse kutikia misako za buagi: 12tondo wono, gakasene kisansa limbizi limozi tugu ku misako za buagi nu kikuikalaga nkiko na nkiko, eikede ku kuboko kua seidume kua Kalaga; 13aba nu galindile kuangata beiti bage. 14Kubuno asililizizie babo basuagibua ku kisansa kimozi ku nkiko na nkiko. 15Nu Muuza Wasililila ekutulongekela; kusila kua kutenda bune,
16Lilino u idagano linkalagana nabo
Kutinga kua bindi bibio ubukutenda Mukota:
Nabike milembe zane mu mitima zabo,
Nu nazisanze mu makengelo mabo: #Yelemia 31:33, 34.
17Ubuakutenda bune,
Nu misako za buagi buabo nu za mibi zabo nsikazikengela lingo.
18Umpanga ndi kuse kusigililua kua zeno, nti takuli lingo kingo kisansa kia buagi.
Bakatizia Bekukunda Kalaga.
19Umpanga, mibuto zane, tatuli na boba ku kuingila mu busio bua kizila ku kabamba ka mikila za Yesu, 20ku nzila nsoga nto za kalamo za tuatide zatinga mu nsulu za busio bua kizila, bubo u mubili wage; 21nu kuba na sankoga munene wangata numba za Kalaga; 22tukunde na mutima umozi na kilemanizio kinsania ku bukatizio, mitima zeitu zengezibue, buno tusige makengelo mabi, nu mibili zeitu zogezibue na mazi menga, 23tukokomezie nunse bulongeki bua kilemanizio kietu buno tatutengetenge; kubuno we walagile eli mukatizia; 24tukengelane kulindania ku lutundo nu ku makitilo masoga; 25tatulekele kukundamana anga bukukita bango, tondo tuanane, nu tuitile kukita nunse bubo, bumukumenya buno busi bubo buse buigi.
Musanzi wa Mukanda Wono Ekubakengelesia.
26Kubuno ndi tuagilila lingo neisela nu tuse na bumenyinino bua bulili, takuli lingo kingo kisansa ku kabamba ka misako za buagi, 27tondo tugu nti kuse kulindia kubibu kua kusungibua, nu keiya kakali kakagisia babo beiti. 28Muntu wabenga mulembe wa Mose nti akua ntaguninue, ku bulongeki bua bantu babili aba basatu: 29mukukengela buni, ndi ntanasungibua nunse wozo muntu wanyantile Muana wa Kalaga, nu kunyega zezo mikila zeidagano, zasuagizibue muzo, nu kubenga Muuza Wasililila wa mponga? 30Kubuno tuizi wozo watendile bune, Kusuba kuli kundi, nokasuba, #Dutelenome 32:35. nu lingo, Mukota akasungia bantu bage.#Dutelenome 32:36. 31Buli bubibu nunse kukatua mu maboko ma Kalaga uli Mulami.
32Tondo kengelazi bibio bindi bitangi, mubio muasanizibue na kiengi, nu muababazibue nunse; 33ku bubo muabengilue ku mabingo nu mbabazio; nu lingo muagomezie na babo bababazizibue bubo. 34Kubuno muakuilide babo babezaga bakandua kiombo, muabogilebogile gamuanyagua bikulo bieinyu, kubuno muamenyine buno muli na bikulo bisoga nunse muigulu bikekalaga. 35Umpanga tamukutue mu kilemanizio kieinyu, kubuno kili na lukalilo lunene. 36Kubuno mukutunda kuba na nkiki, buno, gamunakita kusombola kua Kalaga, buno mube na lilio kuidagano. 37Ta bindi bingi nunse,
We ukuvua avue, nu nteizizie.
38Tondo, weisanana wane akalama ku bukatizio;
Nu ndi ekuzingazinga, nti nsikabogaboga nage. #Habakuka 2:3, 4.
39Tondo tatuli anga babo bekuzingazinga nu bekuzimina,
tondo tuli anga babo beli na bukatizio bunatonia.
Currently Selected:
Baebelo 10: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
