Bagalatia 3
3
Lukaso Lua Muuza Luli ku Kitondo Kia Kukatizia, ta ku Kitondo kia Kuanza Mulembe.
1Inyue baGalatia bioto, nazi wamulogile, ndi tamungule buno Yesu Klisto asambedue buno atakilue kumuli? 2Nkutunda kumenya kitondo kikino kimozi kumuli bune, Muakasilue Muuza ku makitilo ma mulembe, aba ku kungua kua bukatizio? 3Inyue muli bioto? mualingile mu Muuza, ndi mukutunda kusililila mu makitilo ma bumba bua buagi? 4Muababazizibue buliabulia? ndi buli buliabulia bulili? 5Umpanga we wamukasile Muuza wage, nu ukukita maganogano kumuli, ndi ekukita bibino ku makitilo ma mulembe, aba ku kungua kua bukatizio? 6Anga bubo buakatizizie Abalahama Kalaga, nu atekuidue buno eisanana.#Genese 15:6. 7Umpanga mumenye buno babo beli na bukatizio, ubabo beli bana ba Abalahama. 8Nu isanzo, lialingile kumoneka kulio buno Kalaga akabingia baBilongo ku bukatizio, liasambalide Abalahama musagu musoga, liatendile bune, Muguli baBilongo bansania bakakitua mponga. 9Kububo babo beli ba bukatizio bekukitua mponga na Abalahama mukatizia. 10Kubuno babo bansania beli ba makitilo ma mulembe beli mu kisuililo: kubuno buasanzilue bune, Asuililue na muntu na muntu utakuendela mu bunsania buasanzilue mu mukanda wa mulembe nu kubukita.#Dutelenome 27:26. 11Bukumoneka buno takuli muntu kubingibua ku mulembe ku Kalaga, kubuno wisanana akalama ku bukatizio; #Habakuka 2:4. 12nu mulembe tagukutuka ku bukatizio: tondo, Muntu ukuyanga bitondo bia mulembe, alame mubio.#Lewitiki 18:5. 13Klisto atukuluide ku kisuililo kia mulembe, asuilidue ku kabamba keitu; anga buasanzilue bune, Asuililue na muntu na muntu ukukamua ku muti: #Dutelenome 21:23. 14buno mponga za Abalahama zibasile baBilongo mu Yesu Klisto buno tukasue idagano lia Muuza ku bukatizio.
15Mibuto zane, nkutenda mu lukita lua bantu: Aba idagano lia bantu, ndi liakokomena, muntu ntanalita aba kulitalikila. 16Ku Abalahama idagano lialagilue nu ku kikanga kiage. Ntatenda, ku bikanga, anga ku bingi; tondo anga kimozi, Nu ku kikanga kiobe, ukili Klisto. 17Nu bubuno ubunkutenda bune: Idagano liakokomene na Kalaga, nu mulembe wabasile, gabede miaka nkama inazi nu makumi masatu zasila, tagunavuama kulita, aba kugalukia idagano buliabulia. 18Kubuno bupieni ndi buli ku mulembe, tabuli lingo kuidagano: tondo Kalaga abukasile ku Abalahama kuidagano. 19Mulembe uli kikizi? watalikidue ku kabamba ka kukagula mulembe, aba gavue kikio kikanga kialagilue idagano, liakakizizibue na migenzi, mu kuboko kua mukulumania. 20Tondo mukulumania nteli mukulumania wa umozi, tondo Kalaga eli umozi. 21Umpanga ndi mulembe ukuita malagano ma Kalaga? Kilo, nunse: kubuno songo mulembe wakasilue buno ukasane kalamo, lebelebe kuisanana kunabede ku mulembe. 22Tondo masanzo makandile binsania mu buagi, buno idagano lili ku bukatizio mu Yesu Klisto likasue ku babo bekukatizia.
23Tondo gabede bukatizio tabuvua, tuabezaga tukulangua mu mulembe, tuakandilue ku kulindila bukatizio bukabisulua. 24Nu bubo mulembe wabezaga musozi weitu wa kutulusia ku Klisto, buno tubingibue ku bukatizio. 25Tondo gabede bukatizio buavua, mulembe taguli lingo musozi weitu. 26Kubuno inyue bansania muli bana ba Kalaga, ku bukatizio mu Yesu Klisto. 27Kubuno inyue bansania muabatizizibue mu Klisto, muazualile Klisto. 28Takuli muYuda aba muGeleka; takuli mukobe aba mukandulua, takuli wamulume aba mukikulu; kubuno inyue bansania muli umozi mu Yesu Klisto. 29Nu ndi inyue muli ba Klisto, umpanga nti muli kikanga kia Abalahama, nu bapieni beidagano.
Currently Selected:
Bagalatia 3: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
