Liɛnɛsu 11
11
Lokweelomo loa Ndakɔ ya Mungu
1Limɔ yafomoko ifende eshaaka kwa ikweelo, la imi loongomo mbo— Emalaka la kweelaka Ndakɔ ya Mungu la etumbelo ya lifaefi la loketi loa bato ebatosemola Mungu omao, 2la machaka balɛlɛ lousa loa Ndakɔ ya Mungu, okweelëke bao, eoka basofaefomo bato ba tukela ya wenda la batomatekela bokenge botanu ko tengai kama inɛi la imbale. 3La yefaefaka banangoli bami bambale isosha shonangola la betɔndɔkɔlɔkɔ ko bacho ɛlɛfu ɛmɔi la mia imbale la kama liambɛ, ani batowataka ko bakunia.
4Eba bende tosandu tombale twa tuma twa baita la bitalielo ya päka bimbale eyemesani oso wa Ngɛnɛ wa wenda, 5la boto ɛlɛmbɛ ndobebesa iyo, ani bösä botokuswaka nda bɛnɔkɔ yau la botofecha biyani lau; boto ɛlɛmbɛ ndobebesa iyo, aondu nde ndoolomo ko ongoma. 6Eba bende l’isosha sholinjaka use mbo mbula etatɔnɔ ko la bacho ebatotɔndɔkɔl’iyo; bende l’isosha shokindola balia ko bakila la ndoomaka wenda la baömä batoti ko mbile la mbile, kwa akalɛmbɛk’iyo. 7Limɔ akasileke iyo linangoli liau, nyama eyetokuswa nda liondo eliti la tunga atonana lau bita la atolongel’iyo, la atoolak’iyo; 8limɔ belyo yau beyalaka nde nda lɔmbɔ loa bokenge bofi ebosotangomo nda inango sha njasɔ ya bolimo mbo Sodomo la Ejipeto, olo olomoko imɔ ko Ngɛnɛ wau nda lieka. 9Bato ba biese wike la tukela wike la eba baoi wike la eba wenda bototi, betichaka belyo yau bacho basatɔ la botüku, la batofeka mbo belyo ina betaombomo nda kito; 10la ebatoyalaka nda wenda belaomalaka loasɔ loau, belainaka bisha la belafaekefana bafi, ko l’eoka mbo e-batɔndɔli-ba bambale bokesaka bato ebayali nda wenda ko wale finɛ.
11Limɔ mbisa ya bacho basatɔ la botüku, luli loa liwawi, eloa Mungu angɛnɛ, loao lɔɔtɛl’iyo la iyo loemala nda batindi bau, la bɔwa wa likama lokwelo ebɛnɛk’iyo. 12Limɔ iyo ana loka limiki lifi nda use elitoonga lau mbo— Lilaka ono likolo! La iyo lolila likolo nda litumba la biyani lau lɔɛnɛk’iyo. 13Limɔ ko la mbile-ao nyɛlɛ lotukatuka finɛ la botüku wa liu wa bokenge lowɛlɛmɛ se; bato bilɛfu bosambale lowa nda lotukatuko loa nyɛlɛ la bato ebatikelaka lokwelo bɔwa la iyo loinela Mungu wa Use.
14Aeko, liömä lia ambale lisoeta! Toka kɔni, liömä lia asatɔ litoya la mangu!
15Limɔ bokitomo wa osambale looma ifonge, limɔ bamiki bafi lokomoko nda use, ebaongaka mbo—
Likakalesi lia wenda-bo lisoyela elia Ngɛnɛ wasu la elia Masiya wande, la Inde ekakalesaka wao ko layalaya.
16Limɔ biange kama imbale la inɛi ebayalaka se oso wa Mungu nda kɛka yau, iyo loswaka biɔmbɔ yau se, iyo losemokola Mungu, iyo loonga mbo—
17E Mungu Ngɛnɛ wa Bofoka bototina, Oyayali la Oyayalaka, tosofaef’Aɛ kelekele eoka osoaela bofoka waɛ bofi la osoakola ndokakalesa wenda.
18Eba tukela ya wenda basomaka, nde eyaɛ efango loya, la mbile yoataka njasɔ y’ebasowa esoiyela, la mbile yokaela bɛkɔwa yaɛ bondanda wau, bako bɛtɔndɔli l’ebatanu, l’ebasolitesa lina liaɛ, l’ebakɛkɛ, l’ebafi lisanga, la mbile yosɛɛsɛlɛsɛ ebatosɛɛsɛlɛsɛ wenda-bo.
19Limɔ Ndakɔ ya Mungu eyele nda Use loliolomo la kwokwolo ya Ngɛla yande lɔɛnɛlɛ nda Ndakɔ yande; limɔ tobalibali la bamiki ba bilundi lɔɛnɛlɛ la nyɛlɛ lotukatuka la mbula ya basasɛ bafi lotɔnɔ.
Currently Selected:
Liɛnɛsu 11: NTKE58
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
