Mako 15

1Kahindji n’āka bufuku habubatokyele na mashika, batshiite bakwidi bakata bēbungile kimu na bakulu na bafundji ba mikanda, na bena kimu kikata boso; biabia babanyine Yesu, babamwatshile, babamufishe kwi Pilato. 2Pilato bamwinwishe’shi: Obe we nfumu a bena Yudea su? E bamwululwile’shi: Bibōmba’nyi mbinyibinyi 3Batshiite-bakwidi bakata babamwanyinene myanda yibungi, ank’E tamwalule mwanda, ooo 4Henyihaha Pilato bamwihwishe dimo’nyi’shi: Obe tōlula mwanda’nyi? A tohusha bia bakwamba? 5Anka Yesu ta mwalule, biabia Pilato bakanyine na lukanyo lukata.

6Biabia binyi mu bidibwa bikata bia Paque badi ebahoswela umune umune abakyebanga na mashimb’abo. 7Biabia kubadi umune (mu nshibo ya mashika) n’eshina die’nyi bu Balabasa, badi mwanyibwe na bantombishi n’e; mu buntomboshi bwabo badi bayihanga (bantu.) 8Henyihaha kibumbu (kia bantu) kibanyishishe mayi, kibabangile nami kumwihusha’shi: Etukitshin’anka mokitshina bihwa bioso. 9Anka Pilato bebehwishe’shi: A nukyebe’nyi nenufungwile nfumu a bena Yudea su? 10Mwanda Pilata beukile’shi, batshiite-bakwidi bakata mbamufishe ha mwanda wa kiutu. 11Anka batshiite-bakwidi bakata babashikidishe kibumbu kia bantu’shi: Bibuwa enufungwile Balabasa. 12Pilato bebālulwile dimonyi’shi: A biabia, anankakitshi kinyi na uno anutemuna bu nfumu a Bayudea? 13Dimonyi babanyishishe mayi’shi; kamwihayishe’nka ku nkulusu. 14Binyibiabia Pilato bebalungwile’shi: A ngi’nyi mwanda ubasole wa kulwisha? Abo babanyishishe bikata’ shi: Kamwihashe ’nka ku nkulusu. 15Biabia Pilato mwanda kutokesha mashimba a bantu bebahosodile Balabasa; henyihaha hakukuhila Yesu, ebamufisha kwabadi’shi: Akehayibwe ku nkulusu.

16Bashidika babayile n’e mu luhoho (lualwa lubadi ebalasa dikata dia nfumu,) dibatemunwanga bu Peletodyuma; abeyitamishenene kibumbu kiabi kioso. 17Biabia babamufwadikile mutwelo ukundakane, babamulukile lubango lwa milobo, babamutentekyele ku mutwe w’E. 18Babangile kumwimuna’shi: Mwanana, Obe nfumu a baYudea, 19Babamukuhile na mulenge ku mutwe kwe, babamufidile mata, babakunamine manwi (hāshi) kumulangwila. 20Henyihaha habahwile kumusenga, babamufudile mutwelo ukundakane, babamufwadikile bilamba bie, abayile n’e mu kumwihā ku nkulusu. 21Muntu, eshina die’nyi bu Shimona, mwina Saidine, shye wa Alekesande na Lufusa badi afiki ku mahia, habafumankene n’abo (bashidika) babamufinyikile’shi, mutwadishe nkulusu y’E. 22Babafikile n’e ku kihindji kibatemunwa’shi, bu Ngolongota, kuhatula nyi nkwamba’shi, nyi Kihindji kia Kabāla. 23Biabia babamuhele nfinyo yisangakane na (biakutoma bi būlo,) anka E beutune. 24Habamwihayile ku nkulusu babeabila bilamba bie’shi: Twibitēle bubale su abikala su mbianyi su mbianyi. 25Nguba tabadi ha nsā yisatu, nyi habamwihayile ku nkulusu. 26Na kifundjilo kia kwanyinwa kwe kibadi kifundwe kunundu’shi: NFUMU A BAYUDEA. 27Babamwihayile namu na bantomboshi babidi ku nkulusu, au ku mboko yibalume, au ku mboko yibakashi. 28Biabia kilundjilo ki’Efile-Mukulu kibadi kikumbashwe’shi: E badi mubadikilwe hamune na basodi ba myanda.

29N’aba bakidi eshinda babamukāyile, kwete kuhunga mitwe yabo’shi: A leka! Obe mushindji a ntempelo (y’Efile-Mukulu) ku mafuku asatu na kushimika inginyi. 30Ehashenge, wekatushe ku nkulusu. 31Anka hamunenka batshiite-bakwidi bakata, na bafundji ba mikanda babamusehe na kahesha’shi: E bahashanga bangi (bantu) E na mwinyi teuku kwihasha. 32A Kidisitu nfumu a Isalele ayike binobino ku nkulusu, biabia tumone na kukumina. Na baba babayihayilwe n’eboso ku nkulusu babamukāyile namu.

33Henyihaha habafikile nsā ha yisamombo, mufito ubafumankene ku mahia oso, ubafishishe mpaa na ku’nsā kitema. 34Henyihaha habafikile nsā kitema Yesu belele musase n’eyi dikata’shi: Eloi! Eloi! lama sabakatane? kuhatula nyi nkwamba’shi: Efile-Mukulu ande, Efile-Mukulu ande, A bonfutala’mi nkinyi? 35Bangi abadi bemane h’anka hakuhushā’bio’shi: Aī! ngiawa tayitamina Elaidja. 36Henyihaha umune bayile bukidi bakaushishe ehondje na nfinyo yi busasa, babeyisomekyele ku mulengye, babamuhele’shi atome, bambile’shi: Bandai kuleka, tumone Elaidja suakafiki kumwisha kwanka. 37Biabia Yesu belel’eyi di’E bi bukoho, (kahindji n’āka) batudil’eshimba die. 38Henyihaha mbwisha yibadi yikingwe mu ntempelo y’Efile-Mukulu yibasanuka hankatshi, bihese bibidi, kunundu kwayo mpaa na kūshi.

39Kimankinda kia bashidika kibadi kimene hehi na Yesu, habamwene E banyishishe eyi, na kutul’eshimba, bakwile’shi: Mbinyibinyi uno muntu ekalanga mwan’Efile Mukulu. 40Kubadi namu bana bakashi babadi tadilanga kwi bula; kubadi kwanka Madiya Mandalene, na Madiya nyin’a Yakoba hela, na Yosese, na Salome: 41Baba (bantu) habadi mu Ngadilea bamulondele, na kumukwatshisha mifubo, Bangi bakashi namu nyi babakamine n’E ku Yelusalema.

42Biabia hakuhona ha nguba, mwand’adi’efuku dibadi efuku dia Dilumbulwilo, kuhatula nyi nkwamba’shi, maloba nyi efuku dia Sabado. 43Nyi bibafikile Yosefe a Alematea, muntu muneme a mu bena kimu, e namu badi atengyela bufumu bw’Efile Mukulu, bayile kwi Pilato ku shī na moo, mu kumuteka kitanda kia Yesu. 44Pilato bakanyine’shi, su tadi mufwe binobino; bayitamina kwadi kimankinda kia bashidika, bamwihwishe’shi: A tafwile kihindji kikata su? 45Biabia habamushingulwishe kimankinda kia bashidika uno mwanda, batushishe kitanda kwi Yosefe. 46N’e baūle mbwisha ya linene lwi buwa bukalabale, biabia bamwiyishishe hashi, bamuhōmbele mwanka, bakamushikile ’muta usēbwemw’ibwe, bālashishe ding’ebwe mpaa na ku kibelo kia muta. 47Henyihaha Madiya Mandelene na Madiya (winyi nyin’a) Yosese, abo babamwene hababamubikanga.

Currently Selected:

Mako 15: NTLK52

Highlight

Copy

Compare