Luka 24
24
1H’efuku dia kwibedi dia lubingo namashik’ese, abafikile bangi bakwabo ku nyenyi, mbatwale abinunku mahembwe biabadi balumbule. 2Abasañene ebwe dialāshwe ku nyenyi. 3Habatwelele mwanka tambasanane kitanda kia Nfumwetu. 4Bitabibakitshine, habadi mashimb’abo ebakalakala ha uno’u’shi, batale’bi, bana balume babidi bemene habadi bafwale bilamba abihenyahenya; 5Habaikēle na moo, na kubandamisha mahala abo hashi, abo abakwile kwabadi’shi: A nkinyi kianukimbila e winyi atala munkatshi mwa bafwe? 6E, te mu nwē, basangulwa. Tentekeshai mwabakwidile kwanudi, habadi ki mu Ngadilea, 7eshi, Mwan’a muntu wadi n’ao ngwa kufishibwa mu māsa a bantu bebubi, na kubambibwa ha mutshi uhingishene, na h’efuku diakasatu akasanguka dimonyi. 8N’abo abatentekyeshe mīsambo ye. 9Biabia hakwaluka ku nyenyi, tabalungula b’ekumi na umune, na bangi bakwabo boso yino myanda yoso. 10Benyi’bo abadi Madiya Mangadalene, na Ndjoana, Madiya (nyin’a) Yakoba, na bangi babadi n’abo, abo benyi abalungwile yino myanda kwi batumibwa. 11Biabia mīsambo y’abo yibadi bu miele ya bisumanga kwabadi, tambeyikumine. 12Henyihaha Petelo bēbwele, akamina lubilo ku mashama, hakubandamina mwanka, bamwene bilamba bia lenene (mbilale) ha buhenka bwa’bio, biabia bakatukile anka e na mwinyi, kwete kukanya ku kiakia kibakitshinwe.
13Talai, babidi b’abo abadi abende diadi’efuku ku kibalo akitemunwa bu Emeuse, kibadi kula na Yelusalema bu kilometre ekumi na kimune. 14Abo abadi abesamba ha yino myanda yibakitshinwe. 15Bitabibakitshine habadi abesamba na kwihatulushena (abo bana bene) Yesu na mwinyi befubwile hehi, tēnde n’abo. 16Anka meso abo abakwetwe na mindjua biabashyakumushingula. 17E bebehwishe’shi: A yino myanda yi na minyi yanwilungushena, na kutambuka na kwinyongola. 18Biabia umune, eshina die bu Keleohase, bamwalulwile’shi: Obe we anka mwenyi mu Yelusalema, twemwiukye yinyi yibakitshinwe mwanka mu ano mafuku? 19E bālulwile’shi: A nginyi, yinyi? Abo’shi: nyi myanda yinemene kwi Yesu a Nasaleta, badi mutemuki a bukome mu bikitshino na myanda ku mpala kw’Efile Mukulu na bantu boso; 20na mubamufishishe batshiite-bakwidi bakata na batontshi betu, kumuhisha ku lufu, na kumubamba ha mutshi uhingishene. 21Ank’atwe tubadi bakuluhile’shi: Nyi anka e badi akukula Isalele; ungi mwanda, lelo nyi efuku dia kasatu kasha yino myanda yibakitshinwe. 22Na bamo bana-bakashi ba mu kibumbu kietu abetukanyisha, abo abadi ku mashama namashika ese. 23Biabia habashī basanane kitanda kie, abafikile’shi: Tubamono kimonwa kia bamwikeilu, abetulungula’shi: E atala. 24Bamo ba’bo betu abayile ku mashama, abasañene bu bibakwile bana bakashi, anka e winyi tambamumone. 25Henyihaha e bebalungwile’shi: Anwe balotakane, na ba mashimba a kuhuñanya kukumina yoso yibākwilwe batemuki; 26Tayibadi yihwandjikile Kidisitu kufwambuka mu yino myanda, na kutwela mu ntumbo ye su? 27Biabia kubangila kwi Mosesa, na kwi batemuki boso, bebahatulwidile mu Bifundwe-b’Efile bioso, yinyi myanda ya ha mwanda we. 28Binyibiabia, abefubwile hehi na kibalo kiabadi abende: biabia e bahwandjikishe bu akyebe kukila. 29Ank’abo abamwiyayile’shi: Wekale n’etu, mwanda tampehi na ku kiolwa, n’efuku tadidi hehi kushimina. Binyibiabia batwēle kushala n’abo. 30Bitabibakitshine, habashalele n’abo (ha bidibwa) bātshile dimpa, batumbwile, bedibaswile, ebaha. 31Biabia meso abo ababulukile, biabakimūka bibuwa; henyihaha belengyele ku meso kwabo. 32Binyibiabia tabeakushena’shi: Nyi kiatumwene ’mashimb’etu amutembe bu kālo, hesambanga n’etu mwishinda, na hekalanga etufumbwila Bifundwe bi’Efile? 33Binyibiabia abebwele ha yawa nguba, bālukila kwi Yelusalema, abasañene b’ekumi na umune mbekoñene hamune n’abo bābadi n’abo, 34abo’shi: Nfumwetu musangukye binyibinyi, bamwekyela kwi Shimona. 35Biabia’bo tabebalungula yibakitshinwe mwishinda, na mubeukīshe kwabadi ha kubasula kwa dimpa.
36Habadi abākula biabia, Yesu na mwinyi bemene munkatshi mwabo; bebalungwile’shi: Kufukama kwikale kwanudi. 37Ank’abo ababasukile, bakwatwa na moo, tabahwandjikisha’shi: Nyi nkikudi kiatubamono. 38Binyibiabia e bebahwishe’shi: A nkinyi kianutuntu mu mashimba, na kwela mpaka mu mashimb’enu? 39Talai māsa ande na ku ngwa yande, ñanka’mi uno; nkumei maasa numone, mwanda kikudi taki na mbidi na mifulwa, bu bianubamono biandji n’abio. 40Habahwile kwakula biabia, bebaleshe maasa na ngwa. 41Habadi tambakumine ha mwanda wa kusehela, na kukanya, bebalungwile’shi: Nwi na bidibwa kuno su? 42Biabia abamuhele kihindji kia mushiha wēkyele, na kisa kia būki. 43Bebiatshile, tādi ku mpala kwabo. 44Binyibiabia bebalungwile’ shi: Yino nyi yinyi myanda yanenulungwile hanadi nki nenu’shi, myanda yoso wayidi n’ao ngwa kukumbashwa yibadi yifundwe mu mukanda-wa-Mosesa na mu batemuki, na (mu) ñono ya Milangwilo, ha mwanda wande. 45Henyihaha bebabulwile binangu biabo biabadia kushingula Bifundwe bi’Efile. 46E bebambile numu’shi: Nyi mwakibafundjilwe, na mwakibamuhwandjikile Kidisitu kufwambuka, na kusanguka ku lufu h’efuku dia kasatu. 47Eshi, kwilanga kwishimba na kushimangishwa kwa milwisho kwikale akulungulwa mwishina die munkatshi mwa mīlo yoso, kubangila ku Yelusalema. 48N’anwe nwi tumonyi twa yino myanda.
49Talai, nenutumina hanudi mulayilo wa Yaiya’nde; anka nushale mu kibalo kia Yelusalema mpaa n’ahanukekala bafwadikwe na bukome bwa mwiilu.
50Binyibiabia e bebakunkwishe mpaa na ku Betane, bebosheshe maboko e, bebēlele mwabi. 51Bitabibakitshine habadi ebēlela mwabi, balamunwinwe kwabadi, atwadibwa Mwiilu 52N’abo abamulangwidile, balukila ku Yelusalema na kusehela kukata; 53abadi mu ntempelo mafuku oso bakwete kutumbisha Efile Mukulu. Amena.
Currently Selected:
Luka 24: NTLK52
Highlight
Share
Copy
Want to have your highlights saved across all your devices? Sign up or sign in
© 1952 Alliance Biblique de la République Démocratique du Congo