Luka 1

1Ha mwanda be bungi abakuminyine kufunda, mu lulamine bulungudi bwa yaya myanda ayikuminwa binyibinyi munkatshi mwetu. 2Anka mwa betufwishishe’yo kwi’bo abadi bu tumonyi na balungudi ba mwanda w’Efile ku mbangilo. 3Kwandjimi namu kibampwandjikila buwa, kukufundjila myanda yilondene, obe Mwanana Teofilusa, mwanda lushingulo lukalabale lwa myanda yoso nadi nalo, mpā na ku mbangilo. 4Biodio kwiuka biabinyibinyi bia yaya myanda yobolambukishwe.

5Mu mafuku a Heloda, nfumu a Yudea, kubadi tshiitemwakwidi, eshina die mbu Sakadiasa a ku mulongo wa Abiya. Mukashi e badi a ku bana bakashi b’Alone, eshina die dibadi bu Edisabeta. 6Boso bubidi bwabo babādi balulame ku mpala kw’Efile Mukulu, babadi abatambuka mu bishila bioso na milangilo ya Yehowa, bashī batohekwe mwanda. 7Abo tababadi na mwana, mwanda Edisabefa badi nkunga, na bubidi bwabo babadi banunu. 8Bitabibakitshine habakitanga mufubo wa butshiite-mwakwidi, ku mpala kw’Efile Mukulu, mwiyīle mulongo we, 9bu mubadi mulombene kihikwa kia mufubo wa bu tshiitemwakwidi, badi musangulwe kushika bukula bwa mahembwe ha kutwela mu ntempelo ya Yehowa. 10Habakumbene nguba a kushika bukula bwa mahembwe, kibumbu kioso kia bantu kibadi akitekye hāsha. 11Kubamumwekyele mwikeilu a Yehowa, mwimane ku mboko yibalume ya kitala kia kishikilo kia bukula bwa mahembwe. 12Sakadiasa habamumwene, badi na katshima munda, na mō bamukwete. 13Anka mwikeilu bamulungwile ’shi: Totshinanga Sakadiasa, mwanda luteko lwobe lubahushibwa, mpian’obe Edisabeta, akakutandjila mwana mulume, okamuudika eshina die bu Yoano. 14N’obe okekala na kusehela na kusangala, bebungi abakasehela ha kutandwa kwe. 15Mwanda akekala mukata ku meso kwa Yehowa, takatomo sunga nfinyo, sunga mbia kukolwana; e akaushwa na Kikudi-E-Selelee kwibedi kwa nyin’e tabandjile kumutanda. 16Akālula bana ba Isalele be bungi kwi Yehowa Efile Mukulu abo. 17N’e akēnde ku mpala kwe n’eshimba bu dia Elaidja na bukome bwe; mwanda wa kwalulusha mashimba a bashabo kwi bana babo; na bashi na kukokyela ku binangu bia balulame; na mu kulumbulwilwa Efile Mukulu bantu be na mashimb’abo ahwe kulumbulwa. 18Biabia Sakadiasa baihwishe mwikeilu’shi: Nankeuku wawa mwanda na minyi mwanda’mi tandji mununu, na mpiana’nde tadi na bihwa bibungi? 19Mwikeilu hakwalula bamulungwile’shi: Ami nyi Ngabudiele, naimana ku mpala kw’Efile Mukulu; natumibwa kwisamba n’obe, na kukulesha uno mukānduwibuwa. 20Talanga! okekala kamama, tokākula mpaa na h’efuku adikakitwa uno mwanda, ha mwanda twemukumine myanda yande, ayikakumbashwa ha kihindji kiayo. 21Na bantu abadi abēsha Sakadiasa, abakanyine bibashalele kihindji kikata mu ntempelo. 22Habatukile bakutshilwe mwa kwakwila na’bo; abashingulwile’ shi: bamono kimonwa mu ntempelo; mwanda e bebahaleshe na mboko, tadi kamama. 23Bitabibakitshine habakumbene mafuku a mufubo we bakatukile, ēnda kw’e. 24Kumongo kwa aa mafuku, mpian’e Edisabeta baimite eimi, befīle mieshi yitano’shi, 25Nyi mbiabia Efile Mukulu bankitshinyine mu mafuku abantāle, kunkasha būfu bwande munkatshi mwa bantu.

26Mu mweshi wa kasamombo, winyi mwikeilu Ngabudiele batuminwe n’Efile Mukulu ku kibalo kia Ngadilea, akilumbwa bu Nasalete. 27Kwi nsongwakashi kamame muladikwe na mulume, eshina die bu Yosefe, a mu kifuko kia Dafidi; eshina dia nsongwakashi kamame dibadi bu Madiya. 28Na mwikeilu batwele mwādi bakwile’shi: Nakwimuna, obe n’Efile bikata. Efile Mukulu E n’obe; we sha mwabi munkatshi mwa bana bakashi. 29Habamumwene badi na katshima munda ku mīsambo ye, beihwishe mwishimba die’shi, A luno lwimuno namu lwi na minyi? 30Biabia mwikeilu bamulungwile’shi, Madiya, totshinanga, mwanda obe n’efile kw’Efile Mukulu. 31Tala! okemit’ēfu, otande mwanamulume, okamuudika eshina bu Yesu. 32Akekala mukata, akalumbwa bu Mwan’a Mukile-mwiilu; na Yehowa, Efile Mukulu akamuha luhun’a nsulu lwa nshye Dafidi. 33N’e akabikala hanundu ha kifuko kia Yakoba, mpā na kwikala-ika; na ku bufumu bwe tabukekakala kibikwilo. 34Henyihaha, Madiya behwishe mwikeilu’shi: A kino akikakitshibwa na minyi, mwanda ntshimwiukye mulume? 35Mwikeilu bamwalulwile’shi, Kikudi-E-Selelee akafiki hodi, na bukome bwa Mukile-mwiilu abukakubwikila bu mutala; biabia namu akia kiokatanda kihatulwe-kikishila akikalumbwa bu Mwan’Efile Mukulu. 36Talanga namu: mukwenu a kifuko Edisabeta, baimita namu mwana mulume ku bununu bwe, na uno nyi mweshi wa kasamombo, e abādi abalumbwa bu nkunga. 37Mwanda kw’Efile Mukulu takwi kiakumukambila, ooo. 38Biabia, Madiya bakwile’shi: Talanga’mi nyi mpika mukashi a Yehowa, wikale n’ami mwiyile eyi diobe. Na mwikeilu bakatukile kwadi.

39Na mu aa mafuku Madiya bebwele, bayile lubilo mu nsenga ya ngulu, mu kibalo kia Yuda. 40Batwēle mu nshibo ya Sakadiasa, bemwine Edisabeta. 41Bitabibakitshine, Edisabeta ha kuhusha kwimuna kwa Madiya, mwana batumbukile mwifu die; n’Edisabeta baulwe na Kikudi-E-Selelee; 42Bakwile n’eyi dikata’shi: We sha mwabi munkatshi mwa bana bakashi, na ki mwifu diobe nkia mwabi namu. 43A uno mwanda wi na minyi ubafiki nyin’a Nfumwami kwandjimi? 44Talanga! habafik’eyi dia kwimuna kobe mu matwi ande, mwana batumbuka munda mwande ha mwanda wa kusehela. 45Mwabi kwi yawa bakuminyine; mwanda akukekala kukitshibwa kwa yaya myanda yibamulungwilwe kwi Yehowa.

46Biabia Madiya bakwile’shi: Eshimba diande aditumbisha Yehowa, 47Na kikudi kiande akisehela mw’Efile Mukulu muhashi ande. 48Mwanda batadile ha mwikelo wa kuheleshwa kwa mpik’e mukashi: Talanga! mpaa na bino, bihungilo bioso abikañitanyina bu sha mwabi. 49Mwanda yawa e na katshintshi bankitshina bintu bikata N’eshina dia ndjihatulwe-di-kishila. 50Lusa lwe lwi ku bihungilo na bihungilo kwi’bo abamutshinyi. 51Balesheshe bukome na mboko ye; Bahalakeshe basha kwisadika mu mpwandjikisho ya mashimba’bo. 52Baheleshe basha matalwa ku mpuna yabo; bakamishe bantu ba bisumanga. 53Bausha basha nsala na bintu bibuwa, na bampeta ebālusha bisumanga. 54Basambile Isalele mufubi E, lia kutentekyesha lusa lwe. 55Mu bakwidile kwi bashyetu, kwi Abalahama na ku twikulu twe kwikala-ika. 56Madiya bashalele n’e hehi mieshi yisatu, biabia balukile kwabo.

57Henyihaha kihindji kia Edisabeta kibakumbene kia kutanda, batandjile mwana mulume. 58Bekashi n’e na bakwabo ba kifuko abahushishe mu bamulesheshe Efile Mukulu lusa lukata, abasehelele n’e. 59Bitabibakitshine, h’efuku dia mwanda abafikile kusala mwana; bamūdikye bu Sakadiasa, mwiyile eshina dia nshye. 60Nyin’e bālulwile’shi: Ooo, tandiadia, akaudikwa bu Yoano. 61Abamulungwile’shi: Takwi muntu mu kifuko kiobe mūdikwe diadi’eshina, ooo. 62Abahwandjikishe nshye mifunda’shi: Omūdika bu’nyi? 63Biabia, batekyela kia kufunda, afunda hanka’shi: Eshina die mbu Yoano. Boso abakanyine. 64Ku leanwa kwe kubabulwilwe anka kahindji n’āka, n’edimi di’e hamune; bakwile, tatumbishe Efile Mukulu. 65Na moo ubakwete boso abadi bashale hehi n’abo; na yino myanda yoso yibalungwilwe ku nsenga yoso ya ngulu a Yudea. 66Biabia boso abahushishe, abeyibikile’mashimba’bo’shi: A uno mwana akekala kihaso kinyi? n’easa dia Yehowa dibadi n’e.

67Nshye Sakadiasa baushishwe na Kikudi-E-Selelee batemukile’shi: 68Mwabi wikale kwi Yehowa Efile Mukulu a Isalele mwanda basambile bantu be, na kwibafishisha kikudilo. 69Betwibweshesha lusengwa lwa kihandjilo mu nshibo ya mufubi e Dafidi. 70Mu bakudile ku kanwa kwa batemuki be bahatulwe-be-kishila, abadi bekale ku mbangilo kwa hanohansenga mpaa na binobino. 71Eshi, tukahashibwa kwi beshikwene n’etu, na kwiasa diabetushikwa boso. 72Kusamba bashyetu lusa, na kunangushena kilombeno ki’e kihatulwe-ki-kishila. 73Nyi mutshiho ubatshihile kwi nshyetu Abalahama. 74Eshi, etukumine’twe bamañunwe mu maas’abeshikwene n’etu, tumulangwile kushī na moo; 75mu kuhatulwa-kwi-kishila na kululama ku mpala kw’e, mpaa na mafuku oso a muwa w’etu. 76N’obe mwana, okalumbwa bu mutemuki a Mukile-mwiilu, mwanda okabadila ku mpala kwa Yehowa kumulumbulwila mashinda E. 77Kuha bantu b’e kiukilo kia kihandjilo mu kulekyelwa kwa myanda yabo. 78Ha mwanda wa kutshitshimuka kwa kanya k’Efile Mukulu etu. Nyi habetufikila kutunduka kwa nguba mwiilu manyanya. 79Kumunyika’ba bashale ’mufito na mu mwesheshi wa lufu. Kukunkusha ngwa yetu mwishinda dia kufukama. 80Na mwana bakūle, banyingile mwishimba, badi mu tubāka mpaa na kwifuku dia kumwekwa kwe kwi Isalele.

Currently Selected:

Luka 1: NTLK52

Highlight

Copy

Compare