Ba-Loma 16
16
1Emi leyanya Foibe eneyal’ino la lokumo: ende eyali mbangela eniso, bosali bon’ekelesia eneyali ena Kenkulea; 2lacin’eho bosangel’ende eneyali Nkolo yoka bosamb’onokoli la ban’oeka, ko bokamby’ende en’ekambwa en’etaketaka enalang’ende eneyal’ino; lacin’oka endamene ayalamaki bokambi bon’ato bike, ko amonkamby’emamene nkoho.
3Besa Pulisekila la Akwila, banambana l’emi en’osala bona Masiya Yesu; 4iyo banambyaki nkingo iniyoamene en’ewedi lacin’ena liiko lonami; banakang’iyo lokango ef’emi kei: nko bikelesia bihitu bina Befenda behetu. 5Ko besa baise ekelesia eneyali en’otumb’oniyo. Besa Epaineto onolangama l’emi, ende onoyali bomamo bon’oso eneyali Masiya ena Asia. 6Besa Malia, onokambaki bikambwa bike lacin’enino. 7Besa Anduloniko ko la Yunia, mbotwa inami banatungamaki l’emi en’onyolo; iyo bayali la lokumo eneyali bikima, ko bayaaki bana-Masiya en’oso’onami. 8Besa Ampuliato onolangama eneyali Nkolo. 9Besa Ulubano onokambaki l’emi en’osala bona Masiya, ko la Setakusa onolangama l’emi. 10Besa Apele onotangam’olotsi eneyali Masiya. Besa iy’anayali en’oloi bona Alisitobulu. 11Besa Elodiana onotwa l’emi. Besa iy’anayali eneyali Nkolo en’oloi bona Nalukiso. 12Besa Tulufaina ko la Tulufosa banakamb’ikambwa eneyali Nkolo. Besa Pelusi onolangama, onokambaki bikambwa bike eneyali Nkolo. 13Besa Lufu onosonama eneyali Nkolo, ko la nyango enande l’emi. 14Besa Asunkulito ko la Felengono, ko la Eluma, ko la Pateloba, ko la lilumo, ko la bifili biniyali l’iyo. 15Besa Filolongo ko la Yulia, ko la Neleu ko la mbangela enande, ko la Olumpa, ko la ban’oeka bahatu banayali l’iyo. 16Besana la ndeyana bolumba bon’oeka. Baise bikelesia bina Masiya bihitu bakees’ino.
17Koko lakoond’ino, bifili, boongya lilenda iy’anila bikambwanelo ko la bikumbelo eneyal’ino, kuma bayumbele lilako linalik’in’olakamaka, ino bum’eneyal’iyo. 18Bato ban’omun’oho bafasaele Nkolo eniso Yesu Masiya: basaela bakunju baniyoamene; ko bayonge betema ben’ato banafana locili longo la baoyi’aniyo ban’efefodyi la bana bolambyalambya. 19Lacina bosimo bon’imeedyo inino bomosekola eneyali bato bahatu. Lacin’eho, lakonyangel’ino; koko lalanga lacina boyalame bana bomwu en’aoyi ban’olotsi, ko bato bana soto ena likambo lin’aoyi’owe. 20Koko efan’olingolingo Yakomba ena mwi angikamela Satana en’ase ban’akak’anino.
Isei ina Nkolo eniso Yesu Masiya iyalamake eneyal’ino.
21Timoteo onambana l’emi en’osala, ko la Lukio, la Yasona, la Sosipatulo banotwa l’emi bakees’ino. 22Emi Telutio onoteng’okanda lakees’ino eneyali Nkolo. 23Ngayo ononsangel’emi ko l’ekelesia ehatu en’otumb’onande, akees’ino. Elasito, bomonyi bon’osolo bon’onyanga, akees’ino, ko la Kwaluto efili nk’osamb’oho. 24(Isei ina Nkolo eniso Yesu Masiya iyalamake eneyal’ino. Ndoho.) 25Koko eneyal’ende oninya likokiky’ino yoka bosamb’onoyali bosimo’onami bon’olotsi ko la nsumola ena bosimo bona Yesu Masiya, yoka bosamb’onoyali enyelo ena yoi lina bofisafisa linalitasumolama ena bisike biniki’oso, 26ohonde isanga limenya, ko limeyana eneyali baise benyanga behetu lacin’eho bafike liho l’imeedyo, lacin’en’ekanda bena basumoli, yoka bosamb’onoyali lotomo lona Yakomba ena bisike bihitu: 27lokumo eneyali Yakomba ena bomwu nk’ende emoko kei, la Yesu Masiya, bisike la bisike. Ndoho.
Currently Selected:
Ba-Loma 16: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
