Bikambwa Biniki Bikima 25
25
1Eneki Feseto omatsaka bosala en’onyang’oho, ko bekolo besaso beokala, auma ena Kaisalia ko aocoa Yelusalema. 2Ko nkanga ina toome l’ato bana lifoka bana Ba-Yuda bamosumola likambo lina Paulo; ko bamoonda, 3lacin’eho akamby’iyo ena likambo liniyo la Paulo, ko aelele Paulo ena Yelusalema; koko iyo bamoangel’eango lacina baoyake ena mboka. 4Koko Feseto aamba, ate, Paulo atungi nk’ena Kaisalia, ko efan’olingolingo emamene nongocoa meho. 5Koko ate, Bamoi’anino bana lifoka bocu l’emi, ko yombo likambo liyali eneyali boto’one, boakole.
6Eneki’nd’okisak’ase eneyal’iyo bekolo mwambi yombo jo, autwa ena Kaisalia; ko en’ina bona loi aokisase en’ieko in’akambo, ko aotoma yoi lacina baye la Paulo. 7Ko eneki’nd’oyaka, Ba-Yuda banayaki ena Yelusalema baemala eneyal’ende nko nsambanya, ko bamoakola la baoyi bike bana locili mene banatakolan’iyo likikya baho yoka bayali solosolo. 8Koko Paulo aokutola, ate, Emi ntafunzafunza basangya bana Ba-Yuda, ko la boeka bon’otumba bona Yakomba, ko ntilela Kaisala yoi lin’owe. 9Koko Feseto, lacin’eneki’nd’olangaka lokumo lona Ba-Yuda, aokutwelo Paulo, ate, Olanga nde ocu Yelusalema, la ntende likambo lin’aoyi’ane meho? 10Koko Paulo aila, ate, Emi njemali en’etendelo en’akambo ena Kaisala, ko likambo linami yakolana l’etendelo ene kei; ntilela Ba-Yuda yoi limoko lin’owe, ko eamene ofunge yoi liho. 11Yomb’emi nde nde bokambi bon’owe, ko yombo mokamba yoi linalikoli l’ewedi, emi mpakile lacina ncu en’ewedi; ohonde yombo baoyi’aho banambakol’iyo bayali nko mpoci, efakolana lacina boto andekya en’akas’aniyo. Emi latoma likambo eneyali Kaisala mene. 12Nkwaho Feseto, eneki’nd’otendanaka la likita, aamba, ate, Omotoma likambo eneyali Kaisala; ongocoa nk’eneyali Kaisala.
13Ko eneki bina bemoi osilaka, Agulipa Lifoka lina roi la Belunike baoya ena Kaisalia oyesa Feseto. 14Ko enek’iy’okindaka meho ipaputa, Feseto aosumola lifoka likambo lina Paulo, ate, Boto’omoi onoki Felika ocikaka en’onyolo ayali; 15ko eneki’m’oyalaka ena Yelusalema, nkanga ina toome la bingambe bina Ba-Yuda baonsumola likambo linande, ko baolanga lacina njokoiya likambo. 16Lomakutwela, emite, Efa bokotua bona Ba-Loma lacina balekya boto en’ekwelo ena likambo kum’ende l’aakoli’anande batukana, ko boto’oho aat’elokwelo en’oloko’onande ena likambo linoakol’iyo. 17Ko enek’iy’osolonganaka, emi ntalingalinga, ohonde en’ina bona loi lokisase en’ieko in’etendelo en’akambo, ko lotoma yoi bayi l’oto’oho. 18Koko eneki baakoli’anande oemalaka, batoakola yoi limoko linaliki’m’olengedyaka: 19bamoakola nko baoyi’amoi ban’ekumedyo ena Yakomba eniyo, ko lacin’ena boto’omoi oka Yesu onowaki, onoki Paulo oilaka ate ayaike. 20Emi lokandakanda la bokotua bonongi’m’osisola baoyi’aho, ko lomuufola yombo alanga lacina acu Yelusalema, lacin’eho batende li kambo linande lin’aoyi’ane meho. 21Ohonde eneki Paulo otomaka likambo linande eneyali Kaisala mene lacina litendame enek’ende, emi lotom’onyua lacina baotombanya, yengoko kuma laat’etelo oyotoma eneka Kaisala. 22Ko Agulipa aosumola Feseto, ate, Emi nsokolanga lacina ndofe boto’oho emamene. Ate, Ongolofa nko loi.
23En’ina bona loi, eneki Agulipa la Belunike oyaka l’okombe mene, ko baotua en’otumba bon’akambo, iyo la commandants la bingambe bin’onyanga, Feseto aotoma yoi ko baotoya Paulo. 24Ko Feseto aila, ate, Lifoka Agulipa l’ato bahatu banayali mendo, ino bena boto’one, onoki bonyanga bohotu bona Ba-Yuda, l’ena Yelusalema le mendo, ombondaka ena likambo linande, ko baololua, Mbo afakolana lacina aike lakina. 25Emi njenaki oka atila yoi limoko linalikoli l’ewedi; ko eneki endamene otomaka likambo eneyali Kaisala, njalamaki la lisangya lacina njotome nko meho. 26Ohonde mpana yoi litutuma linalingi’m’otengela nkolo enami. Lacin’eho, molofodya en’oso’onino, koko en’oso’oneamene, Lifoka Agulipa, lacin’eho enosisol’iso emi mbate yoi litutuma linalingi’m’otenga; 27lacin’oka efaonge ntoma boto onotungi en’onyolo kuma totasakitola baoyi banatangam’ende l’aho.
Currently Selected:
Bikambwa Biniki Bikima 25: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
