Loma 9
9
Ntantu ya Paulu sambu na Isaeli
1Mono tuba mambu ya kieleka mu Klisto, mono kusa ve, kadi kansansa ya mono ikele kutuba kitemo sikamosi na mono mu Mpeve Yanlongo, 1 Tim. 2:7
2sambu na ntantu mingi ikele na mono, ye mpasi ya konda kumana mu ntima ya mono. Lom. 10:1
3Kadi mono lenda kuzola na mono katuka na Klisto bonso mu ndola, sambu na bampangi ya mono, ikele bibutu ya mono mu nsuni. 2 Mose 32:32
4Bau ikele baIsaeli, kwa bau ikele kimwana ye nkembo ye baluwawanu ye peswa ya nsiku ye kisalu ya Nzambi ye bansilulu,
5batata ikele tuka baIsaeli ya basisaka Klisto mu nsuni, ya ikele va zulu ya bima yonso; Nzambi sakumunwa mvu ya mvu. Amen.
Bansilulu ya Nzambi
6Kansi ikele ve bonso mambu ya Nzambi imene kwiza mpamba, ka diyonso ya basika na Isaeli ikele Isaeli ve, 4 Mose 23:19; Lom. 3:3; Yoa. 8:39
7bau yonso ikele bana ve sambu bau ikele nkuna ya Abalahami; kansi: Mu Isaki nkuna ya nge tabingwa, Eb. 11:18
8mpilayai, bana ya nsuni ikele ve bana ya Nzambi, kansi bana ya nsilulu ikele kutangwa nkuna.
9Kadi yai ikele ya nsilulu kutuba: Bonso mu nsungi yai mono takwiza, ye Sala tavanda na mwana.
10Kaka yai ve, kansi Lebeka mpe imene kuyimita ya mosi, Isaki tata ya beto. 1 Mose 25:21
11Kadi bu bana imene kubutuka ve, keti imene kusala kima ya mbote keti ya mbi ve, na lukanu ya Nzambi lenda kutelema bonso yo solwa, yo ikele sambu na bisalu ve, kansi sambu na yandi ya bingaka,
12yo tubwaka kwa yandi: Mbuta tavanda mpika ya nleke, 1 Mose 25:23
13bonso yo ikele kusonama: Mono zola Yakobi, kansi mono zolaka Esau ve. Malaki 1:2, 3
Nsodolo ikele sambu na nkenda ya Nzambi
14Buna beto tatuba nki ? Konda ya lunungu ikele na Nzambi ? Mpilayai ve! 5 Mose 32:4; 2 Lus. 19:7; Yobi 8:3; 34:10
15Kadi yandi tubaka kwa Mose: Mono takuwila nkenda kwa konsonani ya mono kuwila nkenda, ye mono tasonga nkenda kwa konsonani ya mono tasonga nkenda. 2 Mose 33:19
16Mpilayai yo ikele ve kwa yandi ya zola keti kwa yandi ya teza ntinu, kansi ya Nzambi ya kuwila nkenda.
17Kadi masonukwa tubaka kwa Falao: Sambu na mambu yai mono telemisaka nge, na mono lenda kusonga ngolo ya mono mu nge, na nkumbu ya mono lenda kusamunwa mu ntoto yamvimba. 2 Mose 9:16
18Buna yandi kuwila nkenda kwa konsonani ya yandi zola, ye pesa ntima ngolo kwa konsonani ya yandi zola.
19Buna nge tatuba kwa mono: Sambu na nki yandi semba ti ntangu yai ? Kadi nani ikele kubuya luzolo ya yandi.
20Ve, muntu, nge ikele nani ya vutula kwa Nzambi ? Kima ya wumbwa lenda kutuba kwa musadi ya yo: Sambu na nki nge salaka mono mpilayai ?
21Muwumbi ikele na ngolo na zulu na ntoto ya luwumba ve na kusala sobwa mosi nzungu, mosi ya nzitusu kansi na yankaka ya konda nzitusu ? 2 Tim. 2:20
22Kansi buna nki ? Nzambi zola kusonga makasi ya yandi ye kuzaisa ngolo ya yandi, ibuna yandi vibidilaka mu ntatumunu mingi bawumbwa ya makasi ya lunga ku mpasulu,
23yandi salaka yai na yandi lenda kuzabisa mpe kimvwama ya nkembo ya yandi va bawumbwa ya nkenda, ya yandi salaka ntete ku nkembo,
24ikele beto ya yandi bingaka mpe, tuka na baYuda kaka ve, kansi tuka bapaien mpe.
25Bonso yandi tubaka mpe mu Hosea: Bau ya ikele bantu ya mono ve, mono tabinga bau bantu ya mono, ye yandi ya konda zolwa, tabingwa yazolwa; 1 Pet. 2:10
26yo tavanda mpilayai, mu sika ya tubwaka kwa bau: Beno ikele bantu ya mono ve, kuna bau tabingwa bana ya Nzambi ya moyo. Hos. 2:23
27Ye Yesaya bokaka sambu na Isaeli: Kana ntalu ya bana ya Isaeli ikele bonso zelo ya mbu, kaka kibuka fioti tavuluswa. Lom. 11:5
28Kadi Mfumu tazenga mambu nswalu ye manisa yo va ntoto. Yes. 10:22; 28:22
29Bonso Yesaya tubaka ntete: Kana Mfumu Sabaoti bikilaka beto nkuna ve, beto imene kwiza bonso Sodoma, beto imene kusalwa bonso Ngomola. Yes. 1:9
Lunungu ikele kubasika mu lukwikilu
30Buna nki beto tatuba ? Bapaien ya landaka lunungu ve imene kubaka lunungu, yo ikele lunungu ya lukwikilu,
31kansi Isaeli ya landaka nsiku ya lunungu, imene kukuma na nsiku yina ve. Lom. 10:2; 11:7
32Sambu na nki ? Sambu na bau landaka yo ve mu lukwikilu, kansi mu bisalu; bau kutaka sakuba na ditadi ye nteso ya sakuba,
33bonso yo ikele kusonama: Tala, mono tula mu Sioni ditadi ya teso sakuba, ye ditadi ya mbwilu, konso ya kwikila yandi tamona nsoni ve. Lom. 10:11
Currently Selected:
Loma 9: NTK50
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
