Loma 11
11
Kubuya ya Isaeli
1Buna mono tuba: Nzambi kulaka bantu ya yandi ? Mpilayai ve! Kadi mono mpe ikele muIsaeli mu nkuna ya Abalahami, ye mu kikanda ya Benjamini. 5 Mose 4:31; Nk. 94:14; 1 Sam. 12:12; Fili. 3:5
2Nzambi kulaka bantu ya yandi ve, ya yandi zabaka ntete. Beno zaba ve ya masonukwa tubaka mu Elia ? Bonso yandi fundaka Isaeli kwa Nzambi.
3Mfumu, bau imene kufwa bambikudi ya nge, bau imene kupasula mazikwa ya nge, ye mono mosi bika ye bau sosa moyo ya mono. 1 Nt. 19:10
4Kansi Nzambi vutulaka nki kwa yandi ? Mono bika kwa mono kibeni babakala mafunda nsambwadi, ya imene kufukama ve kwa Bali. 1 Nt. 19:18
5Mpilamosi mpe ntangu yai, kibuka ya fioti imene kubika, bonso nsodolo ya nlemvo. Lom. 9:27
6Kansi kana yo ikele sambu na nlemvo, yo ikele sambu na bisalu ve, kana ve nlemvo ikele nlemvo diaka ve. 5 Mose 9:4; Lom. 4:4; Ngal. 2:16
7Buna nki ? Yina ya Isaeli sosaka, yandi bakaka yo ve, kansi basolwa bakaka yo, kansi ntima ya bankaka kwizaka ngolo.
8Bonso yo ikele kusonama: Nzambi pesaka bau mpeve ya tulu, meso ya konda kumona, ye makutu ya konda kuwa, ti lumbu yai. Yes. 6:9
9Davidi tubaka: Bika meza ya bau salwa siongi ye ntambu, ye sinza ya tesa sakuba, ye vutula nsendo kwa bau.
10Bika meso ya bau vanda tombe na bau lenda kumona ve, ye konikika nima ya bau ntangu yonso.
Mpulusu ya bapaien kitukaka mpulusu ya Isaeli
11Buna mono yuvula: Bau kutaka sakuba, na bau takubwa ? Mpilayai ve! Kansi sambu na mbwilu ya bau, mpulusu kwizaka kwa bapaien, sambu na kusala bau kuvanda na kimpala.
12Kansi kana mbwilu ya bau ikele kimvwama ya nsi ye mvilu ya bau ikele kimvwama ya bapaien, buna fuluka ya bau tavanda nki mpila ?
13Mono tuba kwa beno bapaien. Sambu na mono ikele ntumwa ya bapaien, mono kembila kisielo ya mono; Bis. 9:15; 13:2; 22:21; Lom. 15:16; Ngal. 1:16; 2:2, 7; Ef. 3:8; 1 Tim. 2:7
14kana mono lenda kutelemisa kimpala mu bau ya ikele nsuni ya mono, ye vulusa bankaka ya bau. Lom. 9:3; 1 Kol. 9:22; 1 Tim. 4:16
15Kadi kana loswa ya bau ikele kuvutula ya nsi kwa Nzambi, buna kubaka ya bau tavanda nki mpila, yo tavanda moyo tuka bafwa ?
16Kadi kana mabundu ya ntete ikele nlongo, buna mpilayina sobwa yonso ya mampa tavanda nlongo mpe; kana mwanzi ikele nlongo, buna mavala mpe.
Sambu na yai baIsaeli tabakwa diaka
17Kansi kana mavala yankaka zengwa, ye nge ya vandaka nti ya olive ya mfinda imene kutulwa nakati na bau, ye nge ikele na ntuadi na mwanzi ye ya mafuta ya nti ya olive,
18buna yana ve sambu na mavala, kansi kana nge yana, zaba na nge ikele kunata mwanzi ve, kansi mwanzi ikele kunata nge.
19Buna nge tatuba: Mavala zengwaka na mono lenda kutulwa mu yo.
20Ikele mbote; bau zengwa sambu na bau konda lukwikilu, kansi nge telema mu lukwikilu ya nge. Ditombola ve, kansi vanda na boma. Yes. 66:2; Fili. 2:12; Eb. 3:19; 4:2
21Kadi kana Nzambi buyaka ve kukatula mavala kanda kubuta, yandi tabuya ve kukatula nge mpe.
22Buna tala, mbote ye makasi ya Nzambi, makasi kwa bau ya kubwaka, kansi mbote ya Nzambi kwa nge, kana nge vanda mu mbote ya yandi, kana mpilayai ve nge mpe tazengwa. Yoa. 15:2; Eb. 3:14; 10:29
23Bau mpe tavutulwa kana bau bika konda lukwikilu ya bau; sambu na Nzambi lenda kuvutula bau mu yo. Lom. 14:4
24Kadi kana nge zengwa na nti ya olive ya mfinda, ye nge imene kutulwa mu nti mbote ya olive mu nzila yankaka, ibuna ya kuluta yai, mavala yai ya kieleka, tavutulwa mu nti ya olive ya bau kibeni.
BaIsaeli tavuluswa
25Bampangi, mono zola ve beno konda kuzaba mambu yai ya kinsweki, na beno ditombola ve mu ngangu ya beno, na kimpofo ndambu kubwaka va Isaeli, ti kifulusilu ya bapaien imene kwiza.
26Buna Isaeli yamvimba tavuluswa bonso yo imene kusonama: Mu Sioni, tabasika Mvulusi, yandi takatula konda ya vumi ya Nzambi tuka Yakobi.
27Yai ikele luwawanu ya mono kwa bau, bu mono takatula masumu ya bau.
28Sambu na nsamu mbote, bau ikele bambeni sambu na beno, kansi sambu na nsodolo, bau ikele bazolwa sambu na batata.
29Kadi Nzambi lenda kupinduka mabanza ve sambu na matabisi ya yandi ye bingwa ya yandi.
30Kadi bonso mu ntangu ya lutaka, beno kolamaka Nzambi, kansi ntangu yai beno imene kubaka nkenda sambu na nkolomono ya bau,
31mpilayai bau mpe imene kukolama, sambu na beno songwa nkenda, bau mpe lenda kubaka nkenda.
32Kadi Nzambi imene kukanga bau yonso ku nkolomono, na yandi lenda kuwila bau yonso nkenda. Ngal. 3:22
33O mudindu ya kimvwama, ye ngangu, ye nzailu ya Nzambi! Muntu lenda ve kutendula mfundusu ya yandi, ye teza banzila ya yandi. Yobi 11:7; Nk. 92:5
34Kadi nani zaba mabanza ya Mfumu ? Keti nani imene kuvanda nlongi ya yandi ? Yes. 40:13; Yel. 23:18; 1 Kol. 2:16
35Keti nani imene kupesa yandi bima ntete, na yandi tavutula yo diaka ? Yobi 41:2
36Kadi ya yandi ye mu yandi ye kwa yandi bima yonso ikele. Nkembo kwa yandi mvu ya mvu. Amen. Lom. 16:27; 1 Kol. 8:6; Eb. 2:10
Currently Selected:
Loma 11: NTK50
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
