Matai 7
7
Yesu manisa kulonga va mongo
1Fundisa ve, ye beno tafunduswa ve. Luk. 6:37; Lom. 2:1; 1 Kol. 4:5; Yak. 4:11
2Kadi na mfundusu ya beno fundisa, beno tafunduswa; ye kitezo ya beno teza yo tatezwa kwa beno. Mal. 4:24; Luk. 6:38
3Sambu ma nki nge mona kanti ya ikele mu disu ya mpangi ya nge, kansi nge tala ve nti ya nene ya ikele mu disu ya nge ? Luk. 6:41
4Keti nki mpila nge tatuba kwa mpangi ya nge: Bika mono katula kanti na disu ya nge, ye tala, nti ikele mu disu ya nge kibeni ?
5Nge nkwa luvunu, ntete katula nti yanene na disu ya nge kibeni, buna nge tamona mbote kukatula kanti na disu ya mpangi ya nge.
6Pesa yina ya ikele nlongo kwa bambwa ve, mpe losa ve matadi nzimbu ya beno nantwala ya bangulu, kadi bau tadiata yau nansi ya bitambi ya bau ye pinduka ye lwadisa beno.
7Lomba ye yo tapeswa kwa beno, sosa ye beno tamona, kunkuta ye yo takangulwa kwa beno. Mat. 21:22; Mal. 11:24; Luk. 11:9; Yoa. 14:13; 15:7; 16:23; 1 Yoa. 3:22
8Kadi konsonani ya lomba tabaka, konsonani ya sosa tamona, konsonani ya kunkuta yo takangulwa. Yak. 1:5-6
9Muntu nki nakati ya beno, kana mwana ya yandi lomba dimpa, yandi tapesa yandi ditadi ? Luk. 11:11
10Keti kana yandi lomba mbizi ya masa, yandi tapesa yandi nioka ?
11Buna kana beno ya ikele mbi zaba kupesa bana ya beno matabisi ya mbote, buna Tata ya beno, ya ikele mu zulu taluta kupesa bima ya mbote kwa bau ya lomba yandi ?
12Sambu na yai, konso nki ya beno zola bantu kusadila beno, yina beno sadila bau mpe, kadi yai ikele nsiku ye bambikudi. Mat. 22:39, 40; Luk. 6:31; Lom. 13:8, 10; Ngal. 5:14; 1 Tim. 1:5
13Kota mu mwelo ya fioti, kadi mwelo ikele nene ye nzila ikele nene ya kulumuka ku lufwa, ye mingi ikele kukota muna.
14Kadi mwelo ikele fioti ye nzila ikele fioti ya twala ku moyo, kansi ndambu ikele kumona yo.
15Dikeba sambu na bambikudi ya luvunu, ya kwiza kwa beno mu mvwatu ya mameme, kansi nakati bau ikele bambizi ya makasi. Mika 3:5; 2 Tim. 3:5
16Beno tazaba bau sambu na mabundu ya bau. Bantu ikele kubuka mabundu ya vinia na nti ya nsende, keti figi na matiti ya nsende ?
17Mpilayai mpe, nti yonso ya mbote ikele kubuta mabundu ya mbote, kansi nti ya mbi ikele kubuta mabundu ya mbi. Mat. 12:33; Luk. 6:43, 44
18Nti ya mbote lenda ve kubuta mabundu ya mbi, ye nti ya mbi mpe lenda ve kubuta mabundu ya mbote.
19Konso nti ya buta mabundu ya mbote ve tazengwa ye loswa mu tiya. Mat. 3:10; Yoa. 15:2, 6
20Mpilayai beno tazaba bau sambu na mabundu ya bau.
21Ikele yonso ve ya tuba kwa mono, Mfumu, Mfumu, takota mu zulu. Kansi yandi ya sala lusolo ya Tata ya mono ya ikele mu zulu. Hos. 8:2; Luk. 6:46; Lom. 2:13; Yak. 1:22
22Mu lumbu yina mingi tatuba kwa mono: Mfumu, Mfumu, mono imene kubikula mu nkumbu ya nge ve ? Beto imene kubasisa bampeve mbi mu nkumbu ya nge ve ? Ye imene kusala bisalu ya ngolo mu nkumbu ya nge ve ?
23Buna mono tatuba kwa bau: Mono imene kuzaba beno ta mbala mosi ve, katuka na mono, beno ya sala mbi. Nk. 6:8; Mat. 25:12, 41; Luk. 13:26, 27
24Sambu na yai, konso muntu ya kuwa mambu yai ya mono, ye sala yau; ikele mpilamosi bakala ya ngangu, ya tungaka nzo ya yandi va ditadi. Luk. 6:47, 48
25Mvula kubwaka ye nkuka kwizaka ye mupepe vevumukaka ye bulaka nzo yina, ye yo kubwaka ve, kadi lufulu tulwaka va ditadi.
26Konso muntu ya kuwa mambu ya mono, ye sala yau ve, ikele mpilamosi bakala ya nzoba, ya tungaka nzo ya yandi va zelo.
27Mvula kubwaka ye nkuka kwizaka ye mupepe vevumukaka ye bulaka nzo yina, ye yo kubwaka, ye mbwilu ya yo vandaka ya nene.
28Yo vandaka, bu Yesu manisaka mambu yai, bibuka yitukaka sambu na malongi ya yandi.
29Kadi yandi longaka bau mpilamosi yandi ikele na ngolo, ye mpilamosi bansoniki ya bau ve. Mat. 1:22; Luk. 4:32; Yoa. 7:45
Currently Selected:
Matai 7: NTK50
Highlight
Share
Copy
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.