1 Kolinto 3
3
Paulu songa yandi ye Apolo ikele basielo kaka
1Bampangi, mono lenda ve kutuba kwa beno bonso kwa bankwa kimpeve kansi bonso kwa bankwa kinsuni, bonso kwa bana fioti mu Klisto. Eb. 5:12; 1 Pet. 2:2
2Mono pesaka beno mabele, kansi madia ya ngolo ve, kadi beno lungaka na yau ve, e, ntangu yai mpe beno lunga ve;
3kadi ti ntangu yai beno ikele bankwa kinsuni. Kadi nakati na beno ikele kimpala ye kunwana, buna beno ikele bankwa kinsuni ve, ye ikele kutambula mu kimuntu ve ? 1 Kol. 1:11; 11:18; 2 Kol. 12:2; Ngal. 5:20
4Kadi bu mosi tuba: Mono ikele ya Paulu; ye yankaka tuba: Mono ikele ya Apolo; beno ikele ya kinsuni ve ? 1 Kol. 1:12
5Buna Apolo ikele nki ? Ye Paulu ikele nki ? Bau ikele basielo ya kwikidisaka beno, muntu na muntu bonso Mfumu pesaka yandi. Lom. 12:3; 1 Kol. 7:17
6Mono kunaka, Apolo tulaka masa, kansi Nzambi menisa yau.
7Buna yandi ya kuna ye tula masa ikele kima ve, kansi Nzambi ya menisa yau.
8Yandi ya kuna ye ya tula masa ikele mosi, kansi muntu na muntu tabaka nsendo ya yandi kibeni, bonso kisalu ya yandi ikele. Luk. 19:15
9Kadi beto ikele basadi sikamosi na Nzambi, beno ikele dilanga ya Nzambi, ye ntungulu ya Nzambi. 2 Kol. 6:1
Yandi tulaka lufulu, bankaka tungaka va yo
10Mono imene kutula lufulu bonso ntungi ya ngangu, bonso nlemvo ya Nzambi pesaka mono, kansi yankaka ikele kutunga va yo. Kansi bika muntu na muntu tala mbote bonso yandi ikele kutunga va yo.
11Kadi muntu mosi lenda ve kutula lufulu yankaka, kansi yina ya imene kutulwa, ikele Yesu Klisto. Yes. 28:16; Ef. 2:20
12Kansi kana muntu tunga va lufulu yai, wola, palata, matadi ya ntalu, minti, nianga, matiti,
13kisalu ya muntu na muntu tamonika; kadi lumbu tamonikisa yo, sambu na yo tazaikiswa mu tiya. Tiya kibeni tateza kisalu ya muntu na muntu bonso yo ikele.
14Kana kisalu ya muntu, ya yandi tungaka va yo ikele kuvanda, yandi tabaka nsendo.
15Kana kisalu ya muntu yokwa tiya, yandi takonda nsendo, kansi yandi kibeni tavuluswa, kansi bonso tuka tiya.
Bantu ikele tempelo ya Nzambi
16Beno zaba ve na beno ikele tempelo ya Nzambi, ye Mpeve ya Nzambi ikele vanda mu beno ? 1 Kol. 6:19; 2 Kol. 6:16; Eb. 3:6
17Kana muntu kufwa tempelo ya Nzambi, Nzambi takufwa yandi, kadi tempelo ya Nzambi ikele ya nlongo, ye beno ikele yau mpe.
Ngangu ya nsi yai ikele kinzoba kwa Nzambi
18Bika muntu dikusa ve. Kana muntu banza yandi ikele na ngangu ya nsi yai, bika yandi vanda nzoba, na yandi lenda kuvanda na ngangu.
19Kadi ngangu ya nsi yai ikele kinzoba kwa Nzambi. Kadi yo ikele kusonama; Yandi baka bankwa ngangu mu mayele ya bau. Yobi 5:13
20Diaka; Mfumu zaba mabanza ya bankwa ngangu, na yau ikele mpamba. Nk. 94:11
21Mpilayai, bika muntu yana ve mu bantu. Kadi bima yonso ikele ya beno;
22keti Paulu, keti Apolo, keti Kefa, keti nsi, keti moyo, keti lufwa, keti bima ya ikele, keti bima ya ikele kwiza, yonso ikele ya beno.
23Kansi beno ikele ya Klisto, ye Klisto ikele ya Nzambi.
Currently Selected:
1 Kolinto 3: NTK50
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kikwango © BAliiance Biblique de la RD Congo, 1950.
