Tito 2
2
Hãtxa pewẽ yusĩkĩ hatu merabewakĩ pewatikiaki, na hãtxarã
1Mianã, hawara mĩ hatu yuikatsis ikairã, na ẽ mia yuiai keska wakĩ habias Deusũ hãtxa kayabi pepawẽ hatu yusĩkubaĩwẽ. 2Huni ewabu hatu merabewakatsis ikĩ yusĩkĩ, hau parananãma hãtxa kayabi besti yuikubainũbũ, inũ hatũ hiwea pe hau mekenũbũ, inũ hau hatũ xinã pe mekeriakubainũbũ inũ, Jesus Cristokiri nĩkatã hau txibã pewanũbũ inũ, nui hau abunamenũbũ inũ, hawara bika betsa betsapa mei hau kuxipakĩ binukubainũbũ haskakiri hatu yuikubaĩwẽ.
3Aĩbu ewabu hatu merabewakatsi yusĩkĩ habiaskari hatu akubaĩwẽ. Hatũ hiweawẽ pe hiwekĩ Deuskiri hau pe xinãnũbũ inũ, hau ana yuãnanãyamanũbũ inũ, hau ana paẽyamanũbũ inũ, haska Deusũ abumis hawẽ hiweawẽri hau dasibibu uĩmakubainũbũ hatu yuikubaĩwẽ.
4Haska wakĩ txipax beneyabu yusĩkĩ hau hawẽ bene abunũbũ inũ hau hawẽ bakeburi abukĩ duawakubainũbũ hatu unãmakĩ hatu yusĩkubaĩwẽ. 5Ha inũ, hau tsua Deusũ hãtxaki hãtxa txakabuyamanũbũ hatu yusĩkĩ haska hatũ xinã pe meketirubukiri inũ, ibubis hatũ yura pe meketirubukiri inũ, hatunabu inũ hatũ mabu tibi hiwe anu pe dayakĩ meketirubu inũ, hawara pepabu abutirubu inũ, hatũ benebe hãtxawẽ binunametirubuma txipaxbu yusĩkĩ mĩ hatu unãmariatiruki.
6Ha huni ewabu inũ berunãbu hau hatũ xinã pe mekekubainũbũ 7miãri mĩ hiweawẽ mĩ ikai keskai dasibibu hau pepa irianũbũ hatu yusĩkinã, hawa tsua beparanãma inũ, tatimama pe bestikĩ hatu ishũkĩ uĩmakubaĩwẽ. 8Tsuabura nukũ yusĩaki ha ikaibu hatu dakewakĩ hau ana nukukiri hawa txakabu yuiyamanũbũ hãtxa pekiri besti yui nemakanãtikiri besti hatu yuikubaĩwẽ.
9Ha dikabi escravo dayarubũ hau hatũ tsumapã hãtxa nĩkatã hau txibãkubainũbũ hatu yusĩriashũkubaĩwẽ, hau duapakĩ hatũ tsumabu benimawakĩ hatube hãtxa kemanameama inũ 10yumetsuama inũ, hau hawa hatu parãma dasibi hatu ashũkubainũbunã. Hatu haska wamakĩ nukũ mekenã Deusũ hãtxakiri dasibi pepa atikiri hatu uĩmashũkĩ hatũ tsumabu mĩ hatu abumatiruki.
11Deusũ yurabu mai hirabi anua hawẽ duapawẽ hawẽ pashati Jesus Cristo hatu unãmakĩ bitirubu inũ biturubuma hatu shabakabi tashnimashuniki. 12Haska Deus nukuwẽ nuikĩ pashati nuku unãmakĩ yusĩaĩnã, hawẽ txakabu atimapa tibi inũ hawẽ kemuti tibi na mai anushũ nũ amis hawẽ kuxipa pepawẽ nũ txitetirubuki, natiã hiwea bena bestiwẽ hiwekatsis ikĩ hawa ana xinã txakabuwẽ xinãma pe besti akĩ haska Deusũ nuku hiwemakatsi ikai hawẽ pepati akirã. 13Haska hiwekũkaĩkĩ nukũ Deus binua inũ nukũ mekenã pepa kuxipa Jesus Cristo shanẽ ibuhairai ana nuku txĩtũshũkirãshanai manai nũ benimaii. 14Deusũ nuku kupiaya hau nukũ txakabuwẽ taea nũ benuyamashanũbũ dasibi txakabu ana xinãtima wakĩ Deusũ nuku buashunũ, iwanã, Jesus Cristo yunua hamebi mawakĩ hawẽ hiwea nuku inaĩ nuku mawashuniki. Nuku haska wakĩ hawenabu kayabi pepa nuku waniwẽ taeshũ ha besti hiweshũkĩ nukũ pepa uĩmai dayashũkubainãkãwẽ.
15Hatu yusĩkinã, kuxipai mestenepatã na hãtxa ẽ mia yusĩaĩwẽ hatu benimawakĩ nemakĩ hatu pewakubaĩwẽ, hau tsuã mia danãkĩ itxakawayamanunã.
Currently Selected:
Tito 2: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
