Apocalipse 22
22
1Hanushũ shanẽ ibu haki tsauti Deus inũ txashuwã bake haki tsauwabu anua hene hiwekuĩa haya kawana beshnã pehaira bishtu keska nai tsumã ea uĩmashuki. 2Haska ha bai kaya namakis hene kesha uke dabebi hawẽ hiwemati hi mapubaina ẽ uĩshuki. Hawẽ bimi betsa betsapa ushe tibi betsa maei bimimisbuki, hau Deusunabũ pipakeshanũbunã. Ha inũ, habia hi peiwẽ yurabũ hamapai betsa betsapa tenekubainaibu hawẽ peiwẽ shushatirubuki. 3Ha inũ, Deusũ mae anu hawa yupukunãti hayamaki. Ha inũ, shanẽ ibu haki tsauti anua Deus inũ hawẽ bake txashuwã bake tsauwabũ ha mae merãshũ Deusunabũ habũ hatu kẽwãkubaĩshãkanikiki. 4Haria Deusbe beisinã dabeshãkanikiki, Deusũ kena hatũ betũkuki nea hayarã. 5Hari hiweabu anu ana yame hayama inũ hanu hiweshũ nukũ Shanẽ Ibu Deus hatu hiwemakĩ hatu shabawashũkẽ habu habe shanẽ ibui heneama ipapakeshãkanikiki. Haskawẽ taea ana barĩ txasha inũ bĩmã txasha hayama ishãkanikiki.
Jesus ana hushanai ma kemaikiaki, na hãtxarã
6Hanushũ nai tsumã ea ana yuikĩ: “Txanima hãtxa ẽ mia yuiai nĩkawe. Nukũ Shanẽ Ibu Deusũ hawẽ hãtxa yuishunikabu hawẽ hãtxa hatu yunumistũ haskarara samama ishanai hau hawẽ tsumabũ yusĩshanũ, iwanã, ẽ hawẽ nai tsuma hawẽ hãtxa eari yunushuki, ẽ mia tapĩmanunã. Deusũ txanima hãtxa tibi yubakatã ashanai ẽ mia uĩmashu ẽ mia yuiai nĩkatã ikũwãriwe”, ea waya
7Jesusũri ea yuikĩ: “Uĩa. Ẽ samama ana kashanaii. Haskakẽ na hãtxa haskarara inũbariaikiri txaniai kenekĩ mĩ una wairã, tsuabũra ikũwãkĩ txibãshanaiburã, Deusũ hatu benimawashanikiki. Manayuwe”, ea washuki.
8Ẽ Joãonẽ dasibi na hãtxa nĩkakĩ na betsa betsapa uĩkĩ keyui benimai huĩti xinã txãkaĩ nai tsumã ea uĩmakubaĩshu kẽwãnũ ika hawẽ tae namã ẽ dãti ikaya 9ea nemakĩ yuikĩ: “Haskayamawe. Mia keska eari ẽ Deusũ tsumaki. Mĩ betsabu Deusũ hãtxa yuishunikabu betsa inũ dasibibũ na hãtxa kenekĩ mĩ una wai habũ txibãshanaibu keska eari ẽ hatu keskaki. Deus besti kẽwãwẽ”, ea watã
10nai tsumã ana ea yuikĩ: “Dasibi ẽ mia uĩmashu haska inũbarikiki. Haskawẽ taeshũ na Deusũ hãtxa huneama na mĩ una wai ma bari keyui kemai hawẽ unãshãkanikiki. Ana huneama shabakabi haska tibi kaĩkũkaini deskekũkaĩshanikiki. 11Haska inũ, tsuara txakabui hiwearã, hatu beshteyamawe, hau habiaska txakabu txibaĩ hiwenũbunã. Ha inũ, tsuara atimapa hiwearã, hau hawẽ atimapa txibaĩ hiwepakenũbũwẽ. Ha inũ, tsuara pepai hiwekatsis ikirã, hau pepa besti wakubainũbũwẽ. Ha inũ, tsuara meribi Deusunabuirã, haska Deusũ abuai keska hau ikubainũbũwẽ”, ea waya
12Jesusũ ana ea yuikĩ: “Uĩa. Ẽ samama ana kashanaii. Kakinã, hatũ manakuti tibi ẽ hatu bushũshanaii, haska tibi hiwemisbu keska hatu inaĩ kairã. 13Ea dukũ ẽ tashnini inũ ẽ hawẽ henea debesekeaki. Ha inũ, earã, ea dukũ ẽ ini niti ikama ẽ hawẽ heneaki. Ha inũ, ea dukũ ẽ ini niti ikama ẽ hiwepakeshanaii”, ea washuki.
14Uĩwẽ. Tsuabura benimati hayarã, hatũ tari patsa keska wakĩ habũ xinã kayabiwẽ Jesus ikũwãkĩ txakabu Deus buamakubaĩmisbu hawẽ mae bena anu hikitã habu besti pekĩ hawẽ benimai hiweti hi bimi pikubaĩshãkanikiki. 15Hamẽ betsaburã, Deus danãkĩ hamapai txakabuwamisbu inũ, mukayakĩ Satanásã kuxipa yukamisbu inũ, txutanamebaũmisbu inũ, yura betsa tenãmisbu inũ, yushĩ dami betsa kẽwãmisbu inũ, dasibi hamapai tibi abubaũmisbu inũ, txani txakamisbu habu haskamisbu besti baxikushãkanikiki, habu Deusũ mae pepa anu hikiamarã.
16Hanushũ Jesusũ ana ea yuikĩ: “Earã, Davĩ baba inũ pena bixi txashahairamis keskatũ ẽ Jesusũ ẽ mia yuiai nĩkawe. Deusunabu itxamisbu betsa betsapa anu haska ẽ uĩaĩ mĩ hatu pewakĩ e imashanũ, iwanã, ẽ nai tsuma ẽ mia anu yunua haska dasibi mia uĩmashuki, hau ẽ hãtxa mĩ hatu bumashanunã”, ea waya
17hanua nũ Txashuwanẽ aĩnẽ habũ nũ ikũwaĩbunã, Yushĩ Pepabetã Jesus yuikĩ: “Huriwe!” nũ ikaya tsuabũra nuku nĩkakĩ: “Hau hurinũwẽ!” hau irianũbũwẽ. Ha inũ, tsuabura ũpash manui keskakĩ Deus benakĩ Jesus txibãkatsis ikĩ hau ikũwanũbũwẽ. Haska watã hawẽ ũpash hiwemati haya hau aki benũbũwẽ, hawa pakamarã.
18Na hãtxa dasibi Deusũ ea bebũkiri uĩmashu nĩkatã ẽ matu yuiai nĩkairakãwẽ. Na dasibi hãtxa Deusũ ea yuishuyabi parananãkĩ tsuabũra ibubis hatũ hãtxa kenekĩ ana unakia kene txitxikĩ ewa watã yuikĩ: “Narã, dasibi Deusũ hãtxaki, txanimarã”, itirubu bebũkiri ẽ matu mesewaii. Tsuabũra haska washanaibu hatu kupikĩ ha itxakawati betsa betsapa ea yusĩshuwẽ Deusũ ana kupiti betsawẽ hatu kupishanikiki. 19Ha inũ, tsuabũra na hãtxa Deusũ ea yuishu ẽ una washukia ha unakia hãtxa betsa tere akaibuwẽ taeshũ Deusũ hawẽ benimai hiweti hi bimi haki tanabiayama hatu mebĩtã hawẽ mae pepa anu na unaki ea kenemashu keska wakĩ Deusũ hatu hikimama ishanikiki.
20Na hãtxa hatũ ea pewamaitũ yuikĩ:
“Txanima ẽ samama ana kashanaii”, ikaki.
Habiaskaki. Nukũ Shanẽ Ibu Jesus Cristoõ, menã hawaira huriwe, nũ mia xinaĩnã.
21Nukũ Shanẽ Ibu Jesus Cristõ hau matu dasibi hawẽ pepawẽ duawakubaĩshanũwẽ.
Ea uĩmakubirãshu ẽ hãtxa txanimarã, hatiski.
João
Currently Selected:
Apocalipse 22: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
