Mateus 2
2
Txaikea bixi unãnikabũ Jesus uĩnũ ika benibukiaki, na hãtxarã
1-2Herodes Judéia anu shanẽ ibuaya Belém anua Jesus kaĩkẽ hanua bixi unãnikabũ bixi bena tashnia uĩtã txaikea bari huai lestekiria bekubirani Herodesĩ mae ewapa Jerusalém anu hikituxitã hatu yukabaũkĩ:
—Judeubũ shanẽ ibu bena kaĩmarã, hanimẽ? hawẽ unãti bixi bena tashnia betxitã kẽwãnũ ika nũ huairã— ikĩ hatu yuka keyubaunaibũ 3hanua Jerusalém anuabũ dasibi nĩkai dateaibũ shanẽ ibu Herodesĩ nĩkariatã xinaĩ: “Ea binushanimẽkaĩ”, ika datekĩ 4tapĩnũ ishũ Deusbe nukunabu hãtxashunika shanẽ ibubu inũ Deusũ hãtxa kenenibu yusĩnanãmisbu hatu kenashũ yukakĩ: “Deusũ Katua Messiasrã, hania kaĩshanimẽkaĩ?” hatu wa yuinametã 5-6hatũ shanẽ ibu yuikĩ:
—Hawẽ hãtxa yuishunika Miqueas Deusũ yuini nĩkawe:
‘Belémnaã, Judéia mae pakea anu mĩ mae hatiumabiakẽ
mia anua shanẽ ibu kayabi kaĩshanikiki,
enabu Israelbu mekeshanairã’, akĩ yuia keneniki—
akabu
7Herodesĩ nĩkatã hatu nitxiã buaibũ hanua bari huai lestekiria bixi unãnikabu bexiãbu haburi hune kenashũ hatu yukakĩ: “Hatiã bixi bena tashnia mã betxibiranimamẽ?” hatu wa natiã ma betxibiranimashũ Herodes yuiabu 8nĩkatã hatu beparãkĩ yuikĩ:
—Belém anu bushũ yuka ikĩ ha bake betxitã kẽwãtã eari yui betãkãwẽ, eari kashũ ẽ kẽwaĩ kanunã— hatu wa
9-10nĩkabaini Belémkiri bukĩ bixi bena uĩmabu ana tashnia txashakaini hatu bebũ kai uĩ benimahairabaĩkĩ txibãbainaibũ hanu ha bake hiwea mamaki niti ikaya 11ha hiwe anu hikikaĩ ha bake hawẽ ewa Mariabe betxituxitã kẽwaĩ ha bebũ dãti iki beti itã benitã ha bau bekãshu bepẽshũ ouro mane inũ ha kuashũti ininipa inũ hawẽ pushati dau ininipa inãkuĩtã 12haska watã bua usha namaibũ Deusũ nai tsumã hatu yuikĩ: “Shanẽ ibu Herodes anu ana txĩtũbaĩyamakãwẽ”, hatu wa hawaira bestẽtã bai betsawẽ inũ bunibukiaki.
Egito anu Josẽ Jesus pashawanikiaki, na hãtxarã
13Bixi unãnikabu ma inũ buabũ habiatiãri José usha namaya Deusũ nai tsumã yuikĩ: “Joséẽ, hawaira bestẽwẽ. Shanẽ ibu Herodesĩ bakeixta detenũ, iwanã, hatu benamayuikiki. Hawaira bestẽtã ha bake hawẽ ewabe iyukĩ Egito anu hatu pashawaritãwẽ. ‘Iwewe’, iwanã, ẽ mia yuiriama habiari hiweyushãwẽ”, aka 14-15hawaira bestẽtã mexu merã ha bakeixta hawẽ ewabe pashawakĩ txaihaira iyukĩ atimas Egito anu hikimaima shanẽ ibu Herodes mawariamakẽ haria dayai hiweyunikiaki. Hawẽ hãtxa yuishunika Oséias Deusũ yuikĩ: “Egito anua ẽ huni bake ẽ kenashanaii”, aka nĩkatã kenenikẽ haska dasibi bebũkiri inũbariai txanini Deusũ shabakabi hatu amaniki.
Herodesĩ huni bake mixtĩ hau detetanũbũ hatu yununikiaki, na hãtxarã
16Hanua Herodes bixi unãnikabũ parãbaĩxinabu ana beabumakẽ Herodesĩ unãtã sinatahairakĩ haska bixi unãnikabũ yuibaĩxina huni bake bari dabeyariabuma inũ bari dabeyabu hau dasibi hatu detekĩ tenãtanũbũ hawẽ soldadobu yunua Belém inũ ha dapi hiwebaunabu anu bushũ detekĩ tenãkĩ keyunibukiaki. 17-18Bebũkiri hawẽ hãtxa yuishunika Jeremias Deusũ yuikĩ:
“Jerusalém kema mae betsa Ramá anua
Jacõ aĩ Raquelĩ baba aĩbuaibu
hatũ bakebu hatu detẽ keyũxinabu manui
saĩ ikaibu nĩkakĩ tsuã hatu nesewatirubuma iki kaikiki”,
aka nĩkatã keneniki. Haska keneni nakuxkĩ soldadobũ hatũ bakebu detẽ keyunibukiaki.
Nazaré anu Jesus iyunibukiaki, na hãtxarã
19-20Hanua Herodes ma mawaxĩkẽ Egito anua José usha namaya Deusũ nai tsuma ana hushũ yuikĩ: “Joséẽ, hanũ bestẽwẽ. Habũ ha bake detenũ ika ikimaburã, ma mawaxinabuki. Hanu Israelbũ mai pakea anu ha bake hawẽ ewabe ana hawẽri iyuriwe”, aka
21José bestẽtã Maria hawẽ bake Jesusbe iyui Israelbũ mai pakea anu hikia 22-23hanushũ betsabũ yuikĩ: “Herodesĩ bake Arquelau shanẽ ibuikiki”, akabu Josẽ nĩkatã datei Judéia anu kariama hanua ana usha namaya Deusũ nai tsumã nemakĩ yuia bestẽtã Judéia anu ana kama Galiléia mai pakea anu mae betsa hatiuma Nazaré anu hikitã hanu hiweyunibukiaki. Ha mae anu iyukinã, bebũkiri Deusũ hãtxa yuishunikabũ Jesuskiri kenekĩ: ‘Nazaré anuaki’, ashanaibu hakiri kenenibu menekĩ hari iyuimashũ hiwetanibukiaki.
Currently Selected:
Mateus 2: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.