Gálatas 4

Nũ ana dayaru escravo keskama nũ ma Deusũ bake kayabibukiaki, na hãtxarã

1-2Na miyuiwẽ ẽ matu yusĩkatsis ikaii. Huni betsa huni bakeya hawẽ ibu mawakĩ hamapai xarabu haya hawẽ bake heneshũbaĩmisbuki. Hakia hawẽ bake ewariama hawenabũ yumewaibũ huni betsã hawẽ epã mabu mekeshũyuabu hawẽ epã mabu inũ dasibi hawẽ hamapai xarabu hamebi hawẽ bakẽ ibuwaitiã hawẽ epã hanu yuini kemariama ha hawẽ bake ewatã hawẽ mabubia ibubis hawena wariamawẽ taea dayaru escravo nuitapai keskai hiweyumisbuki. 3Haskakẽ nukuri bake mixtĩbũ xinã keska nũ ewariama keska hunibũ yusĩawẽ inũ hatũ beyawẽ nuku mekenibuki. 4-5Deus yubakakĩ hanu hawẽ bake yunutiwani menekĩ Deusũ hawẽ bake yunua hua aĩbukia kaĩtã Moisés yusĩniwẽ yumetã hatũ Moisés yusĩni txibãkĩ ha yurabu hawẽ mekeaibu hatũ kupiti nuku bishuãyã txanima kayabi Deusũ bakebu benimai nũ pepashanũbũ hawẽ bake shabakabi dami watã tashnimaniki. 6Haska inũ, nũ ma Deusũ bakebukenã, Deusũ hawẽ bakẽ Yushĩ nukũ huĩti merã yunua Deus hatũ nuku kenamakĩ: “Ẽ Epa nuikipatuũ”, nuku amamiski. 7Mã haskaya ana Moisés yusĩawẽ mã dayaru escravo keskama ikis mã Deusũ bake kayabiki. Haska inũ, Deusũ duawakĩ hawẽ bakebu wakĩ hiwea kayabi matu inãkuĩshanikiki.

Paulo ikũwaĩbuwẽ nuinikiaki, na hãtxarã

8Uatiã Deus kayabi unãriama matũ mekenã dami yushĩ betsa betsapa kẽwaĩ hatũ escravo tsuma mã inibuki, haskatimabiakenã. 9Hakia natiã Deus mã unaĩ bestima Deusũri duawakĩ matu unãriaikiki. Haska unãbiakĩ ana txĩtũkirã hawãra matu pepawatirubuma txibaĩ mã ana hatũ dayaru escravo ikatsis ikimẽkaĩ? 10Hawẽ pepanũ, iwanã, Moisés yusĩa txibaĩ judeubũ besi betsa betsapa mã imiski, hanu nawatitiã inũ, ushe benatiã inũ, uitiã inũ, baritiã inũ, bari benatianã. 11Mã haskawẽ taea hamẽ dayakĩ ẽ matu merabewama ikimamẽkaĩ? ika ẽ dateaii.

12Ẽ betsabu inũ ẽ puibuũ, matu Jesus ikũwãmakĩ taewamai judeubũ beya txibãma matũ beya txibaĩ ẽ matube hiweyuniki. Ea nĩkakãwẽ. Natiã ẽ hiwemis keskariai hiwekubaĩkãwẽ, ẽ matubetã hawa txakabu waismawẽ taearã. 13Haskakẽ matu yusĩkĩ ẽ taewaitiã isĩ txakabũ ea atxia ẽ nuitapaya 14ẽ yura ẽ isĩ tenei atimapakĩ matu unãti wamabia mã ea hawa danãma Deusũ nai tsuma keska ea wai ewẽ benimai Jesus Cristo kayabi keska wakĩ mã ea duawaimaki. 15Hanushũ matũ beru ẽ matu ea akaya ea merabewanũ, iwanã, matũ beru tsekashũ mã ea inãkeanimabuki. Ea haska wai mã benimakubainimawẽ taeshũ haskai mã ana haskamamẽ? 16Hãtxa txanima ẽ matu shabakabi yuiaiwẽ taearã hawai ẽ ana matũ haibumamẽ, natiã mã eki sinatakũkainairã?

17Haskakĩ Jesus ikũwaĩ matxupabu huĩti txakabuyabũ judeubũ beya matu txibãmakatsis ikĩ tari matu pashkanũ, iwanã, matu hawenawakĩ habũ yusĩa besti matu txibãmakĩ hawẽ tsumabu matu wakatsis ikanikiki. 18Hakia itxapabu merabewakĩ mã hatu pe mekeaiburã, haskarã, pehairaki, ẽ matube hiweshũ ẽ matu yusĩa xinãkĩ mã amis keska bestima heneama hatu ashũkubaĩkãwẽ. 19Ẽ bake keskabuũ, haskakĩ mã ana ea bika tenemai? Cristo matu ikũwãmakĩ ẽ matu merabewaya mã ea ani keska wakĩ mã ana ea bika tenemaii, aĩbu bake kaĩ isĩ tenemis keska ea wakinã. 20Haskarara mã xinaĩ ikai ẽ matu unãmaki. Hamẽ natiã ea kayabis ẽ harirã, haska ẽ xinaĩ hãtxa pewẽ ẽ matu yui kapanã ẽ katirumaki.

Agar inũ Sarakiri unãtikiaki, na hãtxarã

21Moisés yunuti inũ hawẽ nemati mã bemakis txibãmisbuũ, Moisés yusĩa mã nĩkaisbumamẽ? 22-23Hakia Moisés keneni uĩkĩ ha Abraãonẽ huni bake Ismael inũ Isaquekiri nũ uĩmis matu yuinũ nĩkairakãwẽ. Abraãonẽ aĩ Sara hau dayashũkũkaĩnũ peiwẽ Agar bikĩ hawẽ dayaru escravo wabianishũ hanubi aĩwãriatã haki Abraãonẽ bakewa hawẽ bake Ismael hawẽ yubakati hayama kaĩnikiaki. Hakia Abraãonẽ hawẽ aĩ Sara peiwẽ biama aĩ kayabi wani Deusũ merabewaya Sara yushabuhairabiakẽ hawẽ bake Isaque haki bakewaima kaĩrianikiaki, haska Deusũ Abraão bebũkiri yubani meneirã. 24-25Abraãonẽ aĩ betsa escravo Agarrã, haskakiri yuiarã, ha aĩbu escravo Mati Sinai Arábia mai pakea anu keskaki. Ha mati anushũ Deusũ Moisés yusĩkĩ hawẽ yunuti inũ hawẽ nemati inãnikiaki, hau keneshanunã. Habũ nĩkatã yubakai: “Ha Deusũ yunuti inũ hawẽ nemati nũ txibãshanaii”, iki Israelbu Deusbe yubakai hãtxanibukiaki. Hanushũ Agar escravo ini keskakĩ habũ ha yunuti inũ nemati Moisés keneni txibãmisburã, escravo keskabuki. Jerusalém anu hiwebiabu Mati Sinai hatũ ewa keskaki. 26Hakia nukuburã, nũ Deusũ bake kayabibuwẽ taea Jerusalém nai anua nukũ ewa keskaki. Deusũ nuku mekeawẽ taea nũ escravõ bakemaki. 27-28Ẽ betsabu inũ ẽ puibuũ, matuburã, Deusũ Isaque yubani mã ha keskabuki. Deusũ bake kayabiburã, mã hawẽ yuba hayaburiki. Haska inũ, Deusũ hãtxa yuishunika Isaíasĩ yuikĩ:

“Bake bisma mã nuitapabiai baba hayakĩ

aĩbũ bake bimis mã binumashanaii.

Haskakẽ habũ mã bake bitiruma benimahairakubaĩkãwẽ.

Bake bi isĩmisbu keskai mã isĩ teneisma mã unaiĩ.

Ha inũ, betsarã, beneyabia matũ benẽ matu henebaina

bake itxapa bikĩ ha beneyabu mã hatu binumariashanaii,

bakeyakinã. Haska xinãkãwẽ”,

atã keneniki. 29Hakia hawẽ escravõ bakẽ Deusũ yubakĩ bake inãni Isaque Ismaelĩ itxakawani keska wakĩ natiãri Deusũ Yushĩ Pepatũ daya nũ akai Moisés yusĩa bemakis txibaĩbũ nukuki sinatakĩ nuku ibu wakĩ escravo wanũ, iwanã, nuku itxakawariakanikiki. 30Hakia hawara Sarã Abraão yuini Moisés nuku keneshuni matu yuinũ nĩkakãwẽ: “Isaque besti ẽ bakekẽ mĩ dayaru escravõ bake ẽ bakebe ewatã nũ mawaya hau nukũ mabu biama ishanũ menã Agar inũ Ismael hatu nitxĩriwe”, akĩ Sarã Abraão yunukĩ yuiniki. 31Haskakẽ natiã ẽ betsabu inũ ẽ puibuũ, Moisés yusĩawẽ hawãra nuku ibu wakĩ amamisrã, hawẽ escravo keska ana iyamakãwẽ. Hakia escravo keskama Abraão hawẽ bake kayabi yubani keska ikubaĩkãwẽ, tsuã tsumamarã.

Currently Selected:

Gálatas 4: cbsBR

Highlight

Copy

Compare