3 João 1
1
Joãonẽ Gaio kẽwãnikiaki, na hãtxarã
1Mĩ ẽ haibu pepa Gaio anu mĩ haibu mekenika Joãonẽ txanima ẽ mia abuhairaitũ keneshũ ẽ hãtxa ẽ mia bumai uĩshãwẽ.
2Ẽ betsaã, Jesus ikũwãkĩ mĩ xinã mĩ ana kuxipa wakubainai keskariai hawa isĩ teneama mĩ hiwei pekũkaĩnũ Deusbe hãtxakĩ mĩ hiwea dasibikiri ẽ mia yukashũmiski, miwẽ nuikĩ mia abukinã. 3Nukubetã Jesus ikũwaĩ betsabu bea eki nukutã mikiri eki txanikĩ: “Gaiõ Jesusũ txanima hãtxa txibãkĩ txĩtuãma hawẽ hiweaki”, ikĩ ea yuiabu nĩkai ẽ benimahairaxinaki. 4Mã ẽ bake keskabu habias xinãwẽ mã txibaĩ matukiri nĩkai ẽ xinã txãkãkũkaĩmis ẽ benima pae tsuã ea mebĩtirumaki.
5Ẽ betsaã, miwẽ nuikĩ ẽ yuiairã, ikũwaĩbu betsabu dasibi xinã pewẽ mĩ hatu merabewakubaĩmis keska wakĩ ana hatu binumakinã, habu mĩ hatu uĩmatxakayamairã, txaikea yusĩnanãtanũ ika beaibu merabewakĩ beyawakĩ mĩ hatu duawamis 6nenu nũ hiweabu anuri bea hanu nũ itxabu anuari mĩ hatuwẽ nuikĩ merabewamiskiri nukuki txanimisbuki. Haskakẽ mia anua buaibu hatu nitxĩkĩ hatu merabewakĩ hau hawa yupama haya butanũbũ piti inũ hawara mĩ haya hatu inãpakekubaĩwẽ, Deusũ haska abumis akinã. 7Habunã, Jesus Cristokiri yusĩtanũ ika bushũ haska hatũ xinãnẽ habũ ikũwãbuma daketapawatirubumaki, hamapai xarabu hatu yukakinã. 8Hau hatũ hawara yupayamanũbũ haskawẽ taea nukuĩ nũ hatube dayakĩ habu nũ merabewanũ Cristõ nuku yununiki, habuã Jesus Cristokiri txanima yusĩbaunaiburã, habu merabewati xara nuku wakinã.
Diótrefes inũ Demétriokirikiaki, na hãtxarã
9Uatiã mĩ mae anushũ ikũwaĩ itxamisbu yunukĩ ẽ hatu kene bumaimaki. Hakia Diótrefes nukũ yunuti kuxipa abuama ibubis yunukatsis ikĩ nukũ hãtxa nĩkamakiaki. 10Haska bestiama, hatunã, nukukiri txakabu yuikĩ nuku yuãkĩ nukuki kashei txanitxakamiskiaki. Ha inũ, yusĩnã betsabũ matu merabewanũ ika matu anu buaibu matu beyawamamakĩ nemai inũ tsuãra hatu beyawakatsis ikaibu nemakĩ hau habe mã ana itxayamanũbũ matu nematã tashnimamiskiaki, shanẽ ibukinã. Haskamiskẽ ea kayabis matũ mae anu kashũ kenatã habe hãtxakĩ ẽ txiteshanaii.
11Ẽ betsaã, ẽ miwẽ nuiairã, beya txakabu txibãma beya pepa besti akubaĩwẽ. Tsuãra beya pepa akaiburã, Deusũ enabuki. Hakia tsuãra beya txakabu akaiburã, Deus unãbumaki.
12Dasibibũ: “Haska kaka tashnimakãwẽ”, ika ẽ ikairã, Demétrio bestikiria hãtxa tashnia ẽ nĩkaii, hawẽ kaka txanimarã. Haska hakiri kaka kaĩayã nukũri hakiri hãtxakĩ habiaskari nũ xinaiĩ. Nuku nũ parananaĩ hãtxaisma mĩ unaiĩ.
13Hãtxa itxapa ẽ mia yuikatsi ibiakĩ ẽ hati mia keneshũkatsi ikamaki. 14Hakia samama mia anu ka uĩnanaĩ ẽ mibe hãtxai kashanaii.
15Hau Deusũ mia unãnuma hiwemanũwẽ. Nenushũ nukũ haibuaibũ hatũ hãtxa mia bumakanikiki, mĩ unãnuma hiwenunã. Mia anuabu nukũ haibuaibu tibi ẽ hãtxari ea hatu banabimakĩ keyushũshãwẽ.
Hatiski, ẽ hãtxarã.
João
Currently Selected:
3 João 1: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.