2 Timóteo 2
2
Soldado pepa keskatikiaki, na hãtxarã
1Mĩ ẽ bake keska Jesus Cristoki dasia mĩ hawẽ kuxipa hayanũ Deusũ hawẽ pepa mia inãnirã, hawẽ besti kuxipakũkaĩwẽ. 2Itxapabu ẽ hatu yusĩkubaunai mĩ nĩkakĩ tapĩmisshũ akai keskari mĩ hatu tapĩmairã, ha hunibu pe hiwekĩ ikũhairawai txĩtuãma hatu uĩmai duapakũkaĩkĩ yurabu yusĩkĩ hatu merabewatirubu hatu katutã hau habiaskari yusĩkubainũbũ hatu yunukubaĩwẽ.
3Hamẽ mia ikirã, soldado keskai hiwewe. Haskakĩ ẽ ikai keska hiwekĩ Jesus Cristo mĩ ikũwãyã mia itxakawabiabu Jesus Cristõ tsuma pepai nuitapabiai bika tenei hiwekũkaĩwẽ. 4Uĩwẽ. Txanima soldado unãnepatũ hawẽ shanẽ ibũ yunua besti dayashũkatsi hawa hamebi hawẽ xinãnẽ abuai atirumaki, hawẽ shanẽ ibu besti benimawanũ ikarã. 5Ha dikabi, habiaskariai, bola putanika beyuskĩ hawẽ yunuti inũ hawẽ nemati txibãbuma hawẽ manakuti pepa hayatirubumaki. 6Ha inũ, huni betsã yunu banaima hawẽ dayashunikã mekeshũmiswẽ taeshũ hanu tsekatitiã bai ibuã tsekakĩ hawena dukũ biama ha dayashũmis pashkashũkĩ hawena dukũ inãtiki. 7Na haska tibikiri ẽ mia yuiai xinãkubaĩwẽ. Mĩ haska waya nukũ Shanẽ Ibũ mia merabewakĩ dasibi mia tapĩmashanikiki.
8Nukũ shenipabu shanẽ ibu pepa Davĩ baba Jesus Cristo mawa Deusũ ana bestẽwani kaka pepa datã akĩ ẽ hatu yusĩmisrã, hakimama xinaĩrakubaĩwẽ. 9Jesus Cristokiri ẽ yusĩkubaũmiswẽ taeshũ ea itxakawabu tenekĩ ẽ meaii. Huni atimapa hawaki dateama txakabuwai betxitã amisbu keska wakĩ ea nemakĩ mane dispiwẽ ea meneshabu keska wariakĩ Deusũ hãtxa kakape yuikĩ ẽ datã amisrã, ha tsuã nemakĩ neshatirubumaki. 10Haskakẽ tsuabura Deusũ katunibu Jesus Cristo ikũwaĩ pepai hau hatũ txakabuwẽ Deusũ hatu kupiama hatu pashawakĩ piskuma hau hawẽ kuxipa ikibi ikanu hau hanu hiweriashanũbũ natiã ea hiweyushũ ẽ hatu bika teneshũyuaii.
11Na haska ẽ mia yuiairã, txanimahairaki. Xinaĩrawe.
Tsuabura nũ ma habe mawani keska habũ nũ xinaĩburã,
habusri nũ habe hiweshãkanaii, niti ikamarã.
12Tsuabura Cristowẽ taea nuitapabiai babuama kuxipakĩ nũ binukubainaiburã,
txanima hanu shanẽ ibuai anu habe nũ shanẽ ibushanaii.
Hamẽ tsuabũra hakiri txani peama yui keyaĩsbumarã,
habiaskari Cristo hatukiri Epa Deus txanikĩ hatuki dakeriashanikiki.
13Hamẽ nukubu nũ xinã betsa betsapa wai txĩtũbiamiskẽ
hatunã, hawa xinã betsa betsapa waisma ikũkaĩnũbarikiki,
haskatã hamebi ibubis txani txakatirumarã.
Paulõ yusĩmis keska wakĩ hau Timóteõ ariakubainũ yununikiaki, na hãtxarã
14Ẽ mia yuiai keska xinãkĩ betsabu hatu yusĩkĩ tapĩmairakubaĩwẽ. Deusũ nĩka keyuaya yusĩa betsa betsapakiri yui hau kemanameyamanũbũ hatu nemakubaĩwẽ, tsua hatu merabewatirubumakirã. Haskaibu tsuãra hatu nĩkai e ishãkanikiki, Jesus Cristo ikũwãpairã. 15Hamẽ mia ikirã, hĩ hĩ ikama mĩ Deus dayashunairã, Deusũ besuubi hawa berabini mĩ dakeama ishanairã, txanima hãtxa Jesus Cristokiri dasibi hatu yui pepakũkaĩwẽ. Mĩ haskamiswẽ taeshũ Deusũ mia unãti wakĩ: “Huni dayakapakũkaĩkĩ mĩ ea dayashũmis peki”, iwanã, mia yuishanikiki. Xinaĩrakubaĩwẽ. 16Tsuabũra hãtxawẽ besti hamapai bemakis pepakiri xinaĩ kemanamei hãtxakĩ haska bestikiri xinaĩbu tsuabũra hatu nĩkai hatũ yusĩawẽ beyai shushatirumai atimapai pikukubaĩkanikiki. 17Hatũ yusĩanã, isĩ txakabu tashni su ika ewakũkaĩmis keskaki. Haska keskari wakĩ hatũ yusĩawẽ yurabu yusĩkĩ hatunabu txakabu pa wamakanikiki. Hatu uĩrakubaĩwẽ. Haska keskai Himeneu inũ Filetõ hatu txibãkĩ 18txanima hãtxa henetã ma hamakiri hatũ xinã benuabuki. Habũ hatu yusĩkĩ yuikinã: “Ikũwaĩbu mawarã, ana bestẽshanairã, nũ ma hayaki”, iki mapubaũkĩ hatu parãkĩ Jesus ikũwaĩ hatiri hatu txĩtũmakanikiki. 19Hatu haska wabiaibũ ma meribi Deusũ hawenabu kuxipa wakĩ mestẽwani hawa ana betsa wama ishanai ma Deusũ hãtxa kaneama kenenibu hayaki. Haskakẽ: “Nukũ Shanẽ Ibũ haratura hawenabu ma unaĩkiki”, ha inũ: “Tsuabũra nukũ Shanẽ Ibũ kenawẽ Deusbe hãtxakinã, hatũ txakabu txitetã hau henekubainũbũwẽ”, ariani kenenibu hayaki.
20Haska inũ, huni mabuyatũ hiwe ewapa merã hawẽ mabu tibirã, ouro inũ prata hawẽrua besti hayamaki. Hakia ha dikabi hi mabu inũ mai mabu pepa beshmas hayariki. Ha mabu dabe haska keska dabes hayamaki. Betsa hawa husiama hawẽ pepahaira besti atiki. Hanua betsa hawẽ hamapai wakĩ pepa beshmas dasibibũ metirubu hayariki. 21Ha mabu pepa ouro keskarã, tsuabũra txakabu henetã hawẽ Shanẽ Ibu pepakĩ dayashuni hawa txakabu husikĩ ana meama ha besti pepashunaiwẽ taeshũ hamapai daya pepa betsa betsapa hawẽ Shanẽ Ibu Jesusũ yunutiruki.
22Haskawẽ taeshũ berunãbu hamapai tibiwẽ kemumisbu keska henetã hanua ana haska hiweama pashakũkaĩwẽ. Eska bestiwẽ hiweti pepa benakubaĩwẽ, hawa txani txakama inũ, Jesus Cristo ikũwaĩ inũ, nui abunamei inũ, unãnuma hiwei dasibibu huĩti shũpĩbubetã nukũ Shanẽ Ibu kẽwãkubaĩkinã. 23Ha dikabi, unaĩsmapabu kemanamei sinatanamemisbuwẽ taeshũ hatu nĩkayamakubaĩwẽ. 24Nukũ Shanẽ Ibu dayashunikabia nukũ beyawẽ hamakiri hãtxawaĩ detenameai keskai nũ maputirubumaki. Hamẽ nuku ikirã, dasibibube pepairã, dasibibu yusĩti xarairã, dasibibu hawara kaneaibu hawaira hĩ hĩ, iwanã, hatu txakabu wama hiwekũkaĩtiki. 25Tsuabura nĩkaisbuma inũ patapabu mĩ hatu merabewakĩ pewakatsis ikairã, huĩti babutã hawa sinatama eska xinãkĩ hatu unãmakubaĩwẽ, Deusũ hawẽ txakabu unãma xinã betsa watã: “Haskarã, txanimaki”, ikĩ hatũ txakabu henetirubu manakinã. 26Mĩ haska waya habu diabo Satanásã hatu beya wakĩ tsumawani habũ mia nemakubaĩxinabu besteã keskatã kaĩkaĩkĩ Jesus Cristokiri txanima hãtxa unãtã ana txakabu wakatsi ikama habũ Satanás mepãmabaĩtirubuki.
Currently Selected:
2 Timóteo 2: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
