1 Timóteo 5
5
Ikũwaĩbu betsa betsapakiri merabewakĩ xinãtikiaki, na hãtxarã
1Kaneaibu pewakĩ hatu ha ayamakubaĩwẽ. Hakia anibũ kaneaya mĩ epa keska wakĩ hatu merabewakĩ hãtxa kuxipawẽ hatu bekũyã akama hatu pewẽ xinãmakubaĩwẽ. Berunã inũ huni ewã kaneaya mĩ betsabu keska wakĩ merabewakĩ hatu pewakubaĩwẽ. 2Yushabũ kaneaya mĩ ewa keska wakĩ hatu merabewakĩ pewakubaĩwẽ. Txipax inũ aĩbu ewãri kaneaya mĩ puibu keska wakĩ merabewakĩ hatu pewakubaĩwẽ, hatuwẽ kemuamarã. Haska wakĩ dasibibu hatu merabewakubaĩwẽ.
3Aĩbu ewa beneyabiani ana bene hayabumã Jesus Cristo ikũwaĩbu txanima nuitapa kayabiaya hawenabu hayamakẽ Jesus Cristonabũ duawakĩ hau hatu merabewakubainũbũwẽ. 4Hakia beneyabiani nuitapaibu hatũ bakebu inũ hatũ bababu hayarã, habũ dukũ hau hatu merabewakĩ hawẽ tapĩkubainũbũwẽ, hatunabu kayabibunã. Haska hatunabu merabewakĩ hatuwẽ nuikinã, Deus benimawakĩ xinã txãkãwãtirubuki. 5Aĩbu ewa beneyabianibũ Jesus Cristo ikũwaĩ hawenabu hayama Deusũ hau hatu merabewanũ haska manakakĩ bariri inũ mexu merã Deus kẽwãkĩ habe hãtxakĩ hawẽ piti inũ hawẽ mabukiri yukamisbuki. 6Hakia aĩbu ewa beneyabiani betsabũ Deusũ hãtxa xinãma patapakĩ hawara akatsi ikai amisburã, hiwebia hawẽ yushĩ ma mawaki. Haskawẽ taea Deus hatuki sinataikiki. 7Haskakẽ hau ikũwãbumã hatukiri txakabu yuiyamanũbũ ikũwaĩbu yusĩkĩ hau hatunabu merabewakubainũbũ hatu yunukubaĩwẽ, hatu xinãmakinã. 8Haskakẽ tsuabũra hawenabuskiri xinãkĩ hatuwẽ nuikĩ merabewama Jesus Cristo ikũwãbiai danãkanikiki. Hatunabuwẽ nuikĩ merabewamawẽ taearã, habũ ikũwãbumã xinã betsa waisma keska habũ ikũwãbiai xinã hayama nuima txakabuki.
9Habũ ikũwaĩ yushabu 60 bariya unuri kai beneyatã betsawẽ kemukĩ heneama ipauni enauma ikũwaĩbũ merabewatirurã, eska atiki, hatu tanakĩnã. 10Hatũ bakebu ma pe yumewani inũ, bai beaibu hatũ hiwetã itã Jesus Cristonabu betsabu duawakĩ beya wakĩ hatũ tae hutxupaunibu natiã hari nuitapaya merabewakĩ pe besti dayakũkainiwẽ taeshũ Jesus Cristonabũ ha pepabu besti hatukiri xinãkĩ hau merabewakubainũbũwẽ. 11Haska inũ, aĩbuaibu beneyabia hawẽ benẽ heneima kasmai mawaimakẽ yushaburiamarã, hau ikũwaĩbũ haska xarabu hau hatu tanatã merabewayamakubainũbũwẽ, Jesus Cristo dayashũkatsi yubakabiaima hakimatã huniwẽ kemui ana beneyakatsis itirubukirã. 12Hanua ana beneyama ikũwaĩbu merabewai hatube dayakatsi yubakabiaima ibubis xinã betsatã ha yubakaima ana xinãma kanei txakabuaya Deus hatuki sinatatiruki. 13Haska inũ, yushaburiama hatũ piti inũ hatũ mabu inãkĩ mã hatu merabewaiwẽ taea haska besti bi ana dayakatsi ikama hiwe tibi anu besti hikikũkauni txikix pikutirubuki. Ha txikix pikuimarã, haska bestiama hiwe betsa tibi anu tsaushũ hatubetã txani yui inũ betsabuki txanitxakakĩ haska txani yui beyatirubuki, haskai txakabui pikuirã. 14Ikũwãbumã hau nukuki kasheyamanũbũ aĩbu beneyabiaima ma hawẽ bene mawa kasmai henebainima yushaburiabumarã, hau ana beneyakubainũbũwẽ. Haskatã bake bitã hatũ hiwe meranua pe dayakĩ hau hatu duawakubainũbũwẽ. 15Uĩwẽ. Hatiri aĩbu yushaburiama beneyabiani ana beneumakẽ hatu merabewabiabu ana Jesus Cristo txibãkatsi ikama Satanásã haska abuai txibaĩbu uĩkĩ eska ẽ mia yunuaii.
16Hanushũ yushabu beneuma nuitapai enayakenã, hau hawenabũ merabewakubainũbũwẽ, ikũwaĩbukiri xinãkĩ hatu bika wamamarã. Hakia ikũwaĩbu itxashũ yushabu betsabu enauma besti merabewatirubuki, hatũ piti inũ hatũ mabu hawa hayamakẽ hatukiri xinãkinã.
17-18Mekenikabukiri ana mia yuinũ nĩkawe. Moisés Deusũ hãtxa kenekĩ: “Mĩ hemaĩtĩ anushũ mĩ ina awã hawẽ taewẽ mĩ shekiwã pema pema akĩ mia shemeshunaya dispiwẽ sheneshyamakãwẽ, hau dabukũ pinunã”, iwanã, yununiki. Haska yuikinã: “Dayakapabu hau hatu pakakubainũbũwẽ”, ani keska wakĩ mekenikabu tibi habũ matu yusĩaĩburã, haratura bestitũ Deusũ hãtxa matu yusĩ henekatsi ikama matu yusĩkĩ matu merabewakubainaibuwẽ taeshũ matũri ha matũ mekenika duawakĩ peiwẽ kasmai hawarawẽ merabewakĩ hawẽ hawara inãkubaĩkãwẽ.
19Haska inũ, mekenikatũ txakabu wakĩ kaneaikiri huni bestitxai miki txanikĩ hakiri mia yuiai nĩkayamayuwe. Hakia mekenikakiri habias txakabukiri dabe kasmai dabe inũ bestitũ mia yuiaibu: “Txanimẽkaĩ? Txanimaraka?” ikĩ unãti watiki. 20Hanushũ txakabu wakubainaibu pewanũ itã Deuski hatu datemakĩ dasibiburi hau daterianũbũ itxashũ nĩkaibũ pewakĩ hatu mesewakĩ shabakabi nemakubaĩwẽ.
21Natianã, Deus inũ nukũ Shanẽ Ibu Jesus Cristo inũ hawẽ nai tsuma katuabũ habũ ea nĩkaibũ ẽ mia yunu kayabiai ea nĩkawe. Mĩ haibuaibu kasmai yura betsabu tsuãra hamapai mekĩ txakabu waxinamẽkaĩ, txakabu wamamẽkaĩ, bebũkiri txakabu xinãma dasibibu habias ma miki txaniaibũ besti unãti watã hatu pe wakubaĩwẽ. 22Ha dikabi hau tsuãra Deusũ daya ashunũ katukatsis ikinã, hĩ hĩ, iwanã, uĩriama mamepishũ hawaira Deus yukashũyamawe. Hakia hawẽ txakabu unãriama kanekĩ mĩ hawaira katukẽ: “Hawẽ txakaburã, unãma ikimẽkaĩ?”, iwanã, mikiri xinãtirubuki. Haska huni betsã txakabu mĩ pewashũtirumarã, mimebi mekekĩ uĩrakubaĩwẽ.
23Mĩ hatu babu mĩ isĩkũkaĩmiswẽ taeshũ ana ũpash besti akama uva vinho hushkeixtatã akubaĩwẽ, bari tibirã.
24Haska inũ, hatiri ikũwãbiakĩ yurabũ berubi txakabu wamisbuki. Betsabũ hune txakabu wariamisbuki. Haskaibu hatu uĩbiamisbukẽ miã hawa unãma hawaira hatu katukĩ mamepiyamakubaĩwẽ, txipu hatũ txakabu tashnitirukirã. 25Habiaskari wakĩ merabenãkĩ pepawaibu bebũkiri unãmisbuki. Hakia betsabũ txakabuwakĩ hune abiaya atimas tapĩriamisbuki.
Currently Selected:
1 Timóteo 5: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
