1 Timóteo 4
4
Jesus Cristo ikũwaĩ betsabu txĩtũshanaibukiri yusĩakiaki, na hãtxarã
1Jesus Cristo ana hua kemaya haskai habũ ikũwaĩ betsabu txĩtuĩ bebũkiri haskanũbariaibukiri Deusũ Yushĩ Pepatũ shabakabi nuku unãmai mia yuinũ nĩkawe. Habũ Jesus Cristo txibãkĩ henetã yushĩ txakabu parananaĩbu inũ Satanásã tsumabũ hatũ yusĩa habu anua huai nĩkatã txibãshãkanikiki. 2Ha yurabu beparamenikabu inũ txanitxakanikabũ habu hawaki dakeisbuma habũ hatũ yusĩa txibãshãkanikiki. 3Ha hunibũ yusĩanã, aĩyaĩ inũ beneyatikiri inũ piti betsa tibikiri piaibu nemamisbuki. Hakia Deusũ piti xarabu damiwani tsuabũra habũ Cristo ikũwaĩbũ txanima unãkĩ Deus kẽwãtã pitirububiakẽ ha piti betsakiri hatu nemamisbu habũ mesewakĩ yusĩaĩbu nĩkakĩ txibãshãkanikiki. 4Hamapai piti xarabu Deusũ damiwatã: “Peki”, aniki. Haskawẽ taeshũ hawara Deusũ nuku inã bishũ pikinã, danãma kẽwãtã hau pikubainũbũwẽ. 5Haska piti tibi Deusũ hawẽ hãtxawẽ yuikĩ pewani xinãkĩ habe hãtxashũ nũ piarã, ma dasibi nuku pewashũkubaĩmiski.
6Na haska hãtxa kayabi ẽ mia yuiairã, nukũ betsabu inũ nukũ puibũ ikũwaĩbu habiaskari hatu yusĩkubaĩwẽ. Haskakĩ hawẽ ikũwãti hãtxa mĩ haya inũ yusĩa pepa mĩ txibaĩ ana hawẽ huĩti kuxipakũkaini Jesus Cristõ tsuma pepa mĩ ikũkaĩshanaii.
7Hakia habu patapaibu inũ ikũwãbumã miyui hawama yuiaibu nĩkai hatu anu naxui ikama ikũkaĩwẽ. Hamẽ mia ikirã, haska Deusũ mia hiwemakatsis ikai pepai mimebi mĩ xinãnẽ mekei yurabu uĩmai hiwekũkaĩwẽ. 8Hunĩ hawẽ yura kuxipa wai pebiakẽ Deus hiweakiri yubakani hãtxa unãkĩ txibãkĩ hawẽ huĩti kuxipa wairã, ha binua pehairaki, natiã nũ hiwea inũ txipu uatiã Deusbe nũ hiweshanai nũ manakairã. 9Ha hãtxa txanimaki, dasibibũ nĩkakĩ ikũwãtiruburã. 10Haskawẽ taea dayakĩ Deus hiweatũ yura betsa betsapabu merabewakatsis ibiaya tsuabũra hawẽ bake Jesus Cristo ikũwaĩbu besti hatu mekekubaĩshanaiwẽ taea nũ habe hiweshanai manakakĩ habias hawẽ hãtxa nũ yusĩayã nuku itxakawabiabu hatu ikũwãmanũ ika nũ dayakũkainaii.
11Habiaskari ẽ mia yuiai yunukĩ hatu yusĩkubaĩwẽ. 12Mĩ berunã huni ewariamabiatũ mĩ hatu yusĩaĩ hau mia danãyamanũbũ pe bestikũkaĩwẽ. Ha inũ, mĩ hãtxa pe tashnimakĩ duapai hatuwẽ nuikĩ Jesus Cristõ yusĩa ikũhairawakĩ mĩ ikũwaĩ hatu uĩmawe, hau haskariakĩ yura betsã ikũwãtã hiweriakubainũbũ ikũwaĩbu hatu yusĩkubaĩwẽ. 13Nenua ẽ mia anu hikiriamakẽ nukũ betsabu inũ nukũ puibu Éfeso anushũ ikũwaĩbu itxabu Deusũ hãtxa hatu yuishũkĩ benimawakĩ hatũ huĩti kuxipa wakĩ hatu pe besti yusĩkĩ heneyamawe. 14Ha inũ, mĩ mae anushũ Jesus Cristonabu mekenikabũ mia mamepishũ Deus mia yukashunabu hawẽ Yushĩ Pepa mia yunua mia kuxipa wanirã, unãnumas hamakiri hãtxama haska Deusũ mia merabewani hakiri besti hãtxai dayakũkaĩwẽ, kaneamarã.
15Haskai mimebi ana unãnepai xinã pepakũkaini dasibibũ hau mia uĩnũbũ daya betsa akama mĩ kuxipa hirabiwẽ hatu yusĩkubaĩwẽ. 16Mimebi pe mekekĩ uĩrawe, haska betsabu mĩ hatu yusĩakirirã. Dasibi xinã pe bestiwai txĩtũyamakũkaĩwẽ. Mĩ haskakũkainaya mia inũ mĩ hãtxa habũ nĩkaibu hatube Deusũ pewẽ mia manakushanikiki, hiwe kayabimakinã.
Currently Selected:
1 Timóteo 4: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
