1 Tessalonicenses 4
4
Eskai hiwekĩ Deus benimawatirubu Paulõ yununikiaki, na hãtxarã
1-2Ẽ betsabu inũ ẽ puibuũ, Jesusũ nuku yununi hawẽ yusĩa nũ matu yusĩtanima mã unaĩwẽ taeshũ kenewẽri nũ ana matu keneshunai uĩrakãwẽ. Haska bari tibi Deus mã benimawatiru nũ matu yusĩkubainima mã akai keska wakĩ ana habiasri heneama akubaĩshãkãwẽ, iwanã, nũ matu ana yunuaii. 3Haskakẽ Deusũ matu pepa besti wanũ, iwanã, matu yunukĩ: “Aĩbu mĩ aĩmawẽ kemuama inũ, huni mĩ benemawẽ kemuama haska ha dabe mã haya hatũ aĩbe besti hau txutanamekubainũbũwẽ”, iwanã, xinãmiski, Deusunã. 4-5Haska inũ, Deuskiri unãma inũ ikũwãbumã aĩbuaibu tibiwẽ kemukĩ txutabaũmisbu keska iyamakubaĩkãwẽ. Hakia Jesus ikũwaĩ aĩyãkatsis ikĩ shabakabi Deus uĩmai pe hiwenũ ika habe biakanãtã nuitapawama hatũ mabu mekei hau pe besti ikubainũbũwẽ, hatũ aĩbe menamei txutanameirã. 6Hanushũ bebũkiri nemakĩ haska nũ matu yuima ana nĩkairakãwẽ. Tsuabũra huni betsa parãkĩ hawẽ aĩ mekĩ hatu itxakawaibu Deusũ hatu kupishanikiki. 7Hakia nũ haska txakabui atimapakũkaĩmis Deusũ abuismaki. Haskawẽ taea nũ pepa bestikubainũbũ hawenabu wakĩ Deusũ nuku katuniki. 8Hanushũ tsuabũra na yusĩa danãkĩ hunĩ yusĩa danãma hakia Deusũ hawẽ Yushĩ Pepa matu inãmis danãkanikiki.
9-10Ha inũ: “Jesus matubetã ikũwaĩbu hatube abunamei hatuwẽ nuikubaĩkãwẽ”, akĩ Deusũ ibubis matu yusĩkĩ yunuima tapĩmashũ mã akai Macedônia mai pakeanushũ ikũwaĩ dasibibũ mã hatube haskaiwẽ taeshũ hawa ana betsa maewama nui abunametxakayamakũkaini beshtekeama ipakekãwẽ. Mã haskakũkainaiwẽ taeshũ ana haskakiri nũ matu keneshũtirumaki. 11-12Hakia haska nũ matu yusĩkĩ nũ matu uĩmatanima mã nuitapaibukiri xinãma txikixama ea iki daketapama matũ mekenẽ dayakũkaĩkĩ matũ hamapai bikubaĩkĩ unãnuma hiwekĩ hatu yuãmayamakãwẽ, mã haskaibu ikũwãbumã matukiri pe uĩkĩ hawa txakabuuma hau xinãnũbunã.
Jesus ana huirã, eskakirãshanikiaki, na hãtxarã
13Ẽ betsabu inũ ẽ puibuũ, Jesus ikũwaĩ betsa mawaya mã punu nukayamashanũbũ matu yusĩnũ ea nĩkakãwẽ. Jesus ikũwaĩ mawai habũ Jesus ikũwãma keskabumaki. Haskawẽ taea kashai bis itxakayamai: “Ana hiweamaki”, iwanã, xinãkĩ yuiyamakubaĩkãwẽ. 14Hakia nukurã, nũ ana haskakiri xinãmaki. Jesus mawa Deusũ ana bestẽwani nũ ikũwaiĩ. Haska wani ikũwaĩ nukuri nũ mawa Jesus bestẽwani keska watã ha huaitiãri Deusũ nukuri bestẽwãtã Jesusbe nuku iyushanai nũ unaiĩ.
15Na eska matu yuikĩ haska nukũ Shanẽ Ibũ nuku yusĩni matu yusĩnũ nĩkakãwẽ. Jesus ana huaya haki nukui nũ ikũwaĩ hiweabu nuku dukũ nũ bebuama ishanaii. 16Hakia Deus nai anua sai ikĩ hawẽ nai tsuma shanẽ ibu yunua hatũ dasibibu itxawaya Deusũ trombeta hawẽ nai tsumã txã txã akaya nai anua nukũ mekenã Cristo butui shaba putxinĩ nikẽ Cristo ikũwaĩ mawanibu habu dukũ Deusũ ana bestẽwãtã 17nuku nũ hiweaburi hatube Deusũ nuku ainiaya nai kuĩ merã Jesuski nukutã nũ habe hiwepakeshanaii, ikibi ikirã. 18Haskawẽ taea na yusĩa hãtxa nĩkai ana hawa dateama xinã txãkaĩ hatube benimanamerikubaĩkãwẽ.
Currently Selected:
1 Tessalonicenses 4: cbsBR
Highlight
Copy
Compare
Share
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
