Rɔmɛ̀n-anmàn-bɔ̀ 8

Ɛwúvà mán Ɔwɔ Hɛ́n Prɔnprɔn mɛhi

1Zɛtɛn zɛtɛ̀ lɔ, nwùbɔ̀ ke sɩ̀ vru dù kɛ̀ tán anwrɔn hɔ̀n léyi dú Zhezü Krisì bɔ̀sɔ̀ lɔ mɛ̀n nɔn. 2Ɔmuhi Ɛnhɛ́n Prɔnprɔn nyànmàn léyi kɛ tán ɛwúvà-kɔrɛ̀ Zhezü Krisì bɩmɛ̀n nɔn, bɩ́ mɛ́n sɔhɔ́ ɛgbàn nyànmàn mán owù tamɛ̀n. 3Ɔwɔ hán eci léyi Mohizì nyànmàn kè sɩ̀ hàn rɔ̀a nɔn sá nmù, ɔmuhi ɔwrɔnẅì jɛ̀ ke sɩ̀ tán nɛ̀n ɛkɔrɛ̀srɔn: ɛgbàn léyi nɛ lɛ mrɛ́n nɛ̀n sɔhɔ́ nɔn, nɛ̀n bó ɔwrɔnẅì nwù n'edùwrú-ẅia lɔ mɛ̀n, kɩ nɛ̀n hán nɛ́n dùku n'ɛnẅì vá dú ɔwrɔnẅì wúvà gbànkàn lɔ mɛ̀n. 4Ɔwɔ hán eci ndɔ lɔ, ô ɛnyànmàn wú ci hɔ̀n lɔ kɛ sá nmù bɔ́ ɛmɛ̀n, bɔ́ léyi bɔ́ ɛwúvà ke sɩ́ vru crɛnyan bɔ̀, tɛ́n ke le dú Ɛnhɛ́n Prɔnprɔn mɛ̀n nɔn. 5Annanwɔrɛ mɛ̀n lɔ, anwrɔn hɔ̀n léyi y'ɛwúvà kɛ crɛ nyan yɔ nɔn, yɔ hán y'ɛnbɔrɛmɛ̀n ci hɔ̀n lɔ; tɛ́n anwrɔn hɔ̀n léyi y'ewúvà lɔ dú Ɛnhɛ́n Prɔnprɔn mɛ̀n nɔn, yɔ wá Ɛnhɛ́n Prɔnprɔn ci hɔ̀n lɔ esùva. 6Ke dú kɛ bɔ́ hán bɔ́ ɛnbɔrɛmɛ̀n ci hɔ̀n léyi bɔ́ ji nɔn hô, bɔ́ hɔ́n owúemɛ̀n; tɛ́n ke dú kɛ bɔ́ hán Ɛnhɛ́n Prɔnprɔn ci hɔ̀n léyi ke ji nɔn hô, bɔ́ hɔ́n ɛwúvà-kɔrɛ̀ mɛ̀n mán anwɔwɔ mɛ̀n. 7Anwrɔn hɔ̀n léyi y'ɛnbɔrɛmɛ̀n ci hɔ̀n lɔ ẅɛn yɔ sɔhɔ́ Ɔwɔ kɔhɔ̀n-hán mɛ̀n nɔn, yɔ dú Ɔwɔ gbri-bɔ̀; yɔ sɩ́ sɩ́ y'edomɛ̀n ɛnhi Ɔwɔ nyànmàn tɛ̀sɛ̀n, kɩ yɔ sɩ̀ hán rɔ́ mán. 8Anwrɔn hɔ̀n léyi y'ɛnbɔrɛ kɛ wá ɛnyànmàn tán yɔ nɔn, yɔ sɩ̀ cüɛn Ɔwɔ ɛvɛ̀ rɔ́.

9Tɛ́n nyɛ́n, nyɛ́n sɩ́ hán nyɛ́n dùku ny'ɛwúvà ci; ny'ɛwúvà lɔ dú Ɛnhɛ́n Prɔnprɔn mɛ̀n, ɔmuhi Ɔwɔ Hɛ́n Prɔnprɔn dú nyɛ̀n ɛmɛ̀n nɔn. Ɔwrɔn léyi kè sɩ̀ ẅɛ̀n Krisì Hɛ́n lɔ nɔn, nɛ̀n sɩ̀ dù Krisì tɛn. 10Ke dú kɛ Krisì dú nyɛ̀n ɛmɛ̀n, ny'edùwrú tɛn kɛ lɛ hɔ́n owúemɛ̀n ɛgbàn kruhú, tɛ́n, ɛnhɛ́n dú ɛwúvà-kɔrɛ̀ ny'ɛmɛ̀n, ɔmuhi yɛ srɔ nyɛ̀n ɛnyrɔnnan-bɔ̀ Ɔwɔ zìwú nɔn. 11Ke dú kɛ Ɔwrɔn léyi bɩ́ Zhezü owú-bɔ̀ mɛ̀n sɩ́ ɔkɔrɛ-bɔ̀ mɛ̀n nɔn, n'Ɛnhɛ́n lɔ dú nyɛ̀n ɛmɛ̀n hô, zɛtɛn Ɔwɔ léyi bɩ́ Krisì owú-bɔ̀ mɛ̀n sɩ́ ɔkɔrɛ-bɔ̀ mɛ̀n nɔn, kɛ lɛ tán ny'owú-dùwrú hɔ̀n lɔ ɛwúvà-kɔrɛ̀ n'Ɛnhɛ́n léyi dú nyɛ̀n ɛmɛ̀n nɔn n'ebɩmɛ̀n.

12Ɔmu lɔ de, anwrɔn-nɛ́n-muan-ẅì hɔ̀n, bɔ̀ ẅɛn eci-hán ndù, tɛ́n eci-hán ndɔ lɔ ke sɩ́ crɛnyan bɔ́ ɛwúvà ci léyi ke ji nɔn. 13Ɔmuhi, ke dú kɛ nyɛ hán eci léyi ny'ɛwúvà dùku ke ji nɔn hô, nyɛ́n le wù. Tɛ́n ke dú kɛ, Ɛnhɛ́n Prɔnprɔn bɩmɛ̀n, nyɛ hán ny'ɛnbɔrɛmɛ̀n-kɔ̀tɛ́-ci lɔ ke wù hô, nyɛ́n le dú ɛwúvà-kɔrɛ̀ mɛ̀n. 14Anwrɔn lɔ fɛn léyi Ɔwɔ Hɛ́n kɛ nyrɔn nɔn dú Ɔwɔ-ẅì hɔ̀n. 15Ɔmuhi Ɛnhɛ́n léyi nyɛ́n cɔ̀ nɔn, kè sɩ̀ dù Ɛnhɛ́n léyi kɛ srɔ nyɛ̀n anwɔ̀n-bɔ̀ kɩ kɛ hán ɛnjansù ke vru ke yɩ́ ny'ɛnbɔrɛ lɔ; tɛ́n Ɛnhɛ́n Prɔnprɔn de kɛ srɔ nyɛ̀n Ɔwɔ-ẅì hɔ̀n kɩ kɛ hán bɔ̀ bɔ́ di bobo bɔ́ dɔ́ Ɔwɔ le: “Ô mɛ́n Dade!” 16Ɔwɔ Hɛ́n dùku kɛ dɔ́ bɔ́ ɛnhɛ́n lɔ le, bɔ̀ dú Ɔwɔ-ẅì hɔ̀n. 17Bɔ̀ dú n'ɛẅì hɔ̀n, ke dú ɔmu lɔ hô, bɔ́ mán bɔ́ lɛ cɔ́ anvrɛn léyi Ɔwɔ wá nɛ́n fɛcüè ɔmùan, bɔ́ mán Krisì mɛhi bɔ́ le dú n'anvrɛn lɔ mɛ̀n; ɔmuhi ke dú kɛ bɔ́ mán Krisì mɛhi bɔ́ kán ɛgbàn hô, bɔ́ mán nɛ́n mɛhi bɔ́ le dú n'eci-zrɔ lɔ mɛ̀n.

Ɔwɔ ci-zrɔ léyi kɛ và nɔn

18Me tro le bɔ́ ejüe-dì hɔ̀n léyi dú ɛnvra ndɔ lɔ mɛ̀n nɔn, ke sɩ̀ krɔn eci-zrɔ léyi Ɔwɔ kɛ lɛ hán bɔ̀ bɔ̀ kàn nɔn. 19Ɔwɔ kɔrɛ̀-ci mumù lɔ fɛn kɛ vrá edù cüìcüìemɛ̀n nbì léyi Ɔwɔ kɛ lɛ hán n'ɛẅì hɔ̀n kɛ kán n'eci-zrɔ lɔ nɔn. 20Ɔmuhi Ɔwɔ kɔrɛ̀-ci dú ɛcüì hɔ̀n léyi kè sɩ̀ ẅɛ̀n vɔ̀nshɛ́ nɔn y'ɛkɔrɛ̀srɔn wú, kɩ ndɔ lɔ, kè sɩ̀ dù hɩ le Ɔwɔ kɔrɛ̀-ci dùku ke ji nɔn, tɛ́n, ɔmuhi Ɔwɔ dùku wá nɛ̀n ɛmɛ̀n nɔn. Ɛnvra lɔ fɛn esɛ́ tɔ̀n dú ɛmɛ̀n: 21dú hɩ le ɛnbì tɔ̀n, Ɔwɔ kɔrɛ̀-ci dùku ke le dú eci-jrɛ́-wrɔn léyi ẅɛn nɛ̀n hɛ́n anwɔ̀nẅiemɛ̀n, kɔrɛ̀-srɔn wú kɛ̀ srɔ ɛntrɛ kɩ nɛ lɛ cɔ́ eci-zrɔ léyi dú Ɔwɔ-ẅì hɔ̀n léyi ye srú ze nɔn tɛn. 22Annanwɔrɛ mɛ̀n lɔ, bɔ́ vru bɔ́ nyri zɛtɛ̀ lɔ le, Ɔwɔ kɔrɛ̀-ci mumù lɔ fɛn dú nwàn srɔ́n mɛ̀n mán ɛgbànkan mɛ̀n, hán ɛnnyɔnwrɔn léyi dú ɛnẅìbîemɛ̀n nɔn hɔ́. 23Tɛ́n kè sɩ̀ dù Ɔwɔ kɔrɛ̀-ci zri kɩ: bɔ́ léyi bɔ́ gɔ̀ cɔ́ Ɛnhɛ́n Prɔnprɔn, dú ɛnvrakpà Wɔ cice-ci nɔn, bɔ́ mán bɔ́ srɔ́n nwàn ɛmɛ̀ntɛ̀ mɛ̀n bɔ́ hɛ́n, kɩ bɔ́ vrá, Ɔwɔ kɛ̀ hán bɔ̀, bɔ̀ srɔ n'ɛẅì hɔ̀n, ô kɛ̀ tán bɔ̀ ebɩdie léyi sá nmù nɔn. 24Ɔmuhi ye bɩ́ bɔ̀ ye die, tɛ́n esɛ́ mɛ̀n kɩ. Ke dú kɛ yɛ kán eci léyi ye sɛ́ nɔn, ke sɩ̀ vrù dù esɛ́: antɔnwrɔn de ke le vru kɛ ẅɛn esɛ́ eci léyi nɛ kàn nɔn wúɛ nɛ́n? 25Tɛ́n ke dú kɛ bɔ́ ẅɛn esɛ́ eci léyi bɔ́ sɩ́ kán nɔn wú, bɔ́ vrá eci lɔ ɛnbɔrɛ-ẅɛ̀n-hɛ́n mɛ̀n. 26Ɔmu zri lɔ, Ɛnhɛ́n Prɔnprɔn mán kɛ wá bɔ̀ ɛkɔrɛ̀, ɔmuhi bɔ̀ dú ɛjɛ́-bɔ̀ nɔn. Annanwɔrɛ mɛ̀n lɔ, bɔ́ sɩ́ nyri sɛ́n Ɔwɔ kɛ hán ɔmu le ke ji nɔn; tɛ́n Ɛnhɛ́n Prɔnprɔn dùku kɛ sɛ́n Ɔwɔ kɛ tán bɔ̀ kɩ kɛ ẅɛn ɛnhyɔ̀bɔ̀-dì léyi ankà-dɔ̀ zriɛmɛ́n ke sɩ̀ cɔ́ ɛwú rɔ́ nɔn. 27Kɩ Ɔwɔ léyi kɛ kán ɛnbɔrɛ hɔ̀n lɔ mɛ̀n nɔn, ke nyri eci léyi Ɛnhɛ́n Prɔnprɔn ke ji kɛ̀ sán, ɔmuhi Ɛnhɛ́n Prɔnprɔn kɛ sɛ́n tán ankaẅì-bùtan-ẅɛn-bɔ̀ hán ɔmu le Ɔwɔ kɛ cüɛ̀n nɔn.

28Bɔ́ nyri ɔmu le ɛci hɔ̀n lɔ fɛn dú anvrɛn tán anwrɔn hɔ̀n léyi Ɔwɔ kɛ cüɛ̀n nɔn, mán anwrɔn hɔ̀n léyi nɛ̀n bi kè dú n'ankɔnda kɔ̀hɔ̀n lɔ mɛ̀n nɔn. 29Ɔmuhi Ɔwɔ gɔ́ mrɛ́n yɔ nbɩ; nɛ̀n vru nɛ̀n wá, ô yɔ dù yɔ cá n'ɛnẅì hɔ́, ô n'ɛnẅì ndɔ lɔ kè dú ɛnvrakpà ẅì, nɛ́n muan-ẅì hɔ̀n bobrebe hɔ̀n lɔ mɛ̀n. 30Anwrɔn hɔ̀n léyi y'ɛkruhú Ɔwɔ gɔ́ wá ɔmùan ndɔ lɔ nɔn, yɔ mán nɛ̀n bi yɔ; anwrɔn hɔ̀n léyi nɛ̀n bi nɔn, yɔ mán nɛ̀n srɔ yɔ ɛnyrɔnnan-bɔ̀ n'ezìwú, anwrɔn hɔ̀n léyi nɛ̀n srɔ ɛnyrɔnnan-bɔ̀ nɔn, yɔ mán nɛ̀n tán yɔ, yɔ dú n'eci-zrɔ lɔ mɛ̀n.

Ɔwɔ cüɛ̀n vri-sì

31Ankà tán de bɔ́ lɛ dɔ̀ kè fɛ́ ɛwú nɛ́n? Ke dú kɛ Ɔwɔ ke dú bɔ́ tɛn hô, antɔnwrɔn de kɛ lɛ kɛ́n bɔ̀ ezì nɛ́n? 32Ɔwɔ kè sɩ̀ ẅɛ̀n n'ɛnẅì kɛ̀ sɔhɔ́, tɛ́n nɛ̀n bɩ́ yi nɛ̀n tán ye wrì, bɔ́ lɛ fɛn bɔ́ ɛkruhú: anhɔntan kɛ́ nɛ́n sɩ̀ tán bɔ̀ eci lɔ fɛn mán n'ɛnẅì mɛhiɛ? 33Antɔn de kɛ lɛ bɔ́ anwrɔn hɔ̀n léyi nɛ̀n mrɛ́n nɛ̀n bɩ nɔn nwù nɛ́n? Ɔwrɔnẅì zriɛmɛ́n, ɔmuhi Ɔwɔ de tán yɔ ɛnyràn nɔn. 34Zɛtɛn antɔnwrɔn de kɛ lɛ bɔ́ yɔ nwù tɛ̀ nɛ́n? Ɔwrɔnẅì zriɛmɛ́n, ɔmuhi Zhezü Krisì dú ɔwrɔn léyi wù nɔn, n'ɛshishi lɔ, nɛ̀n dú owúemɛ̀n nɛ̀n frɔ́, nɛ̀n yɛ́ Ɔwɔ zì-kɔrɛ̀ kɔrɛ̀ kɩ nɛ sɛ́n tán bɔ̀. 35Antɔnwrɔn de kɛ lɛ mrɛ́n bɔ̀ Krisì cüɛ̀n lɔ mɛ̀n kɛ̀ sɔhɔ́ nɛ́n? Ejüedì kɛ lɛ hán tɛ̀, kale ankà-tro, kale owú-gbànkàn, ɔmùanwù, ɛmìan, muzhie, owùɛ? 36Hán ɔmu le Owrú kɛ dɔ̀ nɔn:

“V'ɛkruhú de yɛ hɛ́n bɔ̀ owù-wɔ̀n mɛ̀n ɛcɛ̀n mumù lɔ fɛn,

yɛ hán bɔ̀ eci kɛ cá kɔkɔsɛ̀ hɔ̀n léyi ye sɩ́ owri-yri nɔn.”

37Tɛ́n eci ndɔ lɔ fɛn mɛ̀n, b'ɔkɔ̀nkà lɔ sá nmù, ɔwrɔn léyi cüɛn bɔ̀ nɔn, n'ebɩmɛ̀n. 38Hɛ̀ɛ̀, mɛ̀n ẅɛn esɛ́ le eci zriɛmɛ́n ke sɩ̀ ẅɛn bɔ̀ kɛ̀ sɔhɔ́ n'ɛcüɛ̀n lɔ mɛ̀n: owù mán, ɛwúvà mán, Ɔwɔ-kùyüre-bɔ̀ hɔ̀n mán, ɛkɔrɛ̀levri-bɔ̀ nyàntɛn hɔ̀n mán, anhobɩ́ kɔrɛ̀srɔn hɔ̀n lɔ mán, ɛnvra léyi bɔ̀ dú ɛmɛ̀n nɔn mán, ɛnvra léyi dú ezì kɛ và nɔn mán, 39ɛwú-cüì-hɔ̀n lɔ mán, ɛnhi tɛn hɔ̀n lɔ mán, eci nyàntɛn léyi Ɔwɔ hán nɔn mán, eci-ẅì zriɛmɛ́n ke sɩ̀ ẅɛn bɔ̀ mrìmrì kɛ̀ sɔhɔ́ ɛcüɛ̀n léyi Ɔwɔ ẅɛn bɔ́ ɛwú, Zhezü Krisì, bɔ́ Ɛẅɛnwrɔn kruhú nɔn.

Currently Selected:

Rɔmɛ̀n-anmàn-bɔ̀ 8: ƐAA03

Highlight

Copy