Rɔmɛ̀n-anmàn-bɔ̀ 7

Sɛnpɔ̀ léyi yɛ cɔ́ eyirì mùan-wá-ankà wú nɔn

1Anwrɔn-nɛ́n-muan-ẅì hɔ̀n, annanwɔrɛ mɛ̀n lɔ nyɛ́n nyri ankà léyi mɛ vá nyɛ̀n ɛ dɔ́ nyri nɔn. Ɔmuhi nyɛ́n nyri ɛnyànmàn nɔn: ɛnyànmàn ẅɛn ɛkɔrɛ̀-levri ɔwrɔnẅì wú hàn kɩ kɛ lɛ cɔ́ n'ɛmɛẅi trɔ vra. 2Nyàn sɛnpɔ̀ ndɔ lɔ, ɛnnyɔnwrɔn léyi yiri ɛncɔnwrɔn nɔn, dú ɛnyànmàn kɔrɛ̀-levri wú nɛ́n cüì tɛ̀sɛ̀n, ɛnvra lɔ fɛn léyi ɛncɔnwrɔn lɔ dú ɔkɔrɛ-bɔ̀ mɛ̀n nɔn; tɛ́n ke dú kɛ ɛncɔnwrɔn lɔ ke wù hô, ɛnnyɔnwrɔn lɔ kè sɩ̀ vrù dù ɛnyànmàn kɔrɛ̀levri wú nɛ́n cüì tɛ̀sɛ̀n hán. 3Ke dú kɛ ɛnnyɔnwrɔn lɔ kɛ srɔ ɛncɔnwrɔn nyàntɛn hi ɛnvra léyi nɛ́n cüì dú ɔkɔrɛ-bɔ̀ mɛ̀n nɔn, ɛnnyɔnwrɔn ndɔ lɔ kɛ hán ɛncɔnwrɔn-bi-gbàn; tɛ́n ke dú kɛ nɛ́n cüì ke wù, nɛ srɔ ɛnnyɔnwrɔn kora ɛnyànmàn zìwú, kɩ ne le dú ɛncɔnwrɔn nyàntɛn hi, nɛ́n sɩ̀ vru dú ɛncɔnwrɔn-bi-gbàn-hán mɛ̀n. 4Hɩ zri lɔ de dú tán nyɛ́n mán nɔn, anwrɔn-nɛ́n-muan-ẅì hɔ̀n. Nyɛ́n cɔhɔ́ ɛnyànmàn wú, ɛnvra léyi nyɛ́n mán Krisì dùwrú mɛhi nyɛ́n dú ɔbɔ̀sɔ̀ mɛ̀n nɔn. Ɔmu lɔ, de zɛtɛ̀ lɔ, nyɛ́n dú ɔwrɔn tɔ̀n tɛn, ɔwrɔn léyi dú owú-bɔ̀ mɛ̀n vru vá ɔkɔrɛ-bɔ̀ mɛ̀n, ô bɔ̀ hán eci léyi kɛ cüɛn Ɔwɔ ɛvɛ̀ nɔn. 5Annanwɔrɛ mɛ̀n lɔ, ɛnvra léyi bɔ́ dú ɛwúvà léyi kɛ cüɛn bɔ̀ ɛvɛ̀ n'eci-gbangbàn-hán mɛ̀n nɔn, ɛnyànmàn kɛ kɛ́n bɔ́ mumù lɔ sɩ́, kɩ bɔ́ hán eci léyi ke sɩ́ owù nɔn. 6Tɛ́n zɛtɛ̀ lɔ, bɔ̀ sɩ̀ vrù dù ɛnyànmàn kɔrɛ̀-levri wúɛ, ɔmuhi bɔ̀ wú eci léyi kɛ ẅɛn bɔ̀ hɛ́n ɛgbàn tamɛ̀n nɔn, n'ɛmɛ̀n. Ɛkɔrɛ̀levri dù bɔ́ lɛ hán Ɔwɔ ci-bɩtan-kɔ̀hɔ̀n eci-hán wrù mɛ̀n, Ɛnhɛ́n Prɔnprɔn kɔrɛ̀levriemɛ̀n, kɩ kè sɩ̀ vrù dù eci-hán gbànvri ndɔ léyi ɛnyànmàn merɛ́n nɔn n'ɛkɔrɛ̀levri mɛ̀n.

Ɛnyànmàn mán ɛgbàn

7N'ɛwú lɔ ankà tán de bɔ́ lɛ dɔ̀ nɛ́n? Ɛnyànmàn dú ɛgbàn? Annànwɔrɛ mɛ̀n lɔ hɔ̂! Tɛ́n ɛnyànmàn hán mɛ̀n, mɛ̀n nyri eci léyi dú ɛgbàn nɔn. Annanwɔrɛ mɛ̀n lɔ, ke dú kɛ ɛnyànmàn kè sɩ̀ dɔ́ mɛ̀n hô, mɛ́n sɩ̀ nyri eci léyi dú “eci-ɛvɛ̀-cüɛ̀n nɔn”. 8Ɛgbàn ci ɛnyànmàn kɔrɛ̀levri wú kɩ wá m'ɛnbɔrɛ lɔ mɛ̀n ɔwrɔn ci ɛvɛ̀ cüɛ̀n mɛ̀ntɛ mɛ̀ntɛ. Ɔmuhi, ke dú kɛ ɛnyànmàn bàdà hô, ɛgbàn dú owú ci. 9Ɛnbìɛhɛ́n léyi ɛnyànmàn bàdà nɔn, mɛ̀n dú ɔwrɔn kɔrɛ-kɔrɛ; tɛ́n ɛnvra léyi ɛnyànmàn nvà nɔn, ɛgbàn bru ɛwúvà mɛ̀n 10kɩ mɛ tɛn mɛ́n wù: ɛnyànmàn léyi kɛ lɛ nyrɔn bɔ̀ ke sɩ́ ɛwúvà mɛ̀n nɔn, m'eyri lɔ, ne sɩ́ owúemɛ̀n. 11Ɔmuhi ɛgbàn ci ɛnyànmàn kɔrɛ̀-levri wú kɩ frɛ́n mɛ̀n, kɩ n'ɛmɛ̀n lɔ nɛ̀n hán mɛ̀n mɛ́n wù.

12Ɔmu lɔ de, ɛnyànmàn dùku mán dú prɔnprɔn, nyrɔn kɩ zrɔ. 13Eci léyi zrɔ nɔn, zɛtɛn srɔ m'owú ciɛ? Annanwɔrɛ mɛ̀n lɔ hɔ̂! Ɛgbàn de wá ndɔ lɔ sɩ́ nɔn. Ɔmu lɔ de ɛnyànmàn yé ɛgbàn dùwrú annanwɔrɛ lɔ nɔn: nɛ̀n bɩ́ eci léyi zrɔ nɔn, nɛ̀n hán m'owù. Kɩ nyàn ɔmu le ɛgbàn sán srɔ eci gbàngbàn, ɛnyànmàn kɔrɛ̀levriemɛ̀n mrìmrì nɔn.

Ɛgbàn ká ɔwrɔnẅì

14Bɔ́ nyri ɔmu le ɛnyànmàn dú ɛnhɛ́n mɛ̀n ci; tɛ́n mɛ̀n, mɛ̀n dú ɛjɛ-wrɔn léyi yɛ hɛ́ ɛgbàn tamɛ̀n, hán ɔwɔ̀n-wrɔn hɔ́ nɔn. 15Mɛ́n sɩ́ nyri eci léyi mɛ hán nɔn: ɔmuhi mɛ́n sɩ́ hán eci léyi ke ji le mɛ̀n hán nɔn, tɛ́n mɛ hán eci léyi mɛ́n sɩ́ cüɛn hán nɔn. 16Annanwɔrɛ mɛ̀n lɔ, ke dú kɛ mɛ hán eci léyi mɛ́n sɩ́ cüɛn hán nɔn, hɩ wú lɔ, me nyri ɔmu le ɛnyànmàn zrɔ. 17Ke dú ɔmu lɔ hô, kè sɩ̀ dù mɛ̀n de mɛ́n hán eci ɔmu lɔ nɔn, tɛ́n ɛgbàn léyi dú mɛ̀n ɛmɛ̀n nɔn, de kɛ hán eci lɔ nɔn. 18Ɔmuhi mɛ̀n nyri ɔmu le eci ankrànkràn bàdá mɛ̀n ɛmɛ̀n, mɛ̀n léyi edùwrú ẅɛn mɛ̀n ɛjɛ̀ nɔn. Annanwɔrɛ mɛ̀n lɔ, eci-anvrɛnvrɛn-hán dú mɛ̀n ɛnbɔrɛ mɛ̀n, tɛ́n mɛ̀n sɩ̀ ẅɛ̀n nɛ hán dùyì. 19Annanwɔrɛ mɛ̀n lɔ, mɛ́n sɩ́ hán anvrɛn léyi me ji nɔn kɩ mɛ hán ɛgbàn léyi mɛ́n sɩ́ jiɛ nɔn. 20Ke dú kɛ mɛ hán eci léyi mɛ́n sɩ́ jiɛ nɔn hô, zɛtɛn kè sɩ̀ vrù dù mɛ̀n de mɛ́n hán eci lɔ nɔn, tɛ́n ɛgbàn léyi dú mɛ̀n ɛmɛ̀n nɔn.

21Zɛtɛn me nyri eci-hán ndɔ lɔ: mɛ́n léyi me ji mɛ̀n hán anvrɛn nɔn, ɛgbàn kɩ dú eci léyi mɛ lɛ hán tɛ̀ nɔn. 22M'ɛnbɔrɛ mɛ̀n lɔ mɛ ẅɛn Ɔwɔ nyànmàn cüɛ̀n. 23Tɛ́n mɛ cɔ́ m'ɛnbɔrɛ lɔ mɛ̀n, ɛnyànmàn nyantɛn tɔ̀n kɛ kɔ́n ɛnvrapkà tɛn léyi m'ankà-nyrì ke bɩ nɔn, anhà. Nɛ hán mɛ̀n mɛ srɔ ɛgbàn nyànmàn léyi dú mɛ̀n ɛmɛ̀n nɔn, n'ɔwɔ̀n-wrɔn. 24Ɛnhyɔ̀bɔ-wrɔn léyi dú mɛ̀n nɔn! Antɔn de kɛ lɛ mrɛ́n mɛ̀n edùwrú ndɔ léyi ke sɩ́ mɛ̀n owúemɛ̀n nɔn kɛ̀ sɔhɔ́ nɛ́n? 25Ɔwɔ kɛ̀ cɔ́ ɛmrɛ́n, Zhezü Krisì bɔ́ Ɛẅɛnwrɔn bɩmɛ̀n!

Ɔmu lɔ de, mɛ̀n dú Ɔwɔ nyànmàn ci-bɩtan-kɔ̀hɔ̀n-hán mɛ̀n m'ankà-nyriemɛ̀n, tɛ́n m'ɔwrɔnẅì jɛ̀ lɔ mɛ̀n, mɛ̀n dú ɛgbàn-nyànmàn-kɔhɔ́n mɛ̀n.

Currently Selected:

Rɔmɛ̀n-anmàn-bɔ̀ 7: ƐAA03

Highlight

Copy