Zɛkɛrâya 7
7
Yâwɛɛ fé lɛ́ɛ-suŋ seɣɛɛ wɛ́lini
1Dairɔ kɛ́ɛ a kâloŋ ŋɔkóraŋ ǹáaŋ su worɛ̂-woo è kùla Yâwɛɛ yêei é pá Zɛkɛraya pɔ́ ŋ̀áloŋ ǹɔ́ɔlu mɛi náaŋ ŋɔɣele-kûu náaŋ su nyii da dòli a Kesilɛi.
2Nya ƃe ǹûai kɛ̀ Bɛtɛi dí Sarizɛ da Lɛgɛmɛlɛ tɛ̀ɛ da sinâa da-ni a gɛɛ dí Ŋ̀wála-wâla kélee Yâwɛɛ marê kɛ́ kpɔŋ-mâa mɛni ma, 3a gɛɛ dí zâla láa-soŋ-ƃelai marê kɛ́ Yâwɛɛ Ŋɔpɛ́rɛi mu da ŋɔlóno kɛ́-ƃelai a bere sîi ŋí, “Ǹɛ̂lɛɛi ŋá malôŋ see ƃé, ŋá suŋ siɣe ŋ̀áloŋ ǹɔ́ɔlui su yɛ̂ɛ berei ŋá wɔ́lɔ gɛ̀ la kóraŋ támaa yée mui?”
4Yâwɛɛ ŋɔwóoi è pà ḿbɔ ǹyɛɛi, 5“M̀ó ǹûai kélee dîa díkaa ǹɔii mai da zâla láa-soŋ-ƃelai. Tãi ká kɛ̀ sûŋ siɣêi la ŋ̀áloŋ ǹɔ́ɔlui da mɛi feerɛi su, ká kɛ́ malôŋ sèe ƃò góraŋ buu lɔ́ɔlu mɛi feerɛ ŋí yée mui, ká kɛ̀ gɛ̂i ḿɛni ma? 6Tãi ká kɛ̀ mii-sɛ̂ŋ miî la ká kɛ́ kákpele, káfe mii ní ká kɛ́ kákpele kákpîŋ mɛni ma?”
7Tãi Zerusâlɛŋ è kɛ̀ la a ǹáa fɛ́ɛ a núu-kpune da tɔɔ-sã̂a, ŋɔtaa-lêe-ŋai tínaŋɔɔ ma ǹɔii kwára-pere da diŋ-tiŋ kélee láa fɛ́ɛ a núu-kpunei, Yâwɛɛ ŋɔlóno kɛ́-ƃelai dífe ŋ̀óo-ŋai ŋí ƃó ní?
Wolii kpɔ̂lɔ a núu tɛ̀ɛ luɛ-lâa su
8Yâwɛɛ ŋɔwóoi è pà Zɛkɛraya pɔ́ ǹyɛɛi, 9“Ká mɛni-sâa ŋá tée a zã́a, ká mɛni lɛ́lɛɛ kɛ́ kákîe-ni dîɛ, ká kákîe-ni malôŋ káa. 10Káfe mɛni nyɔ́mɔɔ kɛ̀ a pɔ́ɔ-nɛ̂ni, tee-lôŋ, ŋɔ̃́ya, kpaa máŋ kôlo-nuu, káfe mɛni nyɔ́mɔɔ kpɛ̀tɛ kálii su kákîe-ni mɛni ma.”
11“Kɛ́lɛ dífe díwolii tɔɔ ní, dí díkoôŋ tɛ̀ a dia dí díwoli láa tɛ́ a gɛɛ dífe mɛni mɛ̂ni, 12dí dílii su kpànaŋ yɛ̂ɛ kɔni a gɛɛ dífe díwoli tɔ̀ɔ dɔ̂ŋ ma da ŋ̀óo-ŋai ŋá dɛ̀ɛ ŋálono kɛ́-ƃelai maa-ŋuŋ-ŋai pɔ́ ŋámɔ̂leŋ sârai. M̀ɛni ma ńii è ŋwàna a gɛ́tɛ dímɛni ma. 13Tãi ŋá dítòli lai, dífe díwoli tɔɔ ní. M̀ɛni ma tãi dí ńdòli lai, fé ŋ́oli tɔ̀ɔ ní. 14Ǹyaŋ ŋá dítaa-taa dí lí ǹɔii gwaa kélee yɛ̂ɛ fãa kɛ́tɛ ƃɛ́i dífe kɛ́ ní a nàa kɔ́lɔŋɔɔi. M̀ɛni ma ǹɔii dí nɛ̀ɛ dípôlui, núu fé lɛɛ ní naa, núu fé ŋɔ́nɔ li ní naa, núu fé kula ní naa. M̀ɛni ma ǹɔii lɛ́lɛɛi tí è lɛ̀ɛ nɔ́ naa kpɛ́ni-kpɛni.”
Currently Selected:
Zɛkɛrâya 7: KWB
Highlight
Copy
Compare
Share
Want to have your highlights saved across all your devices? Sign up or sign in
