Niɛmaya 3
3
Dí Zerusâlɛŋ taa-leei ŋɔsiɣãŋ tɔ̀ɔ ŋɔ́nɔ pôlu
1Berei ŋí ƃé dí Zerusâlɛŋ taa-leei ŋɔsiɣãŋ-ŋai tɔ̀ɔ la pôlu. Zâla láa soŋ nuu kɛ́tɛi Iliasi da m̀arâa sala láa soŋ-ƃelai dí ziɣãŋ nyii da doli a M̀ála Siɣãŋ lái kpɛ̀tɛ. Dí gbɛ̀tɛ dí gbôŋ too dí ǹaa tɛɛ Ɣâla pɔ́ ŋɔtíi kɛ́ mɛni ma. Ǹaa pôlu ma, ziɣãŋ nyii kùla ǹyeŋkêŋ ma da dòli a Ǹyeŋkêŋ ŋuŋ Tɔnɔi (100), é lí ǹyeŋkêŋ ma da dòli a Ananiɛi dí ǹaa kélee tɛ̀ɛ Ɣâla pɔ́.
2Zɛleko sinâai dí ziɣãŋ m̀éla tɔ̂nɔ tɔ̀ɔ ǹaa pôlu pere.
M̀elâi nyii kɛ̀ ǹaa pôlu perei, Iŋri ǹóŋ Zakɔ è dɔ̀ɔ pôlu.
3Asanaa ŋɔkáayɔɔ-ŋai dí ziɣãŋ da dòli a Nyɛ̃ɛ Siɣãŋ lá kpɛ̀tɛ ŋɔ́nɔ pôlu. Dí gbôŋ sɛ̂lɛŋ wuru kpono-ŋai tɔ̂ɔ. È kɛ̀ tí, dí ziɣãŋ-ŋai lá kpôŋ-ŋai sɛ̂lɛŋ dí zɔɔ̂ŋ too sãai kpɛtɛ.
4Yuraya ǹóŋ-surɔŋ Mɛrimɔ nyii kɛ̀ a Akozi ǹóŋ-surɔŋ ŋɔlóŋ-surɔŋ è ziɣãŋ m̀éla nyii kɛ̀ ǹaa pôlu perei tɔ̂ɔ.
Berekaya ǹóŋ-surɔŋ Mɛsulaŋ nyii kɛ̀ a Misizabɛ ǹóŋ-surɔŋ ŋɔlóŋ-surɔŋ è ziɣãŋ m̀elâi kpéli tɔ̀ɔ pôlu nyii kɛ̀ ǹaa pôlu perei.
Baana ǹóŋ-surɔŋ Zadɔ è ǹaa pôlu pere ƃelai tɔ̂ɔ pôlu.
5Tikoa taai su sinaai dí ziɣãŋ pôlu pere ŋɔi tɔ̂ɔ. Kɛ́lɛ daai láa túɛ-ƃelai dífe fáa ní ma a gɛɛ dí díi bɛlɛ-pɛlɛɛi da kɛ́ nyii dí dɛ̀ɛ dípɔi.
6Pasia ǹóŋ Zoiada da Bisodiya ǹóŋ Mɛsulaŋ dí Zesana siɣãŋ lá sɛŋ kpɛ̂tɛ pôlu. Dí gbôŋ sɛ̂lɛŋ wuru kpono-ŋai tɔ̂ɔ. È kɛ̀ tí, dí ziɣãŋ-ŋai lá kpôŋ-ŋai sɛ̂lɛŋ dí zɔɔ̂ŋ too sãai kpɛ̀tɛ.
7Milataya da Zadɔŋ ƃé ziɣãŋ ǹaa pôlu-pere ŋɔi tɔ̂ɔ. Milataya è kùla Gibiɔŋ-taai su, Zadɔŋ é kúla Mɛronai-taai su. Gibiɔŋ da Mizipa sinâai ƃé kpɔŋ mâa tɛ̀ɛ dípɔ díi ŋí kɛ́ mɛni ma. Zinâai ŋí dí kɛ̀ Yufeletii Ya-leei ŋɔfólo liî pere lɔii kpiniŋ mɛi nuu kɛ́tɛi ŋɔpɛ́rɛi lá.
8Uziɛ è ziɣãŋ m̀éla da tɔ̀ɔ pôlu. Uziɛ kpîŋ è kɛ̀ a gôo ɣale nuu. Ǹâŋ láa ƃé kɛ̀ a Araya.
Ananaya ǹyaa máŋ è ziɣãŋ m̀éla da tɔ̀ɔ é seri la ƃɛ́i da ǹaa tòli a Ziɣãŋ M̀éla Kɛ́tɛi. Ananaya è kɛ̀ a wúru-ya kúŋ nɛ̃ɛ kpɛtɛ nuu.
9Lefaiya è ziɣãŋ m̀éla tɔ̂nɔ tɔ̀ɔ. Ǹâŋ láa ƃé kɛ̀ a Ɔ̂ɔ. Lefaiya è kɛ̀ a Zerusâlɛŋ lɔii m̀éla tɔ̂nɔ mɛi nûu.
10Zidaya è ziɣãŋ m̀elâi dɔnɔ tɔ̀ɔ. Ǹâŋ láa ƃé kɛ̀ a Aruma. Ŋɔpɛ́rɛi è kɛ̀ ziɣãŋ m̀elâi ŋí ma pere.
Atusi è ziɣãŋ m̀éla tɔnɔ tɔ̀ɔ ǹaa pôlu ma. Atusi ǹâŋ láa ƃé kɛ̀ a Asania.
11Maakiza da Aasɔɔ dí ziɣãŋ m̀éla tɔ̂nɔ tɔ̀ɔ da ǹyeŋkêŋ da dòli a Gbólo-kpɛtɛ Yeŋkeŋ. Maakiza ǹâŋ láa ƃé kɛ̀ a Ariŋ. Aasɔɔ ǹâŋ láa ƃé kɛ̀ a Paa-moa.
12Saluŋ è ziɣãŋ m̀éla tɔ̂nɔ tɔ̀ɔ. Ǹônii-nɛyãai dí kpɔŋ mâa tɛ̀ɛ bɔ́ díi ŋí kɛ́ mɛni ma. Saluŋ è kɛ̀ Zerusâlɛŋ lɔii kpiniŋ m̀éla tɔ̂nɔ mɛi. Saluŋ ǹâŋ láa ƃé kɛ̀ a Aloɛ.
13Nalôŋ da kɛ̂ ma Anuŋ é pɛ́lɛ Zanoa taa-leei su ƃelai dîa dí ziɣãŋ m̀éla tɔnɔ tɔ̀ɔ pôlu da dòli a Diŋ-tiŋ su Siɣãŋ. Dí gbôŋ sɛ̂lɛŋ wuru kpono-ŋai tɔ̂ɔ. È kɛ̀ tí, dí ziɣãŋ-ŋai lá kpôŋ-ŋai sɛ̂lɛŋ dí zɔɔ̂ŋ too sãai kpɛ̀tɛ. Dí lɛ̀ɛ ziɣãŋ tɔɔ̂i é lɛ́ɛ la zu dí seri ziɣãŋ m̀ɛ́i ma da ǹaa tòli a Duluŋ-ŋa Siɣãŋ lái. Ŋɔkôya è kɛ̀ a kɔ́ɔ ƃɔ́rɔni wála tɔnɔ pôlu ŋuŋ lɔ́ɔlu (1,500).
14Maakiza ƃé ziɣãŋ lá kpɛtɛ nyíi da dòli a Duluŋ-ŋa Siɣãŋ. Dí gbôŋ sɛ̂lɛŋ wuru kpono-ŋai tɔ̂ɔ. È kɛ̀ tí, dí ziɣãŋ-ŋai lá kpôŋ-ŋai sɛ̂lɛŋ dí zɔɔ̂ŋ too sãai kpɛ̀tɛ. Maakiza ǹâŋ láa ƃé kɛ̀ a Lika. Nya ƃe kɛ̀ Bɛɛ-akɛrɛŋ lɔii kpiniŋ mɛi.
15Saluŋ ƃé ziɣãŋ kpɛ̀tɛ da dòli a Ǹya Tôŋ ma Siɣãŋ, é vaâŋ kula ma. Dí gbôŋ sɛ̂lɛŋ wuru kpono-ŋai tɔ̂ɔ. È kɛ̀ tí, dí ziɣãŋ-ŋai lá kpôŋ-ŋai sɛ̂lɛŋ dí zɔɔ̂ŋ too sãai kpɛ̀tɛ. Gwaa da ma káa naa da ǹaa tòli a Sila Poai. È ziɣãŋ ŋí tɔ̂ɔ kɔ́ɔ pìlaŋ naa é seri la gâloŋ pɛrɛi pôlu. È tɛ̀ɛ la naa é lí é seri berei ma nyii a tɛ̂ Gâloŋ Deeƃé ŋɔtaa-lêei sui. Saluŋ è kɛ̀ a Mizipa lɔii kpiniŋ mɛi nûu. Saluŋ ǹâŋ láa ƃé kɛ̀ a Kowozɛ.
16Abu ǹóŋ-surɔŋ Niɛmaya ƃé ziɣãŋ tɔ̂ɔ kɔ́ɔ pìlaŋ Saluŋ ŋɔi ma é lí la é seri Deeƃé ƃolôŋ ma, é seri bóai lá nyii ǹûai dí ǹáai, é tɛ́ɛ naa é seri gɔ-kuluƃa-ŋai díkolii su. Niɛmaya ŋí ƃé kɛ̀ a Bɛzua lɔii kpiniŋ mɛi nûu.
Liiva-ŋai ziɣãŋ da tɔɔi
17Ǹaa pôlu ma, Liiva-ŋai ŋí dí ziɣãŋ gwaa da-ŋa ma tɔ̀ɔ:
Bani ǹóŋ-surɔŋ Leuŋ è da tɔ̀ɔ.
Asabiya è da tɔɔ. Asabiya è kɛ̀ Keila lɔii kpiniŋ gbua tɔ̂nɔ mɛi. È díi ŋí kɛ̀ ŋɔlɔii kpîniŋ láai su.
18Bavai è ziɣãŋ da tɔ̀ɔ. Ǹâŋ láa ƃé kɛ̀ a Inada. Bavai è kɛ̀ Keila lɔii kpiniŋ gbua kpéli mɛi.
19Izɛ ǹyaa máŋ è ziɣãŋ da tɔ̀ɔ. Ǹâŋ láa ƃé kɛ̀ a Zasua. Izɛ è kɛ̀ Mizipa lɔii kpiniŋ mɛi. È ziɣãŋ m̀elâi dɔnɔ tɔ̂ɔ kɔ́ɔ pìlaŋ díkɔ kɔ-sãai pûi kɛ́-pɛrɛi ŋɛ́i-tuɛ, é lɛ́ɛ la zu é seri ƃɛ́i ma ziɣãŋ è kɛ̀ a ŋ̀áleɛɛ naa ŋ̀ái.
20Baru è ziɣãŋ da tɔ̀ɔ. Ǹâŋ láa ƃé kɛ̀ a Zaƃai. Baru è ziɣãŋ tɔ̀ɔ é seri la Zâla láa soŋ nuu kɛ́tɛi Iliasi ŋɔpɛ́rɛi lá.
21Mɛrimɔ è ziɣãŋ da tɔ̀ɔ. È ziɣãŋ tɔ̂ɔ kɔ́ɔ pìlaŋ Zâla láa soŋ nuu kɛ́tɛi Iliasi ŋɔpɛ́rɛi lá é lí la ǹaa pôlu pere. Mɛrimɔ ǹâŋ láa ƃé kɛ̀ a Yuraya. Mɛrimɔ ǹâŋ ŋɔnàŋ láa ƃé kɛ̀ a Akozi.
Zâla láa soŋ-ƃelai nyii ziɣãŋ da tɔ̀ɔi
22Ǹaa pôlu ma, zâla láa soŋ-ƃelai kɛ̀ Zerusâlɛŋ da ǹaa kɔlɛ ma kpiniŋ-ŋai sui, dí ziɣãŋ m̀éla kpéli tɔ̀ɔ pôlu. Maa sâla láa soŋ-ƃelai láa ká ŋí:
23Bɛŋsima da Aasɔɔ dí ziɣãŋ m̀elâi tɔ̀ɔ pôlu kɛ̀ dípɛrɛ-ŋai ŋɛ́i-tuɛi.
Azaria è ziɣãŋ m̀elâi tɔ̀ɔ pôlu kɛ̀ ŋɔpɛ́rɛi ŋɛ́i-tuɛi. Azaria ǹâŋ láa ƃé kɛ̀ a Maaseia. Ǹâŋ ŋɔnàŋ láa ƃé kɛ̀ a Ananaya.
24Binui è ziɣãŋ tɔ̂ɔ kɔ́ɔ pìlaŋ ƃɛ́i Azaria è kòyaŋ naai é lí la ƃɛ́i ziɣãŋ è kɛ̀ a ŋ̀áleɛɛ ŋá naai. Binui ǹâŋ láa ƃé kɛ̀ a Inada.
25Pala è ziɣãŋ tɔ̂ɔ kɔ́ɔ pîlaŋ ƃɛ́i è kɛ̀ a ŋ̀áleɛɛ naa ŋái, é lí la ǹaa mɛi pere gâloŋ pɛrɛi ŋɛ́i-tuɛ, ƃɛ́i bɛ́rɛi mɛi káa-ƃelai da kâa sèe naai.
Pala ǹâŋ láa ƃé kɛ̀ a Uzai. Naa pôlu ma, Parosi ǹóŋ-surɔŋ Pidaya 26da Ŋ̀âla-pɛrɛi mu tii kɛ́-ƃelai nyii-ŋai dí séɛɛ è kɛ̀ Ofɛɛ-Yeei mai, dí ziɣãŋ da tɔ̀ɔ. Dí dɔɔ́ kɔ́ɔ pîlaŋ ƃɛ́i Pala è kòyaŋ naai. Dí lì la vóloi ƃêlai pere é lɛ́ɛ la zu dí seri Ǹya Siɣãŋ ma ƃɛ́i Ŋ̀âla-pɛrɛi mɛi káa ƃelai díyeŋkêŋ è kɛ̀ naai.
Ziɣãŋ tɔɔ ƃelai da-ŋa
27Gbakolo-ŋai kùla Tikoai, dí ziɣãŋ naa pôlu ŋɔi tɔ̂ɔ. Ziɣãŋ m̀éla veerɛ ɣelei dí dɔ̀ɔi ǹya ká ŋí: Dí gɔ́ɔ pîlaŋ ǹyeŋkêŋ kɛ́tɛi kɔlɛ ma nyii kɛ̀ Ŋ̀âla-pɛrɛ Kɛ́tɛi mɛi káa mɛni mai, dí lì la dí seri ziɣãŋ m̀ɛ́i kɛ̀ Ofɛɛ-yeei kɔlɛ ma Zerusâlɛŋ taa-leei sui.
28Zâla láa soŋ-ƃelai da kpɛ́ni-ŋa dí ziɣãŋ da tɔ̀ɔ pôlu. Dí gɔ́ɔ pîlaŋ ƃɛ́i da naa tòli a Zòo Siɣãŋ lá, dí lí la ǹɔii ŋûa pere. Dí ziɣãŋ-ŋai tɔ̀ɔ nyíi-ŋai kɛ dípɛrɛ-ŋai ŋɛ́i-tuɛ a tɛɛ ŋai.
29Imɛ ǹóŋ Zadɔ è ziɣãŋ da tɔ̀ɔ máŋ. Ziɣãŋ è dɔ̀ɔ pôlui ǹya ƃa nyii kɛ̀ ŋɔpɛ́rɛi ŋɛ́i-tuɛi.
Simaya ǹyaa máŋ è ziɣãŋ da tɔ̀ɔ. Nya ƃe kɛ̀ ziɣãŋ lá mɛi kâai da dòli a Vóloi kulâi-pere siɣãŋ lai. Simaya ǹâŋ láa ƃé kɛ̀ a Sikania.
30Ananaya da Anuŋ dí ziɣãŋ da tɔ̀ɔ. Dí tãi veerɛ ɣelei ká ŋí kɛ̀ ziɣãŋ da tɔ̂ɔ mɛni ma pôlu. Ananaya ǹâŋ láa ƃé kɛ̀ a Silɛmaya. Anuŋ è kɛ̀ a Zâla ǹóŋ ǹɔ́ɔlu mɛi da ɣelei.
Nyíŋi pôlu ma, Mɛsulaŋ è ziɣãŋ tɔ̂ɔ pôlu nyii kɛ̀ ŋɔpɛ́rɛi ŋɛ́i-tuɛi. Mɛsulaŋ ǹâŋ láa ƃé kɛ̀ a Berekaya.
31Gôo ɣale nûui, Maakiza è ziɣãŋ da tɔ̀ɔ. È gɔ́ɔ pîlaŋ ƃɛ́i Mɛsulaŋ è kòyaŋ naa é lɛ́ɛ la zu é seri Ŋ̀âla-pɛrɛi ŋɔtíi kɛ́ ƃelai da bɔni tɔɔ ƃelai díkolii su. Gwaa ŋí ma è kɛ̀ ziɣãŋ m̀ɛ́i ma da naa tòli a Ŋ̀ãa-tɛ̀ gîe-ma siɣãŋ lá. È ziɣãŋ tɔ̂ɔ é seri la loŋpoi kɔlɛ nyii kɛ̀ ziɣãŋ mɛi pere ǹɔii ŋûa pere vóloi kulâi pere soŋoi su.
32Gôo ɣale-ƃelai da bɔni tɔɔ-ƃelai ƃé ziɣãŋ kpéli kpɛɛ̂i ƃelai tɔ̂ɔ pôlu. Dí gɔ́ɔ pîlaŋ loŋpoi kɔlɛ nyii kɛ̀ ziɣãŋ mɛi pere ǹɔii ŋûa-pere, vóloi kulâi-pere sonôŋ su, é lɛ́ɛ la zu dí seri ziɣãŋ m̀ɛ́i ma da ǹaa tòli a M̀ála siɣãŋ lai.
Currently Selected:
Niɛmaya 3: KWB
Highlight
Copy
Compare
Share
Want to have your highlights saved across all your devices? Sign up or sign in
