Maafîu 26
26
Ǹúu tuɛ-ƃelai dí Zîsɛ maa-kîri tèe
(Mâki 14:1, 2; Lûu 22:1, 2; Zɔ̂ŋ 11:45-53)
1Nyiŋi pôlu ma, tãi Zîsɛ è kpɛ̀ɛ la a ŋ̀óo-ŋai ŋí kélee ƃóɔi, è mò ŋɔpôlu-ƃelai dîa, ǹyɛɛi, 2“Ka gɔ́lɔŋ a gɛɛ ɣele-kûu feerɛ à tɛ̀ɛ, gɛ̀ ní, Dɛɛ-mɛi Kûui ŋ̀ele a seri, ǹyaŋ da pâi núu-kpune Ǹóŋ sonîi a gɛɛ dí gbamo saa-wuru ma.”
3Nya ƃe zâla láa soŋ-ƃela kpaya-kpayai da ǹûai dínuu-pɔlɔ-ŋai dí díŋa tɛ̀ díkîe ma zâla láa soŋ-nuu kɛ́tɛi, nyii da kɛ̂ ma Kaifa, ŋɔmɛni-saa ƃo-kêrei mu. 4Dí díŋuŋ pìlaŋ a gɛɛ dí Zîsɛ sòŋ a gbàna dí bàa. 5Kɛ́lɛ, dí mò, dîyɛɛi, “Kúfe gɛ gúui su, yóo-yoo fa la too la ǹûai sama.”
Nɛnî tɔnɔ è wúlɔ pù Zîsɛ ŋûa Bɛtɛni
(Mâki 14:3-9; Zɔ̂ŋ 12:1-8)
6Tãi nâa Zîsɛ è kɛ̀ la Bɛtɛni, gbôdo-nuui Samaŋ ŋɔpɛ́rɛi mui, 7nɛnî tɔnɔ è pà bɔ, wuru-ya kúŋ nɛ̃ɛ sɔ̃ɔ kpanaŋɔɔ kɛ́ ƃo ǹyêei ƃaa-ƃɔlɔŋ su. Zîsɛ kɛ́ɛ seêni teƃelei ma gɛ ǹáa mìi, nɛnîi è ŋuru-yai pù ŋ̀ûa. 8Kɛ́lɛ, tãi ŋɔpôlu-ƃelai dí nyiŋi kàa lai, dílii è ŋwàna, dîyɛɛi, “A ŋuru-yai kara-karai le-mɛni ma? 9Kpɛ́ni fêi, eêi pɔ̂ri kɛ̂i a sɛŋ é gɔlɛ a zɔ̃ɔ kɛ́tɛ é zɛŋ-kaoi tɛɛ gôlo-ƃelai pɔ.”
10Kɛ́lɛ, nyiŋi kɔlɔŋɔɔ Zîsɛ mìi, è mò dîa, ǹyɛɛi, “Ka laa-saa kɔ́rîi nɛnîi ma le-mɛni ma? Kpɛ́ni fêi, a tíi lɛ́lɛɛ kɛ́ mî. 11Kpɛ́ni fêi, gôlo-ƃelai díkaa kákɔlɛ a tãi kélee, kɛ́lɛ, ḿve pâi kɛ̂i kákɔlɛ a tãi kélee. 12Kpɛ́ni fêi, tãi è ŋ̀úru-ya kúŋ nɛ̃ɛi pù la ŋ́gbono mai, è gɛ̀ tí ńoo mɛni ma. 13Ŋa tɔ̃yâ ƃôi kâa, ǹɔii kélee su da pâi Duŋ Lɛ́lɛɛi ŋí ƃôi naai, m̀ɛnii ŋí ǹɛnîi è gɛ̀i, da pâi lônoi é pîlaŋ ma a gɛɛ gíli é lɛ́ɛ núu ŋá.”
Zudasi è fàa a gɛɛ é kula Zîsɛ pôlu
(Mâki 14:10, 11; Lûu 22:3-6)
14Nya ƃe ǹúu puu kao feerɛi dɔnɔ nyii da dòli a Zudasi Sekariai, è lì zâla láa soŋ-ƃela kpaya-kpayai pɔ, 15ǹyɛɛ diai, “Ɣɛɛlu ƃe ka pâi dɛ̀ɛi ḿbɔ, à kɛ̀ ŋà Zîsɛ tɛ̀ɛ kápɔ?” Nya ƃe dí sɛŋ-kao kole kpua buu saaƃa tɛ̀ɛ bɔ. 16E síɣe maa tãi tí ma, è kɛ̀ pere kɔ́rîi a gɛɛ é dɛ́ɛ dípɔ.
Zîsɛ da ŋɔpôlu-ƃelai dí Dɛɛ-mɛi Kûu-mii-sɛŋ mii
(Mâki 14:12-21; Lûu 22:7-13, 21-23; Zɔ̂ŋ 13:21-30)
17Dɛ́-sɛŋ fé kpoloi maa-kûu-ɣelei duɛ-tuɛi ma, Zîsɛ ŋɔpôlu-ƃelai dí pà bɔ, dîyɛɛ mai, “Mí ta ƃe ya ŋ̀wɛ̂lii a gɛɛ kú nàa kpɛ̀tɛ yɛ̂ Dɛɛ-mɛi Kûui su-mii-sɛŋ mii mɛni mai?”
18Nya ƃe è mò dîa, ǹyɛɛi, “Ka lí daa-leei su ǹúui tí pɔ naa, ká m̀ó ma, ‘Kaamɔ̂ɔ ǹyɛɛ, Ŋátãi a lɛɣɛ. Ŋa pâi dɛɛ-mɛi-kuui kulâi ípɛrɛi mu kwa ŋápôlu-ƃelai.’ ”
19Nya ƃe Zîsɛ ŋɔpôlu-ƃelai dí gɛ̀ yɛ̂ɛ berei Zîsɛ è mò la diai. Dí dɛɛ-mɛi-kuui maa mɛni kpɛ̀tɛ.
20Tãi ɣele-wulii è kɛ̀ lai, da ŋɔpôlu-ƃela puu kao feerɛi dí kɛ̀ seêni teƃelei mâ díkɛ dílaa mii. 21Díkɛɛ dílaa miî, è mò dîa, ǹyɛɛi, “Ŋa tɔ̃yâ ƃoi kâa a gɛɛ kátɔnɔ da a pâi kúlâi ḿbôlu.”
22Nya ƃe malôŋ è tòo dîa, dí pɛ́lɛ marê kɛ̂i tɔnɔ-tɔnɔ, dîyɛɛ mai, “Kúnuu-namui, ńyãa ƃe?”
23Nya ƃe è díwoo su tòo, ǹyɛɛi, “Ǹúui kwa ǹyaa kwa kúyee lɔ̂i zɛŋ-foloi sui, ǹyaa ƃe pâi kúlâi ḿbôlu. 24Gáa a sɛŋ núu-kpune Ǹóŋ é lí yɛ̂ɛ berei máŋ bɔ̃yɛɛ̂i la é pîlaŋ mai, kɛ́lɛ, kpalo ƃélaâi ǹúui ma, nyii pâi kulâi bôlui! Eêi pɔ̂ri kɛ̂i a ǹɛ́lɛɛ m̀ɛni ma a gɛɛ dífe maa sɔlɔ ƃô.”
25Zudasi, nyii kùla bôlui, è ŋ̀óo su tòo, ǹyɛɛi, “Kaamɔ̂ɔ, ńyãa ƃe?” Nyɛɛ mai, “Yâa m̀ó.”
Ǹúu-namui Ŋɔmii-sɛŋ Maa-waai
(Mâki 14:22-26; Lûu 22:14-20; Kɔleŋtiɛŋ Maa-ŋuŋ 11:23-25)
26Díkɛɛ dílaa miî, Zîsɛ è kpólo síɣe é lûwa tòo, é zu ɣále é dɛ́ɛ ŋɔpôlu-ƃelai pɔ, ǹyɛɛ diai, “Ka miî, ŋ́gbonôi ká ŋí.”
27È kpele-kɔ̂ɛɛ sìɣe é sɛɣɛ-fei tɛɛ é dɛ̀ɛ dípɔ, ǹyɛɛ diai, “Kákelee ka kákpele la. 28Kpɛ́ni fêi, ŋ́ãai ká ŋí, Gbanaŋ-woo Kɛɛ (Ninai) mɛni ma, nyii a pú núu támaa mɛni ma sɔnyɔ̂ŋ su-mɛni-lɛɛ mɛni mai. 29Kɛ́lɛ, ŋá m̀ó kâa, é síɣe tãi ŋí ma fé pâi gbɔmɔ-ƃa-yai ŋí da kpelêi é lɛ́ɛ la zu ŋ̀elei tí é seri kwaa kâa-ni kwa pâi kúkpelêi la gîe ma a nina Ńâŋ ŋɔkâloŋ-laai sui.”
30Nya ƃe dí wule tɔnɔ tòo dí li Ŋulɔ-wuru Yeei ma.
Zîsɛ è Pitɛ ŋɔsîa-too mɛnii ƃô ǹaa túɛ
(Mâki 14:27-31; Lûu 22:31-34; Zɔ̂ŋ 13:36-38)
31Nya ƃe Zîsɛ è mò dîa, ǹyɛɛi, “Kákelee ka pâi káyee kulâi ḿaa-mɛni su sâa kpinii ŋí sú. Kpɛ́ni fêi, bɔ̃yɛɛ̂i, ‘Ŋa pâi m̀ála mɛi-kaa-nuui pàai, m̀ála-ŋai kélee dí táa-taa.’ 32Kɛ́lɛ, tãi ŋa ḿu sìɣe la saa yêei, ŋa pâi liî kátuɛ Galalii.”
33Nya ƃe Pitɛ è ŋ̀óo su tòo, ǹyɛɛ mai, “À kɛ̀ ǹúui kélee da pâi díyee kulâi ímaa mɛni su, fé pâi wɔlɔ ńyee kulâi ímaa mɛni su.”
34Nya ƃe Zîsɛ è mò m̀a, ǹyɛɛi, “Ŋa tɔ̃yâ ƃôi yâ, a gɛɛ gbínii ŋí sú, dɛ́ɛ-sîrɛi é lɛ́ɛ pâi ŋ̀óo pilii, ya pâi ḿaa sia too la kɛ̂i saaƃa.”
35Nya ƃe Pitɛ è mò m̀a, ǹyɛɛi, “A nɛ̀ɛ ma kpîŋ kwa yá kú sáa, fé pâi wɔlɔ ímaa sîa toôi.” Bere nɔ́ ƃe máŋ ŋɔpôlu-ƃelai kpéli-ŋai dí mò la.
Zîsɛ è Ɣâla fɛ̀li Gɛsɛ̂mani
(Mâki 14:32-42; Lûu 22:39-46)
36Naa kɛ́ɛ tíi, Zîsɛ da ŋɔpôlu-ƃelai dí pà kwaa da ma da nâa tòli a Gɛsɛ̂mani. Nya ƃe è mò dîa, ǹyɛɛi, “Ka sèe ƃɛ́ é lɛ́ɛ lá zu ŋá lí manaa tí ŋá Ɣâla fɛli naa.” 37È lì a Pitɛ è pɛlɛ Zɛƃɛdi ǹóŋ-surɔŋ feerɛi ma. Nya ƃe malôŋ è pɛ̀lɛ toôi ma, ǹíi kɛ́ kɔ́-kɔ. 38Nya ƃe è mò dîa, ǹyɛɛi, “Sâa, maloŋ a toôi ŋámɔ̂leŋ ḿâ a ŋánaa. Ka lɛ̀ɛ ƃɛ́, kú kɛ́ a kúŋɛi kúfe nyii.”
39Nya ƃe è zu kùla dîa é lí a guro, é ŋ̀uŋ mâ pîlaŋ é Ɣâla fɛli, ǹyɛɛi, “Ńâŋ, à kɛ̀ pɔ̂ri à kɛ̀ naa, nɛ̀ɛ naa gbele-kɔɛi ŋí é tɛ́ɛ ḿâ. Kɛ́lɛ, ńîa-mɛni fêi fɛ̂ɛ ínîa-mɛnii é kɛ́.”
40Nya ƃe è pà ŋɔpôlu-ƃelai pɔ naa é díkaa dí kɛ́ nyii, ǹyɛɛ Pitɛ ma, “Kwa kâa ni kúfa pɔ̂ri máŋ kɛ̂i a kúŋɛi a aƃa tɔnɔ? 41Ka kɛ́ a káŋɛi ká Ɣâla fɛli a gɛɛ káfe píli yee-laa-maa su. Mɔ̂leŋ faâi kpɔ́, kɛ́lɛ, gbonoi fíi kpɛɛ̂i.”
42È ŋɔnɔ lí naa a tãi veerɛ-ɣelei, é Ɣâla fɛli, ǹyɛɛi, “Ńâŋ, à kɛ̀ nyiŋi fa pɔ̂ri tɛɛ̂i ḿâ fɛ̂ɛ ŋá gbèle, tɔ̀ɔ ínîa-mɛni é kɛ́.” 43Zîsɛ è ŋɔ́nɔ lène pôlu é díkaa díkɛ nyii, kpɛ́ni fêi, díŋɛi-gɔlɔŋ è kɛ̀ a ŋwiɛɛ.
44E dílɛ̀ɛ naa é lí pôlu é Ɣâla fɛli a tãi zaaƃa-ɣelei, gɛ ŋ̀óo tɔnɔi tí ƃò nɔ. 45Naa kɛ́ɛ tíi, è pà ŋɔpôlu-ƃelai pɔ è m̀o dîa ǹyɛɛi, “Kákaa niî nyiî kákɛ káfii tɔɔ? Ka gáa, aƃai aâ sèri a gɛɛ dí kúla núu-kpune Ǹóŋ pôlu dí dɛ̀ɛ sɔnyɔ̂ŋ-ƃela pɔ. 46Ka kámu sìɣe kwaa lí. Ka gáa ǹúui pâi kulâi ḿbôlui, aâ lɛɣɛ ƃɛ́.”
Tãi dí Zîsɛ kɔ̀lɛ la da tãi dí zòŋ lai
(Mâki 14:43-50; Lûu 22:47-53; Zɔ̂ŋ 18:3-12)
47Gɛ́ɛ niî lônoi, Zudasi nyii kɛ̀ a ŋɔpôlu-ƃela puu kao feerɛi dɔnɔi, è pà a núu támaa nyii-ŋai kùla zâla láa soŋ-ƃela kpaya-kpayai da ǹûai dínuu-pɔlɔ-ŋai pɔ naai. Ƃóa-sɔkpɔ-ŋa da wuru-gbua-ŋa dí kɛ̀ díyêei. 48Ǹúui kùla bôlui è ŋɛ́i-kɛ-maa lɛ̀ ǹûai dîa, ǹyɛɛ diai, “Ǹúui ŋa pâi ńa-gbɔ seêi mai, gɛ̀ ní ǹyaa ká tí. Ka zòŋ.”
49Nya ƃe è pà Zîsɛ pɔ a maa félaa, ǹyɛɛ mai, “Kaamɔ̂ɔ!” E ǹá-gbɔ sèe m̀a.
50Nya ƃe Zîsɛ è mò m̀a, ǹyɛɛi, “Ŋ́wɛlii, m̀ɛnii í pà mai, gɛ́.” Nya ƃe ǹûai dí pà dí díyee pɛ́lɛ Zîsɛ ma dí zòŋ. 51Diai kɛ̀ Zîsɛ kɔlɛi, dɔnɔ è ŋɔƃóa-sɔkpɔ̂i kùla daâi, é bíli zâla láa soŋ-nuu kɛ́tɛi yée-mu-nuui ḿâ é ŋ̀óli tée. 52Nya ƃe Zîsɛ è mò m̀a, ǹyɛɛi, “Íƃoa-sɔkpɔ̂i lɔ́ pôlu daâi, kpɛ́ni fêi, diai kélee da kɔ̂ a ƃóa-sɔkpɔ̂i, da pâi saâi a ƃóa-sɔkpɔ. 53Kpaa máŋ gáa íkili ŋá a gɛɛ fa pɔ̂ri Ńâŋ fɛlîi máŋ a gɛɛ é Ɣâla-taa-kela kpɔŋ támaa tɛ́ɛ ḿbɔ é tɛ́ɛ Ɣâla-taa-kela-kpulu puu kao feerɛ ma? 54Gɛ̀ ní, Ŋ̀âla-kɔlɔi wóo ŋa-see kɛ́-pere a pɔ̂ri kɛ̂i leŋ a gɛɛ fɛ̂ɛ nyiŋi é kɛ́?”
55Maa aƃai mâ Zîsɛ è mò gbɔŋ-su-ƃelai dîa, ǹyɛɛi, “Ká pà ḿbɔ yɛ̂ɛ núu a pà ŋuma-nuu pɔ a ƃóa-sɔkpɔ da wúru-gbua a gɛɛ ká ńzoŋ? Ŋá sèe Ŋ̀âla-pɛrɛ Kɛ́tɛi mu ŋ́gɛ Ɣâla-mɛni lɛ a ɣele kélee ǹyaŋ káfe ńzoŋ ni. 56Kɛ́lɛ, fɛ̂ɛ nyiŋi kélee é kɛ́ a gɛɛ Ɣâla ŋɔlóno-kɛ-ƃelai Díɣâla-kɔlɔi ŋa-see é kɛ́.” È nâa kɛ̀ tí, ŋɔpôlu-ƃelai kélee dí ǹɛɛ nâa dí pú.
Zîsɛ è kɛ̀ gɔyâŋ su-ƃelai ŋɛ́i tuɛ
(Mâki 14:53-65; Lûu 22:54, 55, 63-71; Zɔ̂ŋ 18:13, 14, 19-24)
57Diai Zîsɛ sòŋ dí lì la zâla láa soŋ-nuu kɛ́tɛi Kaifa pɔ. Ǹaa ƃe gɔlɔ-pɔ̃yɛ-ƃelai da ǹúu-pɔlɔ-ŋai dí kɛ̀ a díŋa tɛ́ɛ naa díkîe ma. 58Kɛ́lɛ, Pitɛ è lɛ̀ɛ bôlu zu kúlaa ma. È pà zâla láa soŋ-nuu kɛ́tɛi ŋɔgalai su, da gɔkuluƃa-ŋai kɛ̀ ǹaa mɛi kaai dí see naa a gɛɛ é m̀ɛnii kpɛɛ ŋá káa. 59Nya ƃe zâla láa soŋ-ƃela kpaya-kpayai da goyâŋ-su-ƃelai kélee dí wôya-sere-faa kɛ-ƃela kɔ̀ri Zîsɛ láa ma a gɛɛ dí bàa. 60Kɛ́lɛ, berei máŋ wôya-sere-faa kɛ́ ƃela támaa dí pà lai, dífe zɔŋ kaa ni zu. Kɛ́lɛ, naa pôlu ma veerɛ dí pà 61dí m̀ó, dîyɛɛ, “Ǹalôŋ ŋí è mò, ǹyɛɛ, ‘Ŋa pɔ̂ri Ŋ̀âla-pɛrɛ Kɛ́tɛi wólôi ŋá dɔɔ ɣele-kuu saaƃa yée mu.’ ”
62Nya ƃe zâla láa soŋ-nuu kɛ́tɛi è sìɣe é tɔ́ɔ, ǹyɛɛ mai, “Ífe m̀ɛnii su toôi ǹûai ŋí da m̀ôi a ílaâi?” 63Kɛ́lɛ, Zîsɛ è m̀ɛi sâa. Nya ƃe zâla láa soŋ-nuu kɛ́tɛi è mò m̀a, ǹyɛɛi, “Fɛ̂ɛ í ífoo a vulu-laa Ɣalai í m̀o kûa à kɛ̀ íkaa a Kôrai, Ɣâla Ǹóŋ.”
64Zîsɛ è mò m̀a, ǹyɛɛi, “Yâa m̀ó. Kɛ́lɛ, ŋá m̀ó yâ, é síɣe tãi ŋí mâ ka pâi núu-kpune Ǹóŋ kâai seêni Ŋ̀wála-wâla-laai láa-mii-yee mɛi, gɛ pa ŋele-kɔlɔŋ kole-ŋai su.”
65Nya ƃe zâla láa soŋ-nuu kɛ́tɛi è ŋɔyokpoi fàla, ǹyɛɛi, “A tɛ-ŋɛi-woo ƃó. Le-sere-ŋa ƃe ŋɔnɔ kwa ŋ̀wɛ̂lii? Ka gáa, ka nâa ŋɔtɛ-ŋɛi-wooi mɛ́ni. 66Kákili-ŋa-siai káa leŋ?” Dí ŋ̀óo su tòo, dîyɛɛi, “Maa nɛɛ̂i é sáa.”
67Nya ƃe dí díla-ya pù ŋ̀ɛ́i, dí dua, ǹúui da-ni dí ǹókwa a díyee, 68dîyɛɛi, “Yái íkaa a Kôrai, ǹúui ítùai, ǹɛ̂ kûa!”
Pitɛ è Zîsɛ maa sîa tòo
(Mâki 14:66-72; Lûu 22:56-62; Zɔ̂ŋ 18:15-18, 25-27)
69Pitɛ è kɛ̀ seêni ŋínii ŋá galai su-pere. Nya ƃe yée-mu-nɛni tɔnɔ è pà bɔ, ǹyɛɛi, “Yá máŋ íkɛ̀ Galalii-nuui Zîsɛ pôlu.”
70Kɛ́lɛ, Pitɛ è zìa ma ǹúui kélee ŋɛ́i, ǹyɛɛi, “Fé m̀ɛnii kɔ́lɔŋ íkaa m̀ôi.” 71Tãi è kɛ̀ liî la galai lá-perei, yée-mu-nɛni da kpɛ́ni è gàa, é m̀ó ǹûai dîa kɛ̀ naai, ǹyɛɛi, “Nalôŋ ŋí è kɛ̀ Nâzarɛ-nuui Zîsɛ pôlu.”
72Nya ƃe è ŋɔnɔ zîa tòo é vóo, ǹyɛɛi, “Fé ǹalôŋ ŋí kɔ́lɔŋ.”
73Nàa guro kɛ́ɛ tíi, diai kɛ̀ tɔɔ̂i ni nàa kɔlɛ mai, dí mò Pitɛ ma, dîyɛɛi, “Tɔ̃yâ ma, yá máŋ íkaa a dítɔnɔ da, kpɛ́ni fêi, ílono-wooi a ílɛ.”
74Nya ƃe è nâa pɛ̀lɛ vóôi a gbanaŋɔɔ, ǹyɛɛi, “Fé ǹalôŋ ŋí kɔ́lɔŋ.” È kɛ̀ nɔ́ tí, dɛ́ɛ-sirɛi kɛ́ ŋ̀óo píli. 75Nya ƃe ŋ̀óoi Zîsɛ è mò Pitɛ mai, gíli è tòo Pitɛ ŋ̀á, ǹyɛɛ mai, “Tɛ́ɛ-sirɛ é lɛ́ɛ pâi ŋ̀óo pilîi, ya pâi ḿaa sîa too la kɛ̂i saaƃa.” Nya ƃe è kùla ŋínii ŋá é wɔ́lɔ kpɔ́ a ŋánaa.
Currently Selected:
Maafîu 26: KWB
Highlight
Copy
Compare
Share
Want to have your highlights saved across all your devices? Sign up or sign in
