Maafîu 17
17
Zîsɛ kpono kɛ́-pere maa è fàleŋ
(Mâki 9:2-13; Lûu 9:28-36)
1Ɣele-kuu lɔ́ɔlu mɛi da tɛ́ɛ pôlu ma, Zîsɛ è Pitɛ sìɣe da Zĩi é pɛ́lɛ ǹêɣe Zɔ̂ŋ ma é lí a dia yée tɔ́ɔ tɔnɔ ma dítee-tee kwaa ma. 2Nya ƃe m̀aa è fàleŋ díŋɛi. Ŋ̀ɛi è kɛ̀ kpɔ́ fóloi yɛ̂ɛ voloi. Ŋɔseɣei kɛ́ kole yɛ̂ɛ yee-fũa. 3Nya ƃe Mose da Ilaiza dí kùla díŋɛi, da Zîsɛ-ni díkɛ lono. 4Pitɛ è mò Zîsɛ ma, ǹyɛɛ, “Kúnuu-namui, ǹɛ́lɛɛ̂i a gɛɛ kúkaa ƃɛ. A kɛ̀ yà fàa m̀a, ŋa pâi ƃûu saaƃa tɔɔ̂i ƃɛ, dɔnɔ kɛ́ ƃò ímɛni ma, dɔnɔ kɛ́ ƃò Mose mɛni ma, dɔnɔ kɛ́ ƃò Ilaiza mɛni ma.”
5Gɛ́ɛ niî lônoi, ɣele-kɔlɔŋ kole è dímɛi pɛ̂lɛ. Nya ƃe wóo è kùla ŋele-kɔlɔŋ kolei su, ǹyɛɛi, “Ŋáwɛli-kɛ-maa-Loŋ ká ŋí, nyii m̀aa-mɛni a ńii láai. Ka ŋ̀óo mɛni.”
6Tãi ŋɔpôlu-ƃelai dí m̀ɛni lai, dí díŋuŋ pîlaŋ ǹɔii ma, díkɛ yao kpɔ́ a ŋánaa. 7Nya ƃe Zîsɛ è pà é ǹyée pɛlɛ dîa, ǹyɛɛ diai, “Ka kámu siɣe, káfe yao.” 8Tãi dí díŋuŋ mu sìɣe lai, dífe núu da kélee kaa ni fɛ̂ɛ nɔ Zîsɛ.
9Tãi dí kɛ̀ ǹyéei yenîi lai, Zîsɛ è mò dîa, ǹyɛɛi, “M̀ɛnii ká gàai, káfe mo núu da kélee ma é lɛ́ɛ la zu núu-kpune Ǹóŋ é m̀u siɣe saa yêei.”
10Nya ƃe ŋɔpôlu-ƃelai dí marê kɛ̀, dîyɛɛ mai, “Le-mɛni ƃe ŋaŋ gɔlɔ-pɔ̃yɛ-ƃelai da mò la a gɛɛ fɛ̂ɛ Ilaiza é pa fúlɔi?”
11Nya ƃe è díwoo zu tòo, ǹyɛɛi, “Ilaiza a pâi kpɔ a tɔ̃yâ. A pâi mɛnii kélee su sãâi. 12Ŋá m̀ôi kâa Ilaiza a nâa pá, kɛ́lɛ, dífe m̀aa kpɛɛ ni. M̀ɛni ma, m̀ɛnii kélee dí kɛ̀ ŋ̀wɛ̂lii, dí gɛ̀ lai dí gɛ̀ la. Bere nɔ ƃe máŋ núu-kpune Ǹóŋ a pâi mɛni-soli kâai la díyee mu.”
13Ŋɔpôlu-ƃelai dí nâa tàre zu a gɛɛ è lòno dípɔ é pîlaŋ Batâi-kɛ-nuui Zɔ̂ŋ ma.
Zîsɛ è deŋ-deŋ surɔŋ-lo ƃàlo
(Mâki 9:14-29; Lûu 9:37-43a)
14Tãi dí sèri la gbɔŋ mai, nalôŋ tɔnɔ è pà bɔ é pɛ́lɛ gɔ́ɔ mu, ǹyɛɛ mai, 15“Kúnuu-namui, ńoŋ-surɔŋ malôŋ káa, kpɛ́ni fêi, deŋ-deŋ kɔlɔ-fela kaa mà, gbanaŋɔɔ kpɔ́ mà a ŋánaa, kpɛ́ni fêi, tãi támaa a tôo ŋɔŋ ŋá, tãi támaa gɛ píli ǹyái su. 16Ŋá pà la ípôlu-ƃelai pɔ, dífe pɔ̂ri ni m̀álôi.” 17Nya ƃe Zîsɛ è ŋ̀óo su tòo, ǹyɛɛi, “Óo ŋ̀éniɛi ŋí su-ƃelai, laa-la fé káyêei, kálii su fé sãa ni. Fɛ̂ɛ ŋá kɛ́ kákɔlɛ a tãi ɣɛɛlu? Fɛ̂ɛ ŋá ńii kpéle káyêei a tãi ɣɛɛlu? Ka pá la ḿbɔ ƃɛ.” 18Nya ƃe Zîsɛ è lòno nyînaŋ nyɔ́mɔɔi mà, é kúla zurɔ̂ŋ-loi gbonôi. Zurɔ̂ŋ-loi è ƃàlo kpɔ́ nɔ a maa aƃai ti. 19Zîsɛ ŋɔpôlu-ƃelai dí pà bɔ dítee-tee kwaa ma, dîyɛɛ mai, “Kúfe pɔ̂ri ni gbɛ̂i le-mɛni ma?” 20È mò dîa, ǹyɛɛi, “Kpɛ́ni fêi, kálaa-lai kuro-têi. Ŋá tɔ̃yâ ƃoi kâa, à kɛ̀ kálaa-lai kɛ́tɛ̂i máŋ yɛ̂ɛ mɛsɛ-kao, ka pâi m̀ôi ǹyéei ŋi ma, ‘Kula ƃɛ í lí manaa-pere,’ ǹyaŋ a pâi kulâi naa. Mɛni kélee bɔri a pâi kɛ̂i kâa. [ 21Kɛ́lɛ, nyînaŋ nyɔ́mɔɔ sii ŋí fa kûla núu kponôi, fɛ̂ɛ Ɣâla fɛliɛ da núu piliɛɛ suŋ su.”]
Zîsɛ è ŋɔnɔ ŋɔsaai maa-mɛni ƃò naa-tuɛ
(Mâki 9:30-32; Lûu 9:43b-45)
22Dí kɛ́ɛ siâi gîe ma Galalii-kpiniŋ sui, Zîsɛ è mò dîa, ǹyɛɛi, “Da pâi núu-kpune Ǹóŋ tɛɛ̂i nûa pɔ. 23Da pâi baâi, é m̀u siɣe saa yêei a ŋele-kuui zaaƃa-ɣelei.” Dílii è sòli kpɔ́ a ŋánaa.
Zîsɛ è lòno é pîlaŋ Ŋ̀âla-pɛrɛ Kɛ́tɛi ŋɔŋuŋ-fela-fei mɛ̂ni m̀a
24Tãi dí sèri la Kapɔ̂niai, diai kɛ̀ a Ŋ̀âla-pɛrɛ Kɛ́tɛi mu ŋuŋ-fela-fei kula-ƃelai dí pà Pitɛ pɔ, dîyɛɛ mai, “Kásɛŋ-lɛ-nuui fa ŋuŋ-fela-fei ŋí da kɔ̀lɛ?” 25È zu tòo, ǹyɛɛi, “A gɔ̀lɛ.” Báa bɛ́rɛi mui, Zîsɛ ǹyaa fulɔi è lòno bɔ, ǹyɛɛ mai, “Íkili-ŋa-siai káa leŋ, Samaŋ? Gbɛ̂ɛ-ni ƃé ŋ̀éniɛi ŋí su-kaloŋ-ŋai da lɔii zûti da ŋuŋ-fela-fei kûla díyêei? Da gùla díkpɔɔ̂i-lonii yêei kpaa ŋɔ̃́ya-ŋa?” 26Tãi è mò la, ǹyɛɛ, “Ŋɔ̃yâ-ŋai,” Zîsɛ è mò ma, ǹyɛɛi, “Mɛni ma díkpɔɔ̂i-lonii ŋuŋ-ma ƃóɔi. 27Kɛ́lɛ, a gɛɛ káfe díkɛ dílii é ŋwána, lí í kpawɔ tóo ǹyái su. Nyɛ̃ɛi ya pâi gulâi a maa-ŋuŋ, ǹá táa, ya pâi sɛŋ-kao kole kâai ǹá. Gula í dɛɛ ǹûai pɔ́ kwa yá kúmɛni ma.”
Currently Selected:
Maafîu 17: KWB
Highlight
Copy
Compare
Share
Want to have your highlights saved across all your devices? Sign up or sign in
